බිග් බෑෂ් පිලෙන් චමරි ඉවතට: හෝබාර්ට් තීරණයේ පසුබිම

ඕස්ට්‍රේලියාවේ පැවැත්වෙන කාන්තා බිග් බෑෂ් (WBBL 12) ක්‍රිකට් තරගාවලියේ ඉතිරි තරග සඳහා වන නිල සංචිතයෙන් ශ්‍රී ලංකා නායිකා චමරි අතපත්තු ඉවත් කිරීමට හෝබාර්ට් හරිකේන්ස් කණ්ඩායම තීරණය කර තිබේ.

ක්‍රිකට් ඕස්ට්‍රේලියා (Cricket.com.au) වෙබ් අඩවිය වාර්තා කරන පරිදි, අවසන් වටයට පිවිසීමේ බලාපොරොත්තුව යන්තමින් හෝ රැක ගැනීමේ අරමුණින් කණ්ඩායම් කළමනාකාරීත්වය මෙම දැඩි පියවර ගෙන ඇත.

බලාපොරොත්තු සුන් කළ පිතිහරඹය

එංගලන්ත ආරම්භක පිතිකාරිනී ඩැනී වයට්-හොජ් වෙනුවට ආදේශක ක්‍රීඩිකාවක ලෙස චමරි මෙවර හෝබාර්ට් පිලට එක් වූවාය. 2023 වසරේදී සිඩ්නි තන්ඩර් පිල නියෝජනය කරමින් තරගාවලියේ දක්ෂතම ක්‍රීඩිකාව වූ ඇයට, මෙවර සිය සුපුරුදු රිද්මය සොයා ගැනීමට නොහැකි විය.

මෙම තරග වාරයේ ඉනිම පහකදී ඇයට රැස්කර ගත හැකි වූයේ ලකුණු 39ක් පමණි. ඇයගේ ලකුණු සාමාන්‍යය 7.80ක් ලෙසත්, ප්‍රහාරාත්මක වේගය (Strike rate) 59.0ක් ලෙසත් පහළ බැස තිබුණි.

පසුගිය අඟහරුවාදා ඇඩිලේඩ් ස්ට්‍රයිකර්ස් පිලට එරෙහිව පැවති තරගයේදී පන්දු 26කදී ලකුණු 10ක් ලබා සිටියදී, කණ්ඩායමේ අවශ්‍යතාව මත ඇයව පිටියෙන් ඉවත් කිරීමට (Retire out) පවා කළමනාකාරීත්වයට සිදු විය.

විදෙස් ක්‍රීඩිකා කෝටාවේ බලපෑම

ආබාධයක් හේතුවෙන් මුල් තරග පහ අහිමි වූ එංගලන්ත දඟ පන්දු යවන ක්‍රීඩිකා ලින්සි ස්මිත් මේ වන විට සම්පූර්ණ සුවය ලබා සිටී. අද (නොවැම්බර් 14) බ්‍රිස්බේන් හීට් පිලට එරෙහිව පැවැත්වෙන තරගයට ඇය එක්වීමට නියමිතය.

මැදපෙළ සාර්ථක වූ මැඩී ග්‍රීන් ද සංචිතයේ රඳවා ගැනීමට තීරණය කිරීමත් සමඟ, කණ්ඩායමකට ක්‍රීඩා කළ හැකි විදෙස් ක්‍රීඩිකාවන් සංඛ්‍යාව සීමා වීමේ නීතිය (Overseas player quota) යටතේ චමරිට සිය ස්ථානය අහිමි විය.

මෙය හුදෙක් එක් තරගයක විවේක ගැන්වීමක් නොව, නිල සංචිතයෙන්ම ඇයව නිදහස් කිරීමකි. වෙනත් විදෙස් ක්‍රීඩිකාවක ආබාධයකට ලක් නොවුණහොත් චමරිට යළි මෙවර තරගාවලියට එක්වීමට අවස්ථාවක් නොලැබෙනු ඇත.

"පුහුණුකාරිනියක ලෙස මා ගත් අසීරුම තීරණයක්"

මෙම තීරණය පිළිබඳව අදහස් දක්වමින් හෝබාර්ට් පිලේ ප්‍රධාන පුහුණුකාරිනී ජූඩ් කෝල්මන් සඳහන් කළේ, ක්‍රීඩිකාවකට මෙවැනි පණිවිඩයක් ලබා දීම සිය වෘත්තීය ජීවිතයේ අසීරුම අත්දැකීමක් වූ බවයි.

"ඔබ කවුරුන් වුවත්, දක්ෂතා අතරට නොපැමිණෙන විට කණ්ඩායමේ ස්ථානය ස්ථිර නැහැ. චමරි විශාල බලාපොරොත්තු සහිතව පැමිණ උපරිමය ලබා දීමට උත්සාහ කළත්, ඇයට එය සාර්ථක කරගන්නට බැරි වුණා. ඇය ඉතා වෘත්තීය මට්ටමින් මෙම තීරණය භාර ගත්තා. අපි ඇයට හැකි උපරිම සහයෝගය ලබා දෙනවා."

හෝබාර්ට් පිලට තීරණාත්මක දවසක්

තරගාවලියේ අඩක් අවසන් වන විට මුහුණ දුන් තරග පහම පරාජය වී සිටින හෝබාර්ට් කණ්ඩායමට, අද පැවැත්වෙන බ්‍රිස්බේන් හීට් තරගය ජය ගැනීම අනිවාර්ය වී තිබේ.

චමරි වෙනුවට රේචල් ට්‍රෙනමන් ආරම්භක පිතිකාරිනිය ලෙස පිටියට පිවිසීමට නියමිත අතර, අද තරගයත් පරාජය වුවහොත් කණ්ඩායමේ ඉදිරි සැලසුම් සම්පූර්ණයෙන්ම වෙනස් වනු ඇතැයි පුහුණුකාරිනිය වැඩිදුරටත් ඉඟි කළාය.

වැඩිදුර තොරතුරු සඳහා මුල් පුවත් වාර්තාව: