අධිකරණයේ ස්වාධීනත්වය, යුක්තියේ අභිලාෂය සහ විජයානන්ද - ගාමිණී වියන්ගොඩ දැක්වූ සංවාදාත්මක අදහස්
ඊයේ ජනාධිපතිතුමා නීතිඥ සංගමය එක්ක කරපු කතාවක් වෛරල් වෙලා යනවා. ඒකෙ තියෙන එකම එක වාක්‍යයක් මගේ අවධානයට ලක්වුණා. මේ ඒ ගැන...
මීට කලින් අනුර ජනාධිපතිතුමා ජනාධිපතිවරණය දිනලා කියපු 'අපි දිනුවා කියන්නේ මිනිස්සු වෙනස් වෙලා තියනවා කියන එක. මිනිස්සු වෙනස් වුනේ නැත්නම් අපිට දිනන්න වෙන්නේ නැහැ. ඒ නිසා අනාගතයේ අපිව පරද්දන්න ඕනි නම් ඒ ඕනෑම කෙනෙක්ට අපිට වඩා හොඳ වෙන්න වෙනවා' කියන වැකිය තමයි එතුමාගෙන් මම අහපු හොඳම වැකිය. ඒක ටිකක් දිග වාක්‍යයක්.
ඊයේ කිව්ව වචන දෙකක තුනක වාක්‍යය තමයි 'අපි නොකලොත් මේක ආයේ කවුද කරන්නේ?' කියන එක. මට නම් මේක නිකම් පරම සත්‍යයක් වගේ එකක්. ඒක ඇත්තම ඇත්ත. ඔය වාක්‍යය එතුමා කිව්වේ පාස්කු මහ නඩුව සම්බන්දයෙන්.
තනි පුද්ගලයෙක් විදියට ඒ ප්‍රකාශය ගත්තත් දේශපාලන ව්‍යාපාරයක නියෝජනයක් හැටියට ඒ ප්‍රකාශය ගත්තත් ඒ වාක්‍යයේ යම් වුවමනාවක්, ඒ වුවමනාව වෙනුවෙන් කැපවීමක් දකින්නට ලැබුණ. සරල වචනයකින් කිව්වොත් 'ඕනිකමක්' දකින්න තිබ්බ.
පාස්කු වින්දිතයින් වෙනුවෙන් සාධාරණය කියන්නේ ඉතිහාසයේ අපි හැමෝම උරමත තියෙන බරක්. ඒ බරින් නිදහස් වෙන්න අපි හැමෝමට ඕනි. ඒක එතුමාගේ ප්‍රකාශයේ දකින්නට තිබ්බ.
ඒ යුක්තිය සහ සාධාරණය වෙනුවෙන් කැපකරන්න සිද්දවෙන්නේ තමන්ගේ තනතුර නම් ඒ සඳහාත් සූදානම් කියල එතුමා වැඩිදුරටත් කිව්වා.
අනික් හැම වෘත්තීය සමිතියක් වගේම නීතිඥ සංගමයත් වැඩි වාද විවාද සද්ද බද්ද නැතුව එතන දොරෙන් එළියට එන්නේ මෙන්න මේ සත්‍යය නිසා. එතුමා නියෝජනය කරන දේ තියෙන ඓතිහාසික බර අන් සියලු දේට වඩා වැඩි හින්ද.
එතුමත් දන්නවා අපිත් දන්නවා නීතිඥ සංගමයත් දන්නවා සුංබුංලත් දන්නවා ආයේ මේ පාස්කු යුක්තිය වෙනුවෙන්, ඒ යුක්තිය පසිඳලීම වෙනුවෙන් වෙන කවුරුත් නැහැ කියල. ඇත්තටම කවුරුත්ම නැහැ. වෙන කවුරු ආවත් මේ නඩුව අල කරනවා නියතයි. එයාලට ඕනි නැහැ ඇත්ත. මොකද ඇත්ත තමන් පැත්තට හැරෙන්න නියමිත හින්ද.
එතුමා මතක්කරලා දුන්නේ අලුත් දෙයක් නෙවෙයි අපි හැමදාම හැම වෙලේම දන්නා දෙය. හැබැයි බර වැඩිම දෙය.
(ආචාර්ය මහේෂ් හපුගොඩ)
සමාජ හා දේශපාලන විශ්ලේෂක
hapugoda@gmail.com
(Mahesh Hapugoda ගේ ෆේස්බුක් පිටුවෙන්...)
