2023 වසරේ මන්චි ජාතික වොලිබෝල් ශූරතාවලියේ සුපර් ලීග් ශූරයින් බවට පත්වුනේ ශ්‍රී ලංකා යුද හමුදාව. ශූරියන් ශ්‍රී ලංකා ගුවන් හමුදාවෙන්.
ශ්‍රී ලංකා යුද හමුදාවේ කාන්තා වොලිබෝල් කණ්ඩායම ද දස්කම් ප්‍රදර්ශනය කරමින් සුපර් ලීග් අනුශූරියන් බවට පත්වීම විශේෂත්වයක්. ලංකා විදුලිබල මණ්ඩලය අනුශූරයන් වුනා.
ආධුනික වයස අවුරුදු 25න් පහළ පිරිමි ශූරතාව වයඹ පළාතේ සාන්ත ජෝසප් වාස් ක්‍රීඩා සමාජය හිමිකර ගත් අතර කාන්තා ශූරතාව සබරගමුව පළාතේ හයිඩ්‍රාමනි ක්‍රීඩා සමාජය දිනා ගත්තා. සබරගමුව පළාතේ රාජසිංහ ක්‍රීඩා සමාජය හා නැගෙනහිර පළාතේ බිටුලින්ක් ක්‍රීඩා සමාජය එම අංශයේ පිළිවෙලින් අනුශූරයන් හා අනුශූරියන් බවට පත්වුනා.
කොළඹ ජාතික තරුණ සේවා මධ්‍යස්ථාන ගෘහස්ථ ක්‍රීඩාංගණයේදී පැවති සුපර් ලීග් පිරිමි අවසාන තරගයේදී යුද හමුදාව විසින් ලංකා විදුලිබල මණ්ඩලයේ කණ්ඩායම පරාජය කළේ වට 3-1ක් වශයෙන්. තියුණු මුහුණුවරකින් පැවති තරගයේ පළමු වට දෙක ලකුණු 25-22ක් හා 25-13ක් ලෙසින් ජය ගත් යුද හමුදාව තෙවැනි වටය ලකුණු 18-25කින් පරාජය වුනා. එහෙත් වට පහකින් සමන්විත තරගයේ සිවුවැනි වටය 25-19කින් ජයග්‍රහණය කරමින් ශූරතාව හිමිකර ගැනීමට යුද හමුදා ක්‍රීඩකයන් සමත් වුනා. වැඩියෙන්ම වටිනා ක්‍රීඩකයා ලෙස නම් කෙරුනේ යුද හමුදාවේ සජිත් කැළුම්රත්න.
ශ්‍රී ලංකා ගුවන් හමුදා ක්‍රීඩිකාවන් සුපර් ලීග් ශූරියන් බවට පත්වුනේ අවසාන තරගයේදී යුද හමුදා කණ්ඩායම ලකුණු 25-21, 25-18 හා 25-17 ලෙසින් කෙළින් ම වට 3-0කින් පරදවමින්. ගුවන් හමුදාවේ ජේ.ඩබ්ලිව්.පී.තුෂාරි වඩාත්ම වටිනා ම ක්‍රීඩිකාව ලෙස තේරුණා.
වයස අවුරුදු 25න් පහළ ආධුනික පිරිමි හා කාන්තා අවසාන තරග පැවැත්වුනේ පේරාදෙණිය සරසවියේ ගෘහස්ථ ක්‍රීඩාංගණයේ. එහි පිරිමි අවසාන තරගය ද වට හතරක් පුරා පැවති අතර අවසානයේ සාන්ත ජෝසප් ක්‍රීඩා සමාජයීය කණ්ඩායම විසින් රාජසිංහ ක්‍රීඩා සමාජය පරදවනු ලැබුවේ ලකුණු 31-33, 25-18, 25-12, 25-23ක් ලෙසින්. දක්ෂතම ක්‍රීඩකයා සාන්ත ජෝසප් වාස් ක්‍රීඩා සමාජයේ ටී.එම්.කවිශ්ක චතුමාල්.
කාන්තා අවසාන තරගයේදී බිටුලින්ක් කණ්ඩායම අභිබවා ලකුණු 25-11, 25-23, 25-22ක ජයක් ලබා ගැනීමට හයිඩ්‍රාමනි පිල සමත් වුනා. දක්ෂතම ක්‍රීඩිකාව වුනේ හයිඩ්‍රාමනි ක්‍රීඩා සමාජයේ එස්.ජී.ඩිලුක්ෂි හර්ෂනි.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
