අතිශය ජනප්‍රිය ක්‍රීඩකයෙකු පමණක් නොව බොහෝ තරුණියන්ගේ අවධානය දිනාගෙන සිටින ක්‍රීඩකයෙකි.
මෙවැනි අවධානයක් ඔහුට මුල් කාලයේ හිමි වූයේ, ලසිත් මාලිංගගේ පන්දු යැවීමේ ඉරියව්වට සමාන ඉරියව්වකින් පන්දු යැවීම නිසා වුව ද, ඔහු මේ වන විට චෙන්නායි සුපර් කිංග්ස් කණ්ඩායමට නැතිව ම බැරි ක්‍රීඩකයෙකු බවට පත්ව සිටී.
පුහුණුවීම් පන්දු යවන්නෙකු ලෙස මහේන්ද්‍ර සිං දෝනිගේ මැදිහත් වීමෙන් චෙන්නායි කණ්ඩායමට එක්වුණු මතීෂ පතිරණ, මේ වන විට එම කණ්ඩායමේ නිත්‍ය සාමාජිකයෙකු බවට පත්ව සිටී.
2022 IPL ආගමනය
2022 වසරේදී මතීෂ පතිරණ චෙන්නායි සුපර් කිංග්ස් කණ්ඩායම සමග එක් වන විට ඔහු වයස අවුරුදු 20ක පසු විය.
එම වසරේදී තරග 2කට පමණක් ක්‍රීඩා කළ ඔහු කඩුලු 2ක් දවා ගත්තේය.
ඔහු චෙන්නායි සුපර් කිංග්ස් කණ්ඩායම සමග එක්වූයේ, පුහුණුවීමේ දැල් තුළ පන්දු යවන්නෙකු (Net bowler) වශයෙනි.
ලසිත් මාලිංගගේ ඉරියව්වට සමාන ඉරියව්වකින් පන්දු යවන මතීෂ පතිරණ, චෙන්නායි කණ්ඩායමේ පන්දු යවන්නෙකු ලෙස යොදා ගැනීමට පසුව නායක මහේන්ද්‍ර සිං දෝනි ඇතුළු කළමනාකාරීත්වය තීරණය කර තිබිණි.
ඒ අනුව, ඔහුට මුලින් ගෙවීමට එකඟ වී සිටි මුදල මෙන් දෙගුණයක් ලබා දීමට පියවර ගත් බව ද මාධ්‍ය වාර්තාවල සඳහන් විය.
2023 වසරේදී මතීෂ පතිරණ, තරග 12කට ක්‍රීඩා කරමින් කඩුලු 19ක් බිද හෙළීය.
2024 දක්ෂතා
මෙවර ඉන්දීය ප්‍රිමියර් ලීග් තරගාවලියේ කැපීපෙනෙන පන්දු යැවීමක නිරත වූ මතීෂ පතිරණ, ඉන්දීය ක්‍රිකට් ලෝලීන්ගේ දැඩි ආකර්ෂණයට ලක්ව ඇති බව මාධ්‍ය වාර්තා සහ සමාජ මාධ්‍යවලින් පෙනී යයි.
කෙසේ වෙතත්, චෙන්නායි සුපර් කිංග්ස් කණ්ඩායම මේ දක්වා තරග 10කට ක්‍රීඩා කර ඇතත්, මතීෂ පතිරණ ක්‍රීඩා කර ඇත්තේ, ඉන් තරග 6කට පමණි.
මෙවර තරගාවලියේ ඔහු සහභාගි වූ තරග 6කදී කඩුලු 13ක් බිද හෙළීමට ඔහු සමත් වී තිබේ.
මේ වන විට වැඩි ම කඩුලුලාභියා ලෙස පෙරමුණේ පසු වන මුම්බායි ඉන්දියන්ස් කණ්ඩායමේ ජස්ප්‍රිට් බුම්රා කඩුලු 14ක් බිඳ හෙළා ඇත්තේ, තරග 10කට සහභාගි වෙමිනි.
ඒ සඳහා ඔහු යවා ඇති පන්දු වාර ගණන 40කි.
දෙවන සහ තුන් වන ස්ථානයේ පසු වන හර්ෂල් පටෙල් සහ මුට්සෆිසුර් රහ්මන් තරග 10 බැගින් ක්‍රීඩා කර කඩුලු 14 බැගින් බිඳ හෙළා තිබේ.
විශේෂත්වයක් වන්නේ, තරග 6කට පමණක් සහභාගි වූ මතීෂ පතිරණ පන්දු වාර 22ක් පමණක් යවමින් කඩුලු 13ක් බිඳ හෙළීම ය.
ඔහු මැයි 02 වන දා පන්ජාබ් කණ්ඩායම සමග පැවති තරගයට ද ක්‍රීඩා කළේ නැත.
කඩුලු දවා ගැනීමේ සාමාන්‍යය
මේ වන විට ඉන්දීය ප්‍රිමියර් ලීග් තරගාවලියේ කඩුලු දවා ගැනීමේ සාමාන්‍යය අනුව 3 වන ස්ථානයේ පසු වන්නේ ද, මතීෂ පතිරණ ය.
ඔහුගේ කඩුලු දවා ගැනීමේ සාමාන්‍යය 13.00කි
'අභිමානයේ සිනහව'
මතීෂ පතිරණ චෙන්නායි සුපර් කිංග්ස් කණ්ඩායමේ අතිශය අවධානයට පාත්‍ර වී ඇති සුවිශේෂී ක්‍රීඩකයෙකු බවට පත්ව සිටී.
ඉන්දීය ප්‍රිමියර් ලීග් නිල ට්විටර් පිටුවෙහි මතීෂ පතිරණගේ පන්දු යැවීමේ නිරවද්‍යතාව අගය කරමින් වීඩියෝ පළ කර තිබේ.
එහිදී, මතීෂ පතිරණගේ යෝකර් පන්දු හමුවේ දක්ෂ පිතිකරුවන් දැවී යන ආකාරය අගය කර තිබේ.
මේ අතර, මතීෂ පතිරණගේ සිනහව පිළිබඳව ද චෙන්නායි සුපර් කිංග්ස් ට්විටර් පිටුවෙහි විවිධ අදහස් පළ වී තිබේ.
එක් සටහනක දැක්වෙන්වෙන්, මතීෂගේ සිනහව “අභිමානයේ සිනහව” යනුවෙනි.
චෙන්නායි කණ්ඩායමේ නිල ට්විටර් පිටුවෙහි පළ කර ඇති තවත් ට්විටර් සටහනක සඳහන් කර ඇත්තේ, “ඔබේ දවස ආරම්භ කිරීමට සුදුසු දීප්තිමත් සිනහව” යනුවෙනි.
මේ අතර, ඉන්දීය දරුවන්ගේ වීරයෙකු බවට ද මතීෂ පතිරණ පත්ව සිටී.
සමාජ මාධ්‍යවල ප්‍රතිචාර
සමාජ මාධ්‍ය භාවිත කරන ලොව පුරා ක්‍රිකට් ලෝලීන් විශාල පිරිසක් ද මතීෂ පතිරණගේ බිහිසුණු යෝකර් පන්දුවේ රසිකයින් බවට පත්ව ඇති ආකාරය මේ උදාහරණ තුළින් පැහැදිලි වනු ඇත.
ඇතැමෙක් මතීෂ පතිරණ හඳුන්වා ඇත්තේ, ලෝකයේ දක්ෂතම නවක ක්‍රීඩකයා ලෙස ය.
මේ අතර, ඇතැමෙකු මතීෂ පතිරණ “යෝකර් මැෂිම” ලෙස ද හඳුන්වා තිබේ.
මේ අතර, සන්රයිසර්ස් හයිදරාබාද් කණ්ඩායම සමග පැවති තරගයේදී ඒයිඩ්න් මාක්‍රාම්ගේ මැද ඉන්න බිඳ දැමීම සම්බන්ධයෙන් ද සටහන් පළ වී තිබේ.
ඒ සම්බන්ධයෙන් පළ කළ ට්විටර් සටහනක දැක්වුණේ, “මතීෂ පතිරණ මැද ඉන්නට දක්වන ආදරය අඛණ්ඩව පවත්වාගෙන යන,” බව ය.
ඉන්දීය තරුණියන්ගේ ආකර්ෂණය
මේ වන විට, මතීෂ පතිරණ ඉන්දීය ක්‍රිකට් ලෝලී තරුණියන්ගේ ද දැඩි ආකර්ෂණයට ලක්ව සිටී.
පහත වීඩියෝවල දැක්වෙන පරිදි චෙන්නායි සුපර් කිංග්ස් කණ්ඩායම වෙනුවෙන් සහය පළ කරන බොහෝ යෞවනියන්ගේ ආකර්ෂණය ඔහු වෙත ලැබී තිබේ.
කවුද මේ මතීෂ පතිරණ?
2002 වසරේ මහනුවරදී උපත ලද මතීෂ පතිරණ තවමත් 21 වන වියේ පසුවෙයි.
ශ්‍රී ලංකා කණ්ඩායමට අමතරව ඔහු, චෙන්නායි සුපර් කිංග්ස්, ඩෙසර්ට් වයිපර්ස්, බංග්ලා ටයිගර්ස්, කලම්බු ස්ට්‍රයිකර්ස්, කැන්ඩි ෆෝල්කන්ස්, රංග්පූර් රයිඩර්ස් සහ ශ්‍රී ලංකා 19න් පහළ කණ්ඩායම් නියෝජනය කර තිබේ.
ඔහු ශ්‍රී ලංකා ජාතික කණ්ඩායම නියෝජනය කිරීමට අවස්ථාව ලැබුවේ, 2022 අගෝස්තු 27 වන දා ඇෆ්ඝනිස්ථානයට එරෙහිව පැවති පන්දු වාර 20 තරගයකිනි.
ඔහු මේ වන විට ජාත්‍යන්තර පන්දු වාර 20 තරග 6කට සහභාගි වී කඩුලු 11ක් බිඳ හෙළා තිබේ.
2023 වසරේ ජූනි 02 වන දා ඇෆ්ඝනිස්ථානයට එරෙහිව පැවති එක්දින තරගයට සහභාගි වෙමින් ඔහු එක්දින ක්‍රිකට් වරම් හිමි කර ගත්තේ ය.
මේ වන විට එක්දින තරග 12කට ක්‍රීඩා කර ඇති මතීෂ පතිරණ කඩුලු 17ක් බිඳ හෙළා තිබේ.