"ජෝර්ජ් ඕවල්ගේ" ප්‍රසිද්ධ කියමනක් සිහිපත් කරමින් මහජන සම්බන්ධතා සහ සැබෑ ජනමාධ්‍යවේදය අතර වෙනස හෙළි කරයි
කොයි තරම් නීරස වුණත්, කොයි තරම් තිත්ත වුණත්, තිත්ත ඇත්ත ඇති සැටියෙන් පෙන්නලා දීල, සමාජයට සත්‍යය පහදා දීම සැබෑ ජනමාධ්‍යවේදියෙකුගෙ අනුල්ලංඝනීය වගකීම කියල මම දැඩිව විශ්වාස කරනවා. ඒ වගේම සැබෑ ජනමාධ්‍යවේදියෙක් කළ යුත්තේ වර්තමානයේ අද දවසේ අපේම හැසිරීම් නිසා අපි හැමෝගෙම අනාගතය විනාශ විය හැකි ආකාරය ගැන අනතුරු ඇඟවීම.
කොටින්ම සැබෑ (genuine) මාධ්‍යවේදියෙක් විවේචනවලට බයෙන් හෝ ජනප්‍රිය වීම සඳහා හෝ රැල්ලත් (trend එක) එක්ක ගසාගෙන යන පුද්ගලයෙක් නොවිය යුතුයි. සැබෑ ජනමාධ්‍යවේදියා ජනතාවට වඩා ඉදිරියෙන් ගමන් කරමින් ඔවුන්ට මග පෙන්වන පුද්ගලයෙක් විය යුතුයි.
මානව ශිෂ්ඨාචාරය බිහිවෙලා තියෙන්නේ ඒ විදියට. ලෝකය ඉදිරියට ගිහින් තියෙන්නේ ඒ වගේ දිරිය මිනිස්සු කියපු, ලියපු, දේශනා කරපු, මග පෙන්නපු දේවල් නිසා.
කිසියම් මොහොතක මුළු ලෝකයම අදහාගෙන හිටපු මායාකාරී සත්‍යය අසත්‍යයක් කියල පෙන්නලා දීපු බොහෝ දෙනෙකුට අත්වුණ අවාසනාවන්ත ඉරණම මානව ශිෂ්ඨාචාරය පුරාම අපි දැකල තියෙනව. ඔවුන් කියපු දේ සත්‍යයි කියල ලෝකය වටහා ගන්න මොහොත වෙන කොට ඒ බොහෝ දෙනෙක් ජීවතුන් අතරත් නැහැ.
මට මතක් වෙනව ජෝර්ජ් ඕවල් කියපු කතාවක්.
"Journalism is printing what someone else does not want printed; everything else is public relations." - George Orwell
මාධ්‍යකරණය කියන්නේ වෙනත් අයෙක් දකින්න අකමැති දෙයක් ප්‍රකාශයට පත්කිරීම කියල ඔහු කිවුව. ඕවල් කියන විදියට අනිත් කිසිවක් මාධ්‍යවේදය නෙවෙයි; අනිත් සියල්ල මහජන සම්බන්ධතා.
හිතන්න.
(සටහන | සරෝජ් පතිරණ)බීබීසී හිටපු ජ්‍යෙෂ්ඨ සම්පාදක
sarojpathi@gmail.com
(Saroj Pathirana ෆේස්බුක් පිටුවෙන්...)
2026 අගෝස්තු 11
