ලකුණු 172ක් හඹා යාමේදී ඉන්දියාවේ අභිශේක් ෂර්මා වික්‍රමාන්විත පිතිහරඹයක නියැලෙමින් පන්දු 39කින් ලකුණු 74ක් වාර්තා කළා. ඔහුගේ ඉනිමට හයේ පහර 5ක් සහ හතරේ පහර 6ක් ඇතුළත්ව තිබුනා. ෂර්මා අර්ධ ශතකයට පිවිසෙන විට මුහුණ දී තිබුනේ පන්දු 24කට පමණයි.
ෂර්මා ට මනා සහයෝගයක් ලබා දුන්නේ පන්දු 28කින් ලකුණු 47ක් රැස් කළ ෂුබ්මන් ගිල්. මේ ආරම්භක පිතිකරුවන් දෙදෙනා ලකුණු සියයකට වැඩි සබඳතාවක් ගොඩනැගුවේ ඉන්දියාව ට එරෙහිව දිගින් දිගටම පරාද වන පාකිස්තානයේ ඉරණම නැවතත් තහවුරු කරමින්. ෂර්මා සහ ගිල්ගේ අවධානය බිඳීමේ අරමුණින් ඔවුන්ට ෂහීන් අෆ්රිඩි සහ හැරිස් රවු‌ෆ් නොසරුප් බස් කියා සිටිය ද ඒවාට ඔබින අයුරින් පිළිතුරු දීමට එම පිතිකරුවන් දෙදෙනා සමත් වුණා.
ඊට පෙර, පාකිස්තාන ආරම්භක පිතිකරු සහිබ්සාඩා ෆර්හාන් (58) ඔහුගේ කණ්ඩායම වෙනුවෙන් වැඩිම ලකුණු ලබා ගත් අතර පාකිස්තානය කඩුලු 5ක් දැවී ලකුණු 171ක් සටහන් කළා.
ඉන්දියාව වෙනුවෙන් ශිවාම් ඩූබ් තීරණාත්මක කඩුලු දෙකක් ලබා ගත්තා.
දෙපිල අතර මීට පෙර පැවති ‘ඒ’ කොටසේ තරගයේ මෙන් ම ඊයේ තරගයේදීත් කණ්ඩායම් දෙකේ ක්‍රීඩකයන් අතර අතට අත දීමක් සිදුවුනේ නැහැ.
