2018 මාර්තුවේ පැවති කේප් ටවුන් ටෙස්ට් ක්රිකට් තරගයේ වාර්තා වූ ඔස්ට්රේලියානුවන්ගේ කුප්රකට අපකීර්තිමත් ක්රියාව පිළිබිඹු කරන සලකුණ වැලි කඩදාසිය බවට පත්වීමට බොහෝ කලකට පෙර පාකිස්තානය පන්දුව පළුදු කිරීම සඳහා යොදා ගත්තේ බෝතල මූඩි බවට හිටපු වේග පන්දු යවන්නකු වන ෂොයිබ් අක්තාර් දැන් අනාවරණය කර තිබෙනවා.
තමා පාකිස්තානය වෙනුවෙන් ක්රීඩා කළ වකවානුවේදී තමාගේ කණ්ඩායම පන්දුවේ හැඩය වෙනස් කිරීම සඳහා බෝතලවල මූඩි භාවිතා කළ බව ඔහු කියන්නේ ආන්දෝලනාත්මක වැලි කඩදාසි සිද්ධියට ක්රීඩකයින් තිදෙනෙකුට වඩා සහභාගි වූ බවට උස්මාන් කවාජා කරන ප්රකාශයට සහාය දක්වමින්.
හිටපු පාකිස්තාන වේග පන්දු යවන්නා විස්ඩන් හි 'The Scoop' වැඩසටහනට මෙසේ කියා සිටියේ කවාජාගේ ස්වයං ලිඛිත චරිතාපදානයෙන් හෙළිදරව් වූ අලුත් තොරතුරුවලින් 2018 ඔස්ට්රේලියානු පන්දුව පළුදු කිරීමේ ක්රියාව යළි කරළියට පැමිණ තිබියදීයි.
"අපි බෝලත් වෙනස් කළා, තව බොහෝ දේ කළා"
“යාළුවනේ... කම් ඕන්. දැන්වත් අපි ඇත්ත කියමු. ඕක ගැන මෙච්චර ලොකුවට කලබල කරන්නේ ඇයි? එයින් ක්රිකට් ක්රීඩාවට හානියක් සිදු වූ බව මට තේරෙනවා. එය අපේ ක්රිකට් ක්රීඩාවටත් හානියක් සිදු කළා. ඒ දවස්වල අපි එංගලන්තයේ ක්රීඩා කරද්දී අපි පාවිච්චි කළේ වැලි කඩදාසි නෙවෙයි බෝතල්වල මූඩියි. අපි බෝලත් වෙනස් කළා. තව බොහෝ දේවල් අපි කළා” යනුවෙන් අක්තාර් විස්ඩන් වෙත කියා සිටියා.
වසර 1997 සිට 2007 දක්වා පාකිස්තානය වෙනුවෙන් ටෙස්ට් ක්රිකට් තරග 46කට ක්රීඩා කළ අක්තාර්, කවාජාගේ තක්සේරුව සමඟ තමා එකඟ වන බවත් මේ මතභේදය අනවශ්ය ලෙස ඇදගෙන යන බවක් තමාට දැනෙන බවත් ප්රකාශ කළා.
මුළු කණ්ඩායමම දැන සිටි කණ්ඩායම් තීරණයක්
පන්දුව පළුදු කිරීම ක්රීඩකයින් දෙතුන් දෙනෙකු පමණක් ගත් තීරණයක් විය නොහැකි බවට 51 හැවිරිදි අක්තාර් පවසන්නේ සිදුවන දෙය ගැන මුළු ක්රීඩක කාමරයම දැන සිටිය යුතු බවට තර්ක කරමින්.
දකුණු අප්රිකාවට එරෙහිව වැලි කඩදාසි භාවිතා කිරීමේ සැලසුම පිළිබඳව මුළු ඔස්ට්රේලියානු කණ්ඩායමම දැන සිටි බවට කවාජා කියා තිබෙනවා. කවාජාගේ මේ ප්රකාශය සමඟ අක්තාර් එකඟ වන්නේ මෙවැනි තීරණ ගැනීමේදී ක්රිකට් කණ්ඩායමක තිබෙන පොදු ස්වභාවය දෙසට ඇඟිල්ල දික් කරමින්.
“උස්මාන් කියපු විදියට, එය කණ්ඩායම් තීරණයක් විය යුතුයි. එය ක්රීඩකයින් දෙන්නෙක් තුන් දෙනෙකුගේ තීරණයක් වෙන්න බැහැ. මේක කියන්න සිදුවීම ගැන මම පසුතැවෙනවා... අපිත් ක්රිකට් පන්දුත් එක්ක නොයෙකුත් දේවල් කළා. මම නොයෙක් දේවල් කළා. නමුත් මුළු කණ්ඩායමම ඒක දැන සිටියා. මොකද, අපි පන්දුව රිවර්ස් කළේ නැත්නම්, අපි තරග දිනන්නේ නැති නිසා” යනුවෙන් ඔහු සඳහන් කළා.
පන්දුවේ හැඩය වෙනස් කිරීම වෙනුවෙන් ලැබෙන දඬුවම පිළිබඳව අක්තාර් හොඳින් දන්නවා. 2003 වසරේදී පන්දුවේ තත්ත්වය වෙනස් කිරීමේ වරදට ඔහුට ජාත්යන්තර එක්දින තරග දෙකක තහනමක් සහ ඔහුගේ තරග මුදලින් සියයට 75ක දඩයක් ද නියම කෙරුණා.
(සටහන - වර්නන් ගුණසේකර)
වැඩිදුර තොරතුරු සහ මූලාශ්ර සබැඳි :
NDTV Sports වාර්තාව: Pakistan "Used Bottle Caps For Ball-Tampering Not Sandpaper": Shoaib Akhtar
සබැඳි පුවත්:
වැලි කඩදාසි රහසට වසර 8කට පසු බැන්ක්රොෆ්ට් නිහඬතාව බිඳී: කමින්ස් දැඩි පීඩනයක
කවාජාගේ හෙළිදරව්ව සත්යයක්: ඕස්ට්රේලියානු ක්රිකට් පරීක්ෂණය වෝනර්ගෙන් විවේචනයට
The Leader පූර්ව විග්රහය: වසර අටක වැලි කඩදාසි රහස යළි පුපුරා යයි



