ආරම්භ කළේ ලෝක පාපන්දු ශ්‍රේණිගත කිරීමේ 165 වැනි ස්ථානයේ සිටින පැපුවා නිව් ගිනියාව සමග තරගය 0-0 ක් ලෙසින් ජය පැරදුමකින් තොරව අවසන් කිරීමට සමත් වෙමින්.
කොළඹ තුරඟ තරග පිටියේ විදුලි ආලෝක මධ්‍යයේ ඊයේ (22) පැවති මේ තරගයේදී ශ්‍රී ලංකා ක්‍රීඩකයන් තරගයේ වැඩි කාලයක් පන්දුව අයිති කරගෙන සිට ගෝල් ලබා ගැනීමේ අවස්ථාවන් ලබා ගත්ත ද එය වාසියට හරවා ගැනීමට අපොහොසත් වුනා.
2023 ඔක්තෝබර් මාසයේ ශ්‍රී ලංකාවේදී යේමනය ලෝක කුසලාන සුදුසුකම් ලබා ගැනීමේ තරගයකදී ශ්‍රී ලංකාවට එරෙහිව ක්‍රීඩා කිරීමෙන් පසුව ජාත්‍යන්තර පාපන්දු ක්‍රීඩාව දැන් නැවතත් දිවයිනට පැමිණ තිබෙන්නේ ජගත් පාපන්දු සම්මේලනය විසින් ප්‍රථම වතාවට පවත්වන මේ FIFA Series 2024 තරගමාලාවේ ශ්‍රී ලංකා අදියරෙන්.
මේ තරගාවලියට සත්කාරක රට වන ශ්‍රී ලංකාව හා මධ්‍යම අප්‍රිකානු සමූහාණ්ඩුව, භූතානය, පැපුවා නිව් ගිනියාව යන කණ්ඩායම් හතර සහභාගි වන අතර තරගාවලිය මාර්තු 22 සිට 25 දක්වා පැවැත්වීමටයි නියමිත.
ජගත් පාපන්දු සම්මේලනය විසින් පනවනු ලැබූ තහනම මෑතකදී ඉවත් කිරීමෙන් පසුව ශ්‍රී ලංකා පාපන්දු කණ්ඩායම මව්බිමේදී ක්‍රීඩා කරන ප්‍රථම තරගාවලිය මෙය යි.
මේ තරගාවලියේදී ශ්‍රී ලංකා කණ්ඩායමේ නායකත්වය දරන්නේ පළපුරුදු ක්‍රීඩක සුජාන් පෙරේරා. 23 දෙනෙකුගෙන් සමන්විත ජාතික සංචිතයේ ක්‍රීඩකයින් 11 දෙනෙකු ම ද්විත්ව පුරවැසිභාවය ලැබූවන්.
ජගත් පාපන්දු සම්මේලනය - FIFA - ප්‍රථම වතාවට මේ ආරාධිත තරගමාලාව සංවිධානය කර තිබෙන්නේ වෙනස් මහාද්වීපයන්හි පාපන්දු සම්මේලනවල ජාතික කණ්ඩායම් අතර මිත්‍ර තරග පැවැත්වීමට.
FIFA Series මංගල අදියර විවිධ තරගමාලා පහකින් සමන්විත වන අතර ඒවා මාර්තු 21 සිට 26 දක්වා සත්කාරක රටවල් පහක් හරහා ක්‍රියාත්මක වනවා. ශ්‍රී ලංකාව, ඇල්ජීරියාව, ඊජිප්තුව, අසර්බයිජානය හා සෞදි අරාබිය එම සත්කාරක රටවල්.
සටහන :
(වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
