ලංකා මෙට්‍රෝ ට්‍රාන්සිට් (LMT) හරහා පොකුරු සමාගම් ක්‍රමයට බස් කර්මාන්තය විනයගත කිරීමේ පියවර
2030 වන විට බස් රථ 500ක ඇණියක් සහ නුවර, ගාල්ල, යාපනය දක්වා සේවාවන් පුළුල් කිරීමේ ඉලක්ක
අවිධිමත් පොදු ප්‍රවාහනය සහ නව වෙනස
ශ්‍රී ලංකාවේ පොදු ප්‍රවාහන ක්ෂේත්‍රය යනු වසර ගණනාවක් තිස්සේ අවිධිමත් හිමිකරුවන් 15,000කට වැඩි පිරිසක් පාලනය කළ, ප්‍රමිතියක් හෝ විනයක් රඳවා ගැනීමට අපහසු වූ ක්ෂේත්‍රයකි. දෛනිකව ධාවනය වන පුද්ගලික බස් රථ 20,000කට ආසන්න ප්‍රමාණයෙන් බහුතරයක් තනි තනි අයිතිකරුවන් හෝ කුලී පදනම මත ධාවනය කරවන්නන් සතුව පැවැති බැවින් එකී පද්ධතිය ප්‍රතිසංස්කරණය කිරීම විශාල අභියෝගයක් විය.
එහෙත්, එම අවිධිමත් මඩගොහොරුවෙන් මිදී "ලංකා මෙට්‍රෝ ට්‍රාන්සිට්" (Lanka Metro Transit) වැඩපිළිවෙළ හරහා නාගරික ප්‍රවාහන පද්ධතියට අලුත් මුහුණුවරක් එක්වෙමින් පවතී. පතුල පහත් (Low-floor) නවීන ඇසී බස් රථ හඳුන්වා දෙමින්, ඩිජිටල් තාක්ෂණයෙන් සන්නද්ධ බස් සේවාවක් රට තුළ ස්ථාපිත කිරීමට මෙහිදී පියවර ගෙන තිබේ.
ඩිජිටල් තාක්ෂණය, සුවපහසුව සහ මගී අත්දැකීම්
ජංගම දුරකථන යෙදවුම් (LMT App), QR සංකේත සහ ස්පර්ශ රහිත ගෙවීම් ක්‍රමවේද හරහා ගාස්තු ගෙවීමේ පහසුකම් මෙම නව බස් සේවාව තුළ ක්‍රියාත්මක වේ. බස් රථය පැමිණෙන වේලාව තත්පරයටම නිවැරදිව දැනගැනීමට මෙන්ම, ඊළඟ බස් නැවතුම්පොළ පිළිබඳව නිවේදනය කෙරෙන ඩිජිටල් පද්ධති ද ඊට ඇතුළත් ය.
ලෝකයේ දියුණු රටවල් වන සිංගප්පූරුව වැනි රාජ්‍යයන්හි ක්‍රියාත්මක වන ප්‍රවාහන ආකෘතියට සමානව, යටිතල පහසුකම් රජය සතුව තබා ගනිමින් පෞද්ගලික මෙහෙයුම් සමාගම් විධිමත් කොන්ත්‍රාත් පදනමකට සම්බන්ධ කර ගැනීමේ ක්‍රමවේදයක් වෙත ශ්‍රී ලංකාව ද යොමු වෙමින් පවතී. මෙය පෞද්ගලික වාහන භාවිතය අඩු කරමින් නාගරික මාර්ග තදබදය පාලනය කිරීමට ද ඉවහල් වන බව පෙන්වා දිය හැකිය.
අනාගත ව්‍යාප්තිය සහ ඉදිරි ඉලක්ක
ලංකා මෙට්‍රෝ ට්‍රාන්සිට් නියමු ව්‍යාපෘතිය යටතේ කොළඹ සහ තදාසන්න ප්‍රදේශ ආවරණය වන පරිදි නව මාර්ග රැසක් හඳුන්වා දී ඇති අතර, මෑතකදී අලුතින් එක්වූ බස් රථ තොගයත් සමඟ බස් ඇණිය තවදුරටත් ශක්තිමත් වී ඇත. ඊට අමතරව, තවත් පතුල පහත් බස් රථ 50ක් මිලදී ගැනීමට කැබිනට් අනුමැතිය හිමිව තිබේ.
රජයේ සැලසුම වන්නේ මෙම වසර අවසන් වන විට කොළඹින් පිටත නුවර, ගාල්ල සහ යාපනය වැනි ප්‍රධාන නගර වෙත ද මෙට්‍රෝ බස් සේවාව ව්‍යාප්ත කිරීමයි. 2030 වසර වන විට බස් රථ 500කින් සමන්විත බස් ඇණියක් නිර්මාණය කරමින් නාගරික ප්‍රවාහනයේ වැඩි ධාරිතාවයක් මෙම ප්‍රමිතීකරණය කරන ලද මෙට්‍රෝ බස් පද්ධතිය වෙත යොමු කිරීම රජයේ ප්‍රධාන ඉලක්කය වී තිබේ.
'' ද ලීඩර් '' යු ටියුබ් නාලිකාව විසින් අද දිනයේ සිට ආරම්භ කර ඇති '' ආරම්බම්'' විශේෂ විශේෂාංගයේ මේ සම්බන්ධයෙන් ධනාත්මක අදහසක් ඉදිරිපත් කර ඇත.
