* පක්ෂ අභ්‍යන්තර ප්‍රජාතන්ත්‍රවාදය, පාසල් පද්ධතියේ වෙනස සහ වත්මන් ජනවරම ගැන TV සුප්‍රීම් හිදී කළ දීර්ඝ විවරණය
තරුණ නියෝජනය සහ ප්‍රජාතන්ත්‍රවාදී අවකාශය
දේශපාලන තීන්දු ගැනීමේ ක්‍රියාවලියෙන් සහ ප්‍රජාතන්ත්‍රවාදී ව්‍යුහයෙන් තරුණ පරපුර ඈත් කර තැබුවහොත් සමාජ නොසන්සුන්තාවන් සහ අරගල නිර්මාණය වීම නොවැළැක්විය හැකි තත්ත්වයක් බව හිටපු අමාත්‍ය ඉම්තියාස් බාකීර් මාකාර් පෙන්වා දෙයි.
TV සුප්‍රීම් නාලිකාවේ විකාශය වූ ‘ඇත්ත කියන්න’ සජීවී දේශපාලන සංවාදයට එක්වෙමින් ඔහු අවධාරණය කළේ, තරුණ හඬ යටපත් කිරීමට උත්සාහ දැරීම වෙනුවට ව්‍යවස්ථාදායකය ඇතුළු දේශපාලන නියෝජිත ආයතන තුළ තරුණයින් සඳහා නිශ්චිත ඉඩකඩක් වෙන් කිරීම අත්‍යවශ්‍ය කරුණක් බවයි. පාර්ලිමේන්තුව, පළාත් සභා සහ පළාත් පාලන ආයතන නියෝජනය සඳහා අවම වශයෙන් සියයට 25ක තරුණ කෝටාවක් වෙන් විය යුතු බවට තමන් පාර්ලිමේන්තුවට පෞද්ගලික මන්ත්‍රී යෝජනාවක් ලෙස ද ඉදිරිපත් කළ අතීතය මෙහිදී ඔහු සිහිපත් කළේය.
පක්ෂ අභ්‍යන්තර ප්‍රජාතන්ත්‍රවාදයේ වැදගත්කම
දේශපාලන පක්ෂ තුළ පවතින අභ්‍යන්තර ප්‍රජාතන්ත්‍රවාදය ගිලිහී යාම රටක පිරිහීමට ප්‍රධාන හේතුවක් බව පැවසූ බාකීර් මාකාර්, පක්ෂ නායකත්වයන් දිගුකාලීනව එක් තැනක කේන්ද්‍රගත වීම වෙනුවට ස්වාභාවික නායකයින් බිහිවීමේ මාවත විවෘත විය යුතු බව සඳහන් කළේය.
පක්ෂ ක්‍රියාකාරීන්ගේ සැබෑ කැමැත්ත සහ ඡන්දය මත සංවිධායකවරුන් හා නිලධාරීන් පත් කිරීමේ ක්‍රමවේදය අභාවයට යාම හේතුවෙන් දේශපාලනය මුදල් බලයට සහ බාහිර බලවේගවල බලපෑමට නතුවීමේ අවදානමක් මතුවන බව හෙතෙම පෙන්වා දුන්නේය. ඒ සඳහා අවශ්‍ය නම් පක්ෂ අභ්‍යන්තර ප්‍රජාතන්ත්‍රවාදය සුරක්ෂිත කිරීම වෙනුවෙන් නීතිමය රාමුවක් සකස් කිරීමේ අවශ්‍යතාව ද ඔහු මතු කළේය.
පොදු ජනතා අවශ්‍යතා වෙනුවෙන් ආර්ථික දැක්ම
ජේ. ආර්. ජයවර්ධන සහ ආර්. ප්‍රේමදාස යන හිටපු ජනාධිපතිවරුන්ගේ යුගයන් පිළිබඳව අදහස් දක්වමින් ඔහු ප්‍රකාශ කළේ, ආර්ථික අර්බුදයකින් රට මුදාගැනීමට දැක්මක් තිබීම මෙන්ම එම ප්‍රතිලාභ බිම් මට්ටමේ දුගී ජනතාව දක්වා ගලා යාම තහවුරු කිරීම ද නායකයෙකුගේ වගකීමක් බවයි.
ජනසවිය සහ නිවාස දස ලක්ෂයේ වැඩසටහන් හරහා සාමාන්‍ය මිනිසාගේ ආර්ථිකය සහ ආත්ම අභිමානය නංවාලීමට ගත් පියවර සිහිපත් කළ හිටපු අමාත්‍යවරයා, සංකීර්ණ ආර්ථික න්‍යායන්ට වඩා බිම් මට්ටමේ පවුලක ආදායම ස්ථාවර කිරීම ප්‍රායෝගික සංවර්ධනය සඳහා ඉවහල් වන බව පෙන්වා දුන්නේය.
බෙදුම්වාදී දේශපාලනය වෙනුවට ජාතික අනන්‍යතාව
රටක් වශයෙන් ඉදිරියට යාමට නම් දශක ගණනාවක් මුළුල්ලේ රට තුළ ක්‍රියාත්මක වූ ජාතිවාදී සහ ආගම්වාදී බෙදීම් මුලිනුපුටා දැමිය යුතු බව ඉම්තියාස් බාකීර් මාකාර් අවධාරණය කළේය.
එම ජාතික අනන්‍යතාවය ගොඩනැගීමේ මූලික පදනම පාසලෙන් ආරම්භ විය යුතු බවත්, පාසල් පද්ධතිය තුළ සියලු ජාතීන්ට හා ආගම්වලට අයත් දරුවන්ට එකට එක්වී සහජීවනය අත්විඳීමට අවකාශය සැලසීමෙන් බෙදුම්වාදී විසබීජ වපුරන පාර්ශ්වයන්ගේ උත්සාහයන් පරාජය කළ හැකි බවත් ඔහු සඳහන් කළේය. බහුතර ප්‍රජාවගේ සංස්කෘතික පදනමට ගරු කරමින්ම සියලු ජන කොටස් එකමුතුව ක්‍රියාකිරීම ශ්‍රී ලංකාවේ ඉදිරි ගමනට අත්‍යවශ්‍ය වන බව ඔහුගේ අදහස විය.
වත්මන් දේශපාලන පරිවර්තනය සහ ජනතා බලාපොරොත්තු
වත්මන් දේශපාලන සන්දර්භය සහ ජනාධිපති අනුර කුමාර දිසානායක ප්‍රමුඛ නව රජය පිළිබඳව විමසූ අවස්ථාවේදී ඔහු කියා සිටියේ, පසුගිය ජනතා අරගලය ඔස්සේ ඉස්මතු වූ දූෂණයෙන් තොර රටක්, මානව හිමිකම් සහ සමාජ සාධාරණත්වය සුරක්ෂිත කිරීමේ ජනතා අපේක්ෂාවන් ඉටු කිරීමේ බරපතළ වගකීමක් නව නායකත්වය වෙත පැවරී ඇති බවයි.
පක්ෂ දේශපාලනයෙන් පූර්ණ වශයෙන් ඉවත්ව සිටින ස්වාධීන පුරවැසියෙකු ලෙස, රටට යහපතක් වන සහ ජනතා අපේක්ෂා ඉටුවන ගමනක් සාර්ථක කරගැනීමට වත්මන් පරිපාලනයට ශක්තිය ලැබේවායි තමන් ප්‍රාර්ථනා කරන බව ඔහු වැඩිදුරටත් කියා සිටියේය.
වැඩිදුර කියවීම සහ වීඩියෝ නැරඹීම සඳහා:
TV Supreme 'ඇත්ත කියන්න' වැඩසටහනේ සම්පූර්ණ වීඩියෝව නරඹන්න.
"ඇත්ත කියන්න" දේශපාලන වැඩසටහන TV සුප්‍රීම් ඔස්සේ සතියේ සෑම සඳුදා දිනකම රාත්‍රී 9.30ට සජීවී ලෙස විකාශය කෙරෙන අතට ඊට සමගාමිව ඩයලොග් TV (12 ) හා පියෝ TV ( 122) නාලිකා ඔස්සේ විකාශය වේ. මෙම වැඩසටහන නිෂ්පාදනය කරන්නේ මෝක්ෂ සඳකැන් විසින් වන අතර ඒ ඉදිරිපත් කරන්නේ නිමේෂ් විජේසූරිය, මාධවී ජයවික්‍රම සහ චින්තක තෙන්නකෝන් විසිනි.