විමුක්ති කොටි නායක වේලුපිල්ලේ ප්‍රභාකරන්ට අවමන් කළ ආණ්ඩුවේ ඇමතිවරයකු හෙළා දැකීමේ යෝජනාවක්
වන්නියේ ප්‍රාදේශීය සභාවක් විසින් සම්මත කර තිබේ.
ඇමැතිවරයා නියෝජනය කරන පක්ෂයේ සභිකයන්ද එම විරෝධයට එක්වී ඇත.
රාජපක්‍ෂ ආණ්ඩුවේ හවුල්කාර පාර්ශවයක් වන EPDP නමින් ප්‍රසිද්ධ ඊළාම් ජනතා ප්‍රජාතන්ත්‍රවාදී පක්ෂයේ නායක, ධීවර අමාත්‍ය ඩග්ලස් දේවානන්ද පසුගිය දා පාර්ලිමේන්තුවේදී ප්‍රකාශ කර සිටියේ කොටි නායක ප්‍රභාකරන් මත් ද්‍රව්‍ය ජාවාරම්කරුවෙකු බවය.
''දෙමළ ජනයාගේ හිත් වල සදාකාලිකව ලැගුම් ගෙන සිටින නායකයා වන්නේ කොටි නායක ප්‍රභාකරන්, එබැවින් ඩග්ලස් දේවානන්ද ඇමතිවරයා විසින් පාර්ලිමේන්තුවේ දී කළ මේ අවමන් සහගත ප්‍රකාශය තරයේ හෙළා දකිනවා,'' යැයි යෝජනාව ඉදිරිපත් කරමින් වන්නි දිස්ත්‍රික්කයේ කරච්චි ප්‍රාදේශීය සභාව නියෝජනය කරන එක්සත් ජාතික පක්‍ෂ මන්ත්‍රීවරයා පැවසීය.
2018 දී පැවති පළාත් පාලන ජන්දයෙන් කරච්චි ප්‍රාදේශීය සභාවේ බලය හිමි කර ගත්තේ ස්වාධීන කණ්ඩායමක් ලෙස තරඟ වැදී යාපනය දිස්ත්‍රික් හිටපු පාර්ලිමේන්තු මන්ත්‍රී මුරුගේසු චන්ද්‍රකුමාර් ගේ `සමත්තුව කච්චි` යි. චන්ද්‍රකුමාර් කලක් EPDP ය සමග සිට ඉන් බිඳී නව පක්ෂය ගොඩ නැගීය.
කරච්චි ප්‍රාදේශීය සභාවේ මන්ත්‍රීධූර 22 ක් ඔවුන්ට හිමි වන අතර එම දිස්ත්‍රික්කයේම පච්චල්පලෙයි හා පුනගරි ප්‍රාදේශිය සභාවල මන්ත්‍රීධුර හතර බැගින් දිනා ගැනීමට ද සමත් වී තිබේ.
එක්සත් ජාතික පක්‍ෂ මන්ත්‍රීවරයා ඉදිරිපත් කළ යෝජනාව ඒකමතිකව සම්මත කරමින් කතාකළ සමත්තුව කච්චි මන්ත්‍රී ඊ.මයිල්වාගනම් කියා සිටියේ ''දෙමළ ජනතා නිදහස් සටනේ නිරත වෙමින්, ප්‍රතිපත්ති ගරුකව සටන ඉදිරියට ගෙන ගිය විමුක්ති කොටි නායක ප්‍රභාකරන්ව තමන්ගේ පෞද්ගලික දේශපාලන වාසිය තකා අවමානයට ලක් කිරීම කිසි සෙත් අනුමත කළ නොහැකි'' බවය.
''තමන්ගේ නායකයා කවුද යන්න අදත් දෙමළ කෙනෙකුගෙන් ඇහැව්වොත් කියන්නේ ප්‍රභාකරන් කියලා, ඒ නිසා එවැනි නායකයෙකුට අවමන් කිරීම දෙමළ ජනයා පිළිකෙව් කරන බව දේවානන්ද ඇමතිවරයා දැන ගන්න ඕනෑ,'' යැයි එම පක්ෂයේම කේ.ලෝරන්ස් මන්ත්‍රීවරයා සිය අදහස් දක්වමින් පැවසීය.
ඉලංගෙයි තමිල් අරසු කච්චි 14 ක්, සමස්ත ලංකා දෙමළ කොංග්‍රසය, ශ්‍රී ලංකා නිදහස් පක්‍ෂ 02 ක් , ඊළාම් ජනතා ප්‍රජාතන්ත්‍රවාදී පක්ෂය, දෙමළ එක්සත් විමුක්ති පෙරමුණ, එක්සත් ජාතික පක්ෂය සහ ශ්‍රී ලංකා පොදුජන පක්ෂය මන්ත්‍රීධූර එක බැගින්, කරච්චි ප්‍රාදේශීය සභාව සමන්විතය.
