මේ අනුව, ‘ඒ’ කොටසෙන් ‘සුපිරි හතර’ වටයට සුදුසුකම් ලැබූ මේ කණ්ඩායම් දෙක සැප්තැම්බර් 21 වැනිදා ඩුබායි ජාත්‍යන්තර ක්‍රිකට් ක්‍රීඩාංගණයේදී නැවත මුණගැසෙනවා.
එක්සත් අරාබි එමීර් රාජ්‍යය කණ්ඩායම සමග ඊයේ ඩුබායි හි පැවති තරගය ආරම්භ වුනේ පැයක් ප්‍රමාද වෙමින්. පමා වී තරගය ඇරඹුනේ තරග තීරක ඇන්ඩි පයික්‍රොෆ්ට් ක්‍රීඩක අතට අතදීමේ මතභේදාත්මක සිදුවීම ගැන පාකිස්තානයෙන් සමාව ඉල්ලීමෙන් පසුව. පාකිස්තාන ක්‍රීඩකයින් තරගය සඳහා පෙනී සිටියේ ඉන්පසුව.
තරගයට ක්‍රීඩා කිරීම පිණිස පාකිස්තාන ක්‍රිකට් මණ්ඩලයේ (PCB) සභාපති මෝසින් නක්විගෙන් අනුමැතිය ලැබෙන තෙක් පාකිස්තාන කණ්ඩායම ඔවුන්ගේ හෝටලයේ රැඳී සිටියා.
තරගයේ පළමු පන්දුව යැවීමට මිනිත්තු කිහිපයකට පෙර PCBය නිවේදනයක් හා ශබ්ද නොවන වීඩියෝවක් නිකුත් කළ අතර පයික්‍රොෆ්ට් පාකිස්තාන නායක සල්මාන් අලි අඝා සහ කණ්ඩායම් කළමනාකරු නවීඩ් අක්රම් චීමා සමග කතාබහක නිරතව සිටින අයුරු එයින් දිස්වුනා.
සිම්බාබ්වේ ජාතික තරග තීරක පයික්‍රොෆ්ට් ඉන්දියා තරගයේ ඇතිවූ සිද්ධිය සම්බන්ධයෙන් සල්මාන්ගෙන් සමාව ඉල්ලන අයුරු එම වීඩියෝවෙන් දැක්වෙන බව PCBය ප්‍රකාශ කළා.
“ජාත්‍යන්තර ක්‍රිකට් කවුන්සලයේ (ICC) තරග තීරක ඇන්ඩි පයික්‍රොෆ්ට් පාකිස්තාන ක්‍රිකට් කණ්ඩායමේ කළමනාකරු හා නායකයාගෙන් සමාව ඉල්ලා තිබෙනවා”
යනුවෙන් PCBය ඔවුන්ගේ නිවේදනයෙන් කියා සිටියා. “ඉන්දියාව හා පාකිස්තානය අතර පැවති තරගයේදී දෙපිලේ නායකයින් අතට අත දීම ඇන්ඩි පයික්‍රොෆ්ට් විසින් වළක්වා තිබුනා. පයික්‍රොෆ්ට්ගේ මේ ක්‍රියාවට පාකිස්තාන ක්‍රිකට් මණ්ඩලය දැඩි ප්‍රතිචාර දක්වා තිබෙනවා.”
“සැප්තැම්බර් 14 සිදුවීම ප්‍රමාණවත් ලෙස සන්නිවේදනය නොකිරීමේ ප්‍රතිඵලයක් ලෙස හඳුන්වමින් පයික්‍රොෆ්ට් ඒ වෙනුවෙන් සමාව ඉල්ලා තිබෙනවා. එදින සිදුවූ විනය පටිපාටිය උල්ලංඝනය වීම සම්බන්ධයෙන් පරීක්ෂණයක් පැවැත්වීමට ICCය කැමැත්ත පළකර තිබෙනවා.”
තරගාවලියේ විනිසුරු මඬුල්ලෙන් පයික්‍රොෆ්ට් ඉවත් කරන ලෙසට ඉල්ලා තිබූ PCBය, එසේ නොකළහොත් පාකිස්තානය තරගාවලියෙන් ඉවත් වන බවට වක්‍රාකාරයෙන් තර්ජනය කර තිබුණා.
ඇන්ඩි පයික්‍රොෆ්ට්
PCBයට අනුව පයික්‍රොෆ්ට් ට එරෙහිව ICCය කටයුතු කර තිබෙන්නේ එක්සත් අරාබි එමීර් රාජ්‍යය සමග තරගය ආරම්භ වීමට නියමිතව තිබූ වේලාවට මිනිත්තු 15කට පසුව පමණයි. එහිදී ඔවුන් පයික්‍රොෆ්ට්ගෙන් සමාව ඉල්ලීමක් ලබා ගෙන ඇත්තේ ඔහුට තරග තීරක ලෙස තවදුරටත් කටයුතු කිරීමට අවසර ලබා දෙමින්. තරගය පැයක් ප්‍රමාද වී ආරම්භ වීමට හේතුවූයේ පයික්‍රොෆ්ට්ගෙන් සමාව ලබා ගැනීමේ පරක්කුවයි.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
