19 හැවිරිදි ලෝයිඩ් මාටින් (LIoyd Martin) ලන්ඩන් මැරතන් තරගයේදී මෙසේ ඉතිහාසගත වූයේ මේ රෝගයේ ඉගෙනීමේ ආබාධයෙන් පෙළෙන්නන්ගේ අංශයෙන්.
වේල්සයේ කාඩිෆ් නුවර පදිංචි පවුලක මේ දරුවා ලන්ඩන් මැරතන් තරගය සම්පූර්ණ කළේ ඔහුගේ මඟ පෙන්වන්නා ලෙස කටයුතු කරමින් සිටි ඔහුගේ මවත් සමග.
ලෝයිඩ් වෙනුවෙන් මේ අභියෝගය නිර්මාණය කළ ගිනස් ලෝක වාර්තා ආයතනය තරගය අවසානයේදී ඔහුට එහි සහතිකය පිරිනැමුවා.
“ලෝයිඩ්ගේ වචනවලින්, මෙය ඔහුගේ සිහිනය සැබෑ වීමක්” යැයි ඔහුගේ මව වන 54 හැවිරිදි කෙරී හූපර් (Ceri Hooper) පවසනවා.
“ඔබ ඔබේ මනස යම් දෙයක් වෙනුවෙන් ඇත්තටම යොමු කළොත්, ඔ්නෑම දෙයක් කරන්න පුළුවනි” යනුවෙන් ඇය කීවා. “ටිකක් මහන්සි වුනොත් ඔබට ඒ ඉලක්කයට යා හැකියි.”
බුද්ධිය දුබලතාව අංශයෙන් මැරතන් තරගයක් සම්පූර්ණයෙන්ම ධාවනය කළ ළාබලතම පුද්ගලයා වන්නේ ලෝයිඩ්.
“එය ඇත්ටම විස්මිතයි” මව කියා සිටියා. “ඔහු අඛණ්ඩව සැතපුම් 14ක් (කිලෝමීටර් 22.5) දිවුවා. එය ඔහු මෙතෙක් දුවලා තියෙන වැඩිම දුර යි. ඊට පස්සෙ එයා ටික දුරක් ඇවිද්දා. නමුත් ඔහු විශිෂ්ට ධාවනයක යෙදුනා.”
“තරගය නැරඹූ සෙනඟ එයාව උද්යෝගිමත් කරමින් අත්පුඩි ගසා එයාට ‘චියර්’ කළා. ඒක අමාරු කාර්යයක් වුනත් අපි ඒක සාර්ථකව ඉටු කළා.”
ඩවුන් සින්ඩ්‍රෝම රෝගයෙන් පෙළෙන පුද්ගලයන්ට ලෝයිඩ්ගේ මේ ජයග්‍රාහී ක්‍රියාව වැදගත් වන බව ද කෙරී පෙන්වා දුන්නා.
“තරගයේ අවසන් රේඛාව පසුකළායින් පස්සෙ අපි ගොඩක් කතා කළේ නැහැ” මව සඳහන් කළා. “අපි දෙන්නම අඬන්න පටන් ගත්තා.”
ලෝයිඩ් ට හොඳන් ම ගැලපෙන පුහුණුකරුවෙකි කෙරී හූපර්. මක්නිසාද යත්, ඇය නව යොවුන් වියේ සිට ම වේල්සය නියෝජනය කරමින් රට හරහා දිවීම සහ ධාවන පථ තරගවලට සහභාගි වී තිබෙන නිසා.
ඇය ලන්ඩන් මැරතන් තරගය සිවු වතාවක් ධාවනය කර ඇති අතර බොස්ටන් හා චිකාගෝ තරග ද අවසන් කර තිබෙනවා.
ලෝයිඩ්ව මාස පහකින් මැරතන් තරගයකට සූදානම් කිරීම අභියෝගයක් වුනා.
ඔහු උද්‍යානවල දිවීම් 30ක් කර තිබුනත්, නත්තල එළඹෙන තුරුම ඔහුගේ සතිපතා කිලෝ මීටර් 5 (සැතපුම් 3) දිවීම ඔහු එතෙක් සම්පූර්ණ කර තිබූ වැඩිම දුර ප්‍රමාණය බවට පත්ව තිබුනා.
පැය ගණනාවක් එක දිගට දිවීමට සිදුවන දුෂ්කර ක්‍රියාවට ලෝයිඩ්ව සූදානම් කිරීම පිණිස සතිපතා දිගු දිවීමක් ඇතුළු නිශ්චිත පුහුණු සැලැස්මක් නිර්මාණය කිරීමට කෙරී ට සිදුවුනා. Special Olympics Great Britain සංවිධානය ලෝයිඩ් ට ලන්ඩන් මැරතන් තරගයට සහභාගි වීමේ අවස්ථාවක් ලබා ගැනීමට උපකාර කළා. ඔහු එම සංවිධානයේ ජිම්නාස්ටික් හා පාපන්දු ක්‍රීඩකයෙකු ද වනවා.
ලන්ඩන් මැරතන් තරගය ධාවනය කළ තෙවැනි වේල්ස් විශේෂ ඔලිම්පික් මලල ක්‍රීඩකයා වන්නේ ද ලෝයිඩ් මාටින්.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
