සදාචාරාත්මක විශ්වාසය අහිමි කරගත් ජනප්‍රියවාදී නායකත්වයේ සැබෑ පැතිකඩ.
ශ්‍රී ලංකා දේශපාලනය තුළ දූෂණයට සහ මත්ද්‍රව්‍ය ජාවාරමට එරෙහිව හඬ නැගූ ප්‍රබල චරිතයක් ලෙස රන්ජන් රාමනායක මහතා කාලයක් පුරා සමාජයේ දැඩි කතාබහට ලක්විය. එහෙත් මෑතකදී ඩුබායි රාජ්‍යයේ සිට පිටුවහල් කරන ලද ප්‍රබල මත්ද්‍රව්‍ය ජාවාරම්කරුවකු ලෙස සැලකෙන ශිරාන් බාසික් සමග ඔහු පැවැත්වූ බව කියන ගනුදෙනු සහ සබඳතා පිළිබඳ හෙළිදරව් වීමත් සමග, ඔහුගේ දේශපාලන ප්‍රතිරූපය ප්‍රශ්න කිරීමට ලක්ව තිබේ.
රන්ජන් රාමනායක චරිතය ටොක්සික් ප්‍රජාව සංකේත්වත් කරන එකක් ලෙස සැලකිය හැකිය. ඔහු පිටතින් දූෂණයට විරුද්ධය. තමන් ස්ථානගත වන පාර්ශ්වයට ප්‍රතිවිරුද්ධ පාර්ශ්වයේ සතුරන් කෙරෙහි අතිශය වෛරී සහගතය. උදාහරණයක් ලෙස, දුමින්ද සිල්වාට මරණ දඬුවම ලබා දුන් විනිසුරුවරියක සමග ඔහු පැවැත්වූ බව කියන දුරකථන සංවාද අතිශය ගැටලු සහගතය. මෑතදී අනුර ජනාධිපතිවරයා අධිකරණය සම්බන්ධයෙන් පැවසූ සුවඳ නො වන වැඩ අතර ප්‍රධාන එකක් ලෙස මෙම දුරකථන සංවාදය සැලකිය හැකිය. එවැනි අය විනිශ්චය විය යුත්තේ දෙවියන් ඉදිරියේ පමණක් නො වේ.
රන්ජන් රාමනායක දූෂිත චරිතයක් වීම ආරම්භ වන්නේ අධිකරණයට ඔහු කරන මැදිහත් වීමෙන් පමණක් නො වේ. ඔහු චරිතයක් බවට පත් වන සිනමා කර්මාන්තයම සාමාන්‍යයෙන් ගත් කල කළු සල්ලි සමග බැඳුණු දූෂිත කලාපයකි. ඊනියා ප්‍රගතිශීලී කලාකරුවන් සහ වාමාංශිකයන් නඩත්තු කරන මෙවැනි කළු සල්ලි කලාපවල රෙද්ද ඉස්සුවොත් මතු වන්නේ ලෝකයම ගඳ ගස්සන අර්ශස් ගුදයකි.
අධිකරණයට අපහාස කිරීම සහ සිරගත වීම
2017 අගෝස්තු 21 වන දින මාධ්‍ය වෙත අදහස් දක්වමින් මෙරට විනිසුරුවරුන්ගෙන් බහුතරයක් දූෂිත බවට රන්ජන් රාමනායක මහතා කළ ප්‍රකාශය ඔහුගේ නෛතික අර්බුදයේ ආරම්භය විය. මෙම ප්‍රකාශය තුළින් අධිකරණය කෙරෙහි ඇති මහජන විශ්වාසය පළුදු වන බව පවසමින් ඉදිරිපත් වූ පෙත්සම් අනුව, නීතිපතිවරයා විසින් ඔහුට එරෙහිව අධිකරණයට අපහාස කිරීමේ චෝදනා ගොනු කරන ලදී. දීර්ඝ නඩු විභාගයකින් අනතුරුව 2021 ජනවාරි 12 වන දින ශ්‍රේෂ්ඨාධිකරණය විසින් ඔහුට වසර 4ක බරපතළ වැඩ සහිත සිරදඬුවමක් නියම කළ අතර, ඒ සමගම ඔහුගේ පාර්ලිමේන්තු මන්ත්‍රී ධූරය සහ සිවිල් අයිතිවාසිකම් ද අහිමි විය.
ජනාධිපති සමාව සහ එහි කොන්දේසි
වසරකට අධික කාලයක් සිරගතව සිටි රන්ජන් රාමනායක මහතාට 2022 අගෝස්තු 26 වන දින එවකට ජනාධිපති රනිල් වික්‍රමසිංහ මහතා විසින් ජනාධිපති සමාවක් ලබා දෙන ලදී. එහෙත් මෙය සාමාන්‍ය පූර්ණ ජනාධිපති සමාවක් (Full Pardon) නොවීය. ආණ්ඩුක්‍රම ව්‍යවස්ථාවේ 34(1)(ඈ) වගන්තිය යටතේ ලබා දුන් එය 'කොන්දේසි සහිත සමාවක්' (Conditional Pardon) විය.
මෙම සමාව ලබා දීමේ ප්‍රධාන කොන්දේසිය වූයේ, තමන් අධිකරණයට කළ අපහාසය සම්බන්ධයෙන් සමාව අයදිමින් සහ නැවත කිසිදු දිනෙක අධිකරණයට අපහාස වන අන්දමේ ප්‍රකාශ සිදු නොකරන බවට පොරොන්දු වෙමින් ශ්‍රේෂ්ඨාධිකරණයට දිවුරුම් ප්‍රකාශයක් ඉදිරිපත් කිරීමයි. ඔහු එම දිවුරුම් ප්‍රකාශය ලබා දීමෙන් පසු නිදහස් කෙරුණු අතර, එතැන් පටන් ඔහු එම කොන්දේසියට අනුගතව කටයුතු කර ඇති බව පෙනෙන්නට තිබේ.
ශිරාන් බාසික් සමග ගනුදෙනු: නවතම ආන්දෝලනය
මෑතකදී ඩුබායිහි සිට ලංකාවට පිටුවහල් කරන ලද මහා පරිමාණ මත්ද්‍රව්‍ය ජාවාරම්කරුවකු සහ පාතාල නායකයෙකු වන ශිරාන් බාසික් සම්බන්ධයෙන් අපරාධ පරීක්ෂණ දෙපාර්තමේන්තුව (CID) පුළුල් විමර්ශනයක් ආරම්භ කර ඇත. මෙම විමර්ශන අතරතුර, රන්ජන් රාමනායක මහතා ඩුබායිහිදී ශිරාන් බාසික් සමග සමීප සබඳතා පැවැත්වූ බවටත්, ඔහුගෙන් විවිධ වරප්‍රසාද හෝ මූල්‍ය ආධාර ලබාගත් බවටත් සමාජ මාධ්‍ය සහ විවිධ පාර්ශ්ව හරහා බරපතළ චෝදනා එල්ල විය. ඊට අදාළ හඬපට සහ ඡායාරූප ද සංසරණය වූ අතර, මෙය මත්ද්‍රව්‍ය විරෝධියෙකු ලෙස පෙනී සිටි රන්ජන්ගේ දේශපාලන ජීවිතයට එල්ල වූ මරු පහරක් විය.
ශිරාන් බාසික් වැනි පාතාල සාමාජිකයෙකු සමග ගනුදෙනු කිරීම සෘජුවම ඔහුගේ 'අධිකරණයට අපහාස කිරීමේ' ජනාධිපති සමාවේ කොන්දේසිය උල්ලංඝනය කිරීමක් ලෙස නීතිය හමුවේ අර්ථකථනය කළ නොහැක. ඒ අනුව, හුදෙක් මෙම සම්බන්ධතාවය මත පමණක් ඔහුගේ පවතින සමාව අවලංගු කිරීම අපහසුය. එහෙත්, මෙමගින් ඔහු නීතියෙන් ගැලවෙන්නේ නැත. ශිරාන් බාසික්ගේ මත්ද්‍රව්‍ය ජාවාරමෙන් උපයාගත් මුදල් රන්ජන් රාමනායක මහතා ලබාගෙන ඇත්නම් හෝ ඔහුට නවාතැන්/ආරක්ෂාව සැපයීමට උදව් කර ඇත්නම්, එය මුදල් විශුද්ධිකරණ පනත (Money Laundering Act) යටතේ සහ අපරාධකරුවන්ට ආධාර අනුබල දීම යටතේ සම්පූර්ණයෙන්ම නව අපරාධයකි. පොලිසිය මෙම කරුණු ඔප්පු කළහොත්, පැරණි නඩුවෙන් නොව, නව නඩුවක් යටතේ ඔහුට නැවතත් සිරගත වීමට සිදුවනු ඇත.
දේශපාලන ඛේදවාචකය
රන්ජන් රාමනායක යනු මෙරට දූෂිත පද්ධතියට එරෙහිව හඬ නැගූ, ජනතා ආදරය දිනාගත් චරිතයකි. ඔහුගේ නිදහස වෙනුවෙන් ලක්ෂ ගණනක් ජනතාව පෙනී සිටියහ. එහෙත්, සමාජය ගිලගන්නා මත්ද්‍රව්‍ය ජාලයේ ප්‍රධානියෙකු සමග ඔහු හොර රහසේ ගනුදෙනු කළේ නම් (ඔහු එය ප්‍රතික්ෂේප කරයි), එය ඔහු කෙරෙහි ජනතාව තැබූ දැවැන්ත විශ්වාසය කඩ කිරීමකි. නීතියේ සිදුරු තුළින් ජනාධිපති සමාව ආරක්ෂා කර ගැනීමට ඔහුට හැකි වුවද, සදාචාරාත්මක මහජන අධිකරණය ඉදිරියේ ඔහු මේ වන විටත් බරපතළ දේශපාලන දඬුවමකට ලක්වෙමින් සිටී. මෙම චෝදනා සම්බන්ධයෙන් ස්වාධීන සහ විනිවිද පෙනෙන පොලිස් පරීක්ෂණයක් කඩිනමින් සිදුවීම මුළුමහත් සමාජයේම අපේක්ෂාවයි. එය මෙවැනි ටොක්සික් නායකයන්ගේ කතා හා ක්‍රියා අතර සම්බන්ධය අධ්‍යයනය කිරීමට ඉතා වැදගත්ය.
(සටහන | අජිත් පැරකුම් ජයසිංහ)
Creative Content Consultants
ajithperakum@gmail.com
උපුටා ගැනීම - praja.lk
