පිටුවහලේ ජීවත් වන ලේඛකයන් පහලොස් දෙනෙකුගේ ජීවමාන අත්දැකීම් ඇතුලත් කරමින් ප්‍රකාශයට පත් කළ ජාත්‍යන්තර කතා සංග්‍රහයකට ලංකාවේ දෙමළ ලේඛකයකුගේ
සහ ලේඛිකාවකගේ අත්දැකීම් වලින් නිර්මාණය වූ කතාවක් ද ඇතුලත්ව තිබේ.
කැනඩාවේ ජීවත් වන සරණාගතයන් ලේඛකයන් 15 දෙනකුගේ ජීවමාන අත්දැකීම් ඇතුලත් The Uncaged Voice (කූඩුවෙන් මිදී ආ කඩහඬ) නම් වූ මෙම කෘතිය කොමොරන්ට පොත් ප්‍රකාශකයන් මගින් ඔක්තෝබර් 21 වැනිදා කැනඩාවේ දී ප්‍රකාශයට පත් කෙරිණි.
මේ ජාත්‍යන්තර කථා සංග්‍රහයට ලංකාවෙන් පිටමං වු දෙමළ ලේඛක හා ලේඛිකා ඉලමරන් නාගරාසා හා දිශාලි ඉලමරන් දෙදෙනාගේ “Maran’s Unknown Journey” (මාරන්ගේ අප්‍රකට චාරිකාව) නම් කතාව ද ඇතුලත්ව ඇත.
මාරන් නමින් හඳුන්වන ඉලමරන් නාගරාසා, නිදහස් මාධ්‍යවේදියෙක්, මානව හිමිකම් ක්‍රියාධරයෙක් සහ සරණාගත උපදේශකයෙකු ලෙස කටයුතු අතර, 2009 දී කැනඩාවට පලා යාමෙන් අනතුරුව ත්‍රස්තවාදි සාමාජිකයෙක් යැයි සැකපිට වසරකට වැඩි කාලයක් ඔහු සිරගත කර තබා ඇත. ජනමාධ්‍යවේදය සහ නීතිය පිළිබඳ කැනඩාවේ කාල්ටන් විශ්වවිද්‍යාලයේ ද්විත්ව උපාධියක් හදාරන දිශාලි ඉලමාරන් ඉලමාරන් නාගරාසාගේ දියණියයි.
මුද්‍රිත පිටු 248 ක් පුරා දිවෙන මේ ජීවමාන අත්දැකීම් ඇතුලත් කථා සාරයන්, සරණාගත බවේ අත්දැකීම් තුලින් ඔප් නැංවෙන භාෂණයේ නිදහස, ඒකාධිපතිත්වය, පුවත්පත් කලාව යනාදී තේමාවන්ගෙන් සමන්විත වෙයි.
“ද අන්කේජ්ඩ් වොයිස්” කෘතියෙහි අන්තර්ගත රචනා විටෙක කෘරත්වය ප්‍රකට කරන්නා සේම හෘදයාංගම ද වන්නේ ය.
කීත් රොස් ලෙකී ගේ සංස්කරණයෙන් යුත් මේ ග්‍රන්ථය මේරි ජෝ ලෙඩිගේ හැඳින්වීමකින් යුක්තය.
එමෙන්ම මේ රචනාවෝ මාධ්‍ය නිදහස සහ අදහස් ප්‍රකාශනයේ නිදහස හුදු පරමාදර්ශයන් වීමට අමතරව යථාර්ථයේ නොපවතින දේශයන්හි වෙසෙන මාධ්‍යවේදීන්ගේ සහ ලේඛකයන්ගේ වීර්ය සහ දරාසිටීමේ හැකියාව පෙන්නුම් කරයි.
