හිඟය පියවීමේ දැවැන්ත මෙහෙයුම
ලංකා ඉතිහාසයේ විශාලතම ගුරු බඳවා ගැනීම ආරම්භ කර ඇති බව පෙන්වා දෙන අග්‍රාමාත්‍ය ආචාර්ය හරිනි අමරසූරිය, ලබන වසරේ මුල් භාගය වන විට ගුරුවරුන් 30,000ක් පද්ධතියට එක්කරන බව අද බදුල්ලේදී ප්‍රකාශ කළාය.
නොවැම්බර් 20 වැනිදා සිට උපාධිධාරී ගුරුවරුන් 17,000ක් තෝරාගැනීමේ මූලික සම්මුඛ පරීක්ෂණ ඇරඹෙන අතර, අදියර කිහිපයක් යටතේ උපාධිධාරීන් 23,000ක් පන්ති කාමරයට යොමුකිරීම රජයේ ඉලක්කයයි. පෙබරවාරිය වන විට විද්‍යාපීඨවලින් පිටවන තවත් 6,000ක් සහ අධ්‍යාපනවේදී උපාධිධාරීන් පිරිසක් ද ඊට එක්වීමට නියමිත බව රජය පවසයි.
ගැසට් පත්‍රයේ ව්‍යාකූලත්වය සහ සමිති චෝදනා
රජයේ මෙම ප්‍රකාශ පිළිබඳව ලංකා ගුරු සංගමය මතු කරන්නේ හාත්පසින්ම වෙනස් චිත්‍රයකි. පාසල් පද්ධතිය තුළ 36,000කට වැඩි පුරප්පාඩු පැවතියද, විභාග ගැසට් පත්‍රයේ පැවති දුර්වලතා හේතුවෙන් බඳවා ගැනීමේ ක්‍රියාවලිය මුළුමනින්ම අවුල් ජාලයක් බවට පත්ව ඇතැයි එම සංගමය පෙන්වා දෙයි.
36,000ක හිඟයක් හමුවේ අයදුම්පත් කැඳවා ඇත්තේ 23,000කට පමණක් බවත්, ඉන් සම්මුඛ පරීක්ෂණ සඳහා තෝරාගෙන ඇත්තේ 17,000ක් පමණක් බවත් පෙන්වා දෙන ලංකා ගුරු සංගමයේ ලේකම් ජෝසප් ස්ටාලින්, ඉතිරි පුරප්පාඩුවලට වගකියන්නේ කවුරුන්දැයි ප්‍රශ්න කරයි.
වසර ගණනක් එකම තැන හිරවුණු ගුරුවරු
මෙම බඳවා ගැනීම් ප්‍රමාදය හමුවේ වඩාත්ම පීඩාවට පත්ව ඇත්තේ වසර 12-13ක් එකම දුෂ්කර සේවයේ නිරත, ස්ථාන මාරුවීම් අහිමි වූ ගුරු ප්‍රජාවයි. ඔවුන් වෙනුවට අනුප්‍රාප්තිකයින් නොමැතිවීම නිසා සාධාරණ ස්ථාන මාරු අයිතිය පවා අහිමිව ඇති බව නිරීක්ෂකයෝ පෙන්වා දෙති.
ලබන වසරේ ජනවාරිය දක්වා පත්වීම් ලබාදීම කල්ගත වුවහොත්, නව වාරය ආරම්භයේදීම දරුවන්ට මෙන්ම ගුරුවරුන්ටද බරපතළ අසීරුතාවන්ට මුහුණ දීමට සිදුවන බව ක්ෂේත්‍රයේ ප්‍රවීණයන්ගේ මතයයි.
ප්‍රතිසංස්කරණ හමුවේ මතුවන ප්‍රායෝගික අභියෝග
2 සහ 6 ශ්‍රේණි සඳහා ලබන වසරේ නව විෂයමාලා හඳුන්වා දීමටත්, විභාග කේන්ද්‍රීය අධ්‍යාපනයෙන් මිදුණු නව ක්‍රමවේදයක් සකස් කිරීමටත් රජය සැලසුම් කර තිබේ. විශ්වවිද්‍යාල සඳහා ආචාර්යවරුන් 2,000ක් බඳවා ගැනීමට ද අනුමැතිය ලැබී ඇත.
බිම් මට්ටමේ පවතින පන්ති කාමරයේ ගුරු හිඟයට ස්ථිර විසඳුමක් නොදී, මෙවැනි පුළුල් ප්‍රතිසංස්කරණ සාර්ථක කරගත හැකිද යන්න අධ්‍යාපන ක්ෂේත්‍රයේ මේ වන විට මතුව ඇති ප්‍රධාන සංවාදයයි.
(සටහන - රාධිනි )