රාජ්‍ය බුද්ධි සේවයේ භූමිකාව, සාක්ෂිවල පරස්පරතා සහ සුළුතර විනිසුරු තීන්දුවේ මතභේදාත්මක නෛතික නිරීක්ෂණ
ඓතිහාසික නඩු තීන්දුව සහ පැනවූ දඬුවම්
2019 පාස්කු ඉරිදා ත්‍රස්ත ප්‍රහාරය වළක්වා ගැනීමට කටයුතු නොකිරීම සහ සාපරාධී නොතකා හැරීම සම්බන්ධයෙන් ගොනුකර තිබූ චෝදනා 854ටම හිටපු පොලිස්පති පූජිත ජයසුන්දර සහ හිටපු ආරක්ෂක අමාත්‍යාංශ ලේකම් හේමසිරි ප්‍රනාන්දු වරදකරුවන් කරමින් ත්‍රිපුද්ගල මහාධිකරණ විනිසුරු මඩුල්ල විසින් නඩු තීන්දුව ප්‍රකාශයට පත් කරන ලදී.
මරණ දඬුවම සහ සිරදඬුවම්:
පුද්ගලයින් 268 දෙනෙකුගේ මනුෂ්‍ය ඝාතනවලට ආධාර අනුබල දීමේ චෝදනාවට දෙදෙනාටම මරණ දඬුවම නියම විය. මීට අමතරව, මිනීමැරීමට තැත් කිරීම් 586කට ආධාර අනුබල දීමේ චෝදනාවට එක් එක් චෝදනාවට අවුරුදු 12 බැගින් ගෙවී යන පරිදි බරපතල වැඩ සහිත සිරදඬුවම් සහ දඩ මුදල් නියම කෙරිණි.
වන්දි නියම නොකිරීම:
ශ්‍රේෂ්ඨාධිකරණය මගින් මූලික ඓතිවාසිකම් පෙත්සම්වලදී වන්දි නියම කර ඇති බැවින් සහ වෙනම සිවිල් නඩු විභාග වන බැවින් මෙම අපරාධ නඩුවේදී වෙනම වන්දි නියම කිරීමක් සිදු නොවිණි.
විනිසුරු මඩුල්ලේ බහුතර සහ සුළුතර මතය
මෙම නඩු තීන්දුව ත්‍රිපුද්ගල මහාධිකරණ විනිසුරු මඩුල්ලේ 2:1ක බහුතර ජන්දයෙන් ප්‍රකාශයට පත් කෙරිණි. සභාපති විනිසුරු ප්‍රියන්ත ලියනගේ සහ විනිසුරු තිලකරත්න බණ්ඩාර ගේ බහුතර මතය අනුව විත්තිකරුවන් වරදකරුවන් වූ අතර, විනිසුරු විරාජ් වීරසූර්ය සුළුතර තීන්දුව ප්‍රකාශ කරමින් විත්තිකරුවන් දෙදෙනාම නිදොස් කොට නිදහස් කළ යුතු බවට නිගමනය කළේය.
දණ්ඩ සංග්‍රහයේ 102, 103 (පැහැරහැරීම මගින් ආධාර අනුබල දීම), 296 (මනුෂ්‍ය ඝාතනය) සහ 300 (මිනීමැරීමට තැත් කිරීම) යන වගන්ති පදනම් කරගනිමින් බහුතර තීන්දුව ලබාදී තිබුණි. ප්‍රහාරයට පෙර ලැබී තිබූ නිශ්චිත බද්ධි තොරතුරු (අප්‍රේල් 20 වනදා යැවූ WhatsApp පණිවිඩය ඇතුළුව) හමුවේ සිය බලතල පාවිච්චි නොකිරීම සාපරාධී නොතකා හැරීමක් ලෙස සලකන ලදී. ලැබෙන ලිපිවල 'FNA' (For Necessary Action) යනුවෙන් සටහන් කර පහළ නිලධාරීන්ට යැවීමෙන් පමණක් ඉහළ නිලධාරීන්ට සිය වගකීමෙන් මිදිය නොහැකි බව බහුතර තීන්දුවේ දැක්විණි.
සුළුතර තීන්දුව සහ මතභේදාත්මක සාක්ෂි
විනිසුරු විරාජ් වීරසූර්ය ගේ සුළුතර තීන්දුවේදී එවකට රාජ්‍ය බුද්ධි සේවයේ (SIS) ප්‍රධානී නිලන්ත ජයවර්ධන ගේ සාක්ෂි සහ හැසිරීම් රටාව දැඩි ලෙස විවේචනයට ලක් විය. නිලන්ත ජයවර්ධන තමන්ගේ වගකීම් වෙනත් අය පිට පැටවීමට උත්සාහ කර ඇති බවත්, ඔහුගේ සාක්ෂි විශ්වාසදායක නොවන බවත් සුළුතර තීන්දුවේ සඳහන් විය. එමෙන්ම, ආරම්භයේ සිටම විමර්ශන ක්‍රියාවලිය පූජිත සහ හේමසිරි යන දෙදෙනා පමණක් ඉලක්ක කරගනිමින් පක්ෂපාතී ලෙස සිදුව ඇති බවට ද එහිදී ප්‍රශ්න කෙරිණි.
ජ්‍යෙෂ්ඨ මාධ්‍යවේදී සුනන්ද දේශප්‍රිය ඇතුළු විචාරකයින් ද පෙන්වා දෙන්නේ පාස්කු කොමිෂන් සභා වාර්තා තුළින් පවා විවේචනයට ලක්වූ කරුණු සහ නිලන්ත ජයවර්ධන ට එරෙහිව නීතිමය පියවර ගන්නා ලෙස අධිකරණමය නිරීක්ෂණ පැවති පසුබිමක, මෙම සාක්ෂි පදනම් කරගැනීම පිළිබඳව පුළුල් කතිකාවක් නිර්මාණය වී ඇති බවයි.
විත්ති පාර්ශ්වයේ ප්‍රකාශ සහ ඉදිරි අභියාචනා
නඩු තීන්දුවෙන් අනතුරුව අදහස් දැක්වූ හිටපු පොලිස්පති පූජිත ජයසුන්දර ප්‍රකාශ කළේ තමන් මිනීමරුවෙකු නොවන බවත්, හිතට එකඟව කටයුතු කළද තමන්ට විශාල අසාධාරණයක් සිදුවූ බවත්ය. හිටපු ආරක්ෂක ලේකම් හේමසිරි ප්‍රනාන්දු සඳහන් කළේ එවකට ජනාධිපති මෛත්‍රීපාල සිරිසේන ගේ උපදෙස් මත තමන් කටයුතු කළ බවත්, බුද්ධි අංශ මගින් නිසි ලෙස තොරතුරු ලබා නොදුන් බවත්ය.
මෙම මහාධිකරණ තීන්දුවට එරෙහිව ශ්‍රේෂ්ඨාධිකරණය හමුවේ අභියාචනයක් ඉදිරිපත් කිරීමට විත්ති පාර්ශ්වයේ නීතිඥ මණ්ඩලය පියවර ගනිමින් සිටියි.
