කළ යුතු කටයුතු නොකිරීම හේතුවෙන් මේ වන විට දිවයින පුරා රෝහල් තුළ ඖෂධ බොහොමයක් හිඟ වෙමින් පවතින්නේ යැයි රජයේ වෛද්‍ය නිලධාරීන්ගේ සංගමයේ (GMOA) කමිටු සාමාජික වෛද්‍ය ප්‍රසාද් කොළඹගේ පැවසී ය.
ඔහු මේ බව අනාවරණය කළේ ඊයේ (19) රජයේ වෛද්‍ය නිලධාරින්ගේ සංගමය කැඳවා තිබූ මාධ්‍ය හමුවේ දී ය.
නිදහස් සෞඛ්‍ය සේවාව ඉතාමත් අවදානම් තත්ත්වයක
මෙම මාධ්‍ය හමුවේ අදහස් දැක්වූ රජයේ වෛද්‍ය නිලධාරීන්ගේ සංගමයේ (GMOA) සහකාර ලේකම් වෛද්‍ය හංසමාල් වීරසූරිය පැවසුවේ රටේ කොඳු නාරටිය වන්නේ රට තුළ පවතින නිදහස් සෞඛ්‍ය සේවය බව තම සංගමය නිරන්තරයෙන් ම පැවසූ බව යි.
එහෙත් මේ වන විට එම නිදහස් සෞඛ්‍ය සේවාව ඉතාමත් අවධානම් තත්ත්වයක පවතින්නේ යැයි හෙතෙම අවධාරණය කළේ ය.
නිදහස් සෞඛ්‍ය සේවය පවත්වාගෙන යා නොහැකි තත්ත්වයක් උදා වෙලා
නිදහස් සෞඛ්‍ය සේවාව සැබැවින් ම නිදහස් සෞඛ්‍ය සේවාවක් වන්නට නම්: රෝහල් පද්ධතිය තුළ විශේෂඥ වෛද්‍යවරුන්, වෛද්‍යවරුන් ඇතුළු සෞඛ්‍ය කාර්ය මණ්ලය රැඳිය යුතු බවත්, තවත් පසෙකින් රෝහල් වෙත රෝගින් පැමිණිය යුතු බවත්, ඔවුන්ට ප්‍රතිකාර කිරීම සඳහා සෞඛ්‍ය කාර්ය මණ්ඩලය සිටිය යුතු බවත්, අනෙක් පසින් රෝගීන්ට අවශ්‍ය ප්‍රතිකාර සේවා සැපයීම සඳහා අවශ්‍ය: ඖෂධ, උපකරණ සහ රසායනාගාර පරීක්ෂණ යනාදිය අඩුවකින් තොරව රෝගින්ට සැපයිය යුතු යැයි මෙම මාධ්‍ය හමුවේ දී අදහස් දැක්වූ රජයේ වෛද්‍ය නිලධාරීන්ගේ සංගමයේ (GMOA) මාධ්‍ය ප්‍රකාශක වෛද්‍ය ආචාර්ය චමිල් විජේසිංහ පැවසී ය.
නමුත් මේ වන විට මේ සියලු සේවා බිඳ වැටෙන තත්ත්වයක් මතුව ඇතැයි ඔහු අවධාරණය කළේ ය.
