හදිසි හමුදා මෙහෙයුමක් පිටුපස ඇති බරපතළ අවදානම
දින ගණනාවක් තිස්සේ හෝඩුවාවක් නොමැතිව සිටින අග්බෝ හස්තියා සොයා ගැනීම වෙනුවෙන් විශේෂ හමුදා කණ්ඩායමක් කඩිනමින් පිටත් කර හැරීමට ආරක්ෂක අංශ පියවර ගෙන තිබේ.
පරිසර අමාත්‍යවරයා සහ ආරක්ෂක අමාත්‍යාංශ ලේකම්වරයා අතර පැවති විශේෂ සාකච්ඡාවකින් අනතුරුව මෙම නියෝගය නිකුත් වී ඇත. අග්බෝ ගැවසෙන නිශ්චිත ඉසව්ව හඳුනාගෙන, සත්වයාගේ ආරක්ෂාව පූර්ණ ලෙස තහවුරු කිරීම මෙම මෙහෙයුමේ මූලික ඉලක්කයයි.
කාවන්තිස්සගේ මරණය සහ මතුවන කුමන්ත්‍රණ සැකය
වයඹ වනපෙතේ සංකේතයක් බඳු වූ සියඹලන්ගමුව කාවන්තිස්ස ඇතාගේ ඛේදනීය මරණයත් සමග මෙරට වනඅලි සම්පතට එල්ල වී ඇති තර්ජනය පිළිබඳ බරපතළ කතිකාවක් ගොඩනැගී හමාරය.
කාවන්තිස්සගේ මරණය සාමාන්‍ය සිදුවීමක්ද, නැතහොත් මෙරට පතාක හස්තීන් ඉලක්ක කරගත් සැලසුම් සහගත වැඩපිළිවෙළක ප්‍රතිඵලයක්ද යන්න සොයාබැලීමට අපරාධ පරීක්ෂණ දෙපාර්තමේන්තුව (CID) වෙත ලිඛිත ඉල්ලීමක් යොමු කර තිබේ.
පරිසර අමාත්‍යාංශ ලේකම් කේ.ආර්. උඩුවාවල මහතාගේ අත්සනින් යුතුව යොමු කර ඇති එම ලිපියෙන් ඉල්ලා ඇත්තේ, වනඅලින්ට වෙඩි තැබීම හෝ වස දීම පිටුපස කිසියම් සංවිධානාත්මක ජාලයක් ක්‍රියාත්මක වන්නේද යන්න ප්‍රමුඛතාවක් ලෙස සලකා විමර්ශනය කරන ලෙසයි.
පරිසර සමතුලිතතාව සහ රාජ්‍ය වගකීම
ශ්‍රී ලංකාවේ වනඅලි සම්පත රැකගැනීම හුදෙක් සත්ව හිමිකම් පිළිබඳ කාරණයක් නොව, මෙරට සමස්ත පරිසර පද්ධතියේ සමතුලිතතාව තීරණය කරන ජාතික වගකීමකි.
මෙම අපරාධයන්ට සෘජුව හෝ වක්‍රව අනුබල දෙන පාර්ශ්ව නීතියේ රැහැනට හසුකර ගැනීම අත්‍යාවශ්‍ය බව පෙන්වා දෙන බලධාරීන්, CID විමර්ශන ප්‍රගතිය පිළිබඳව අඛණ්ඩව අමාත්‍යාංශය දැනුවත් කරන ලෙසද දැනුම් දී ඇත.
(සටහන - රාධිනි )