මීට අමතරව, IPL පන්දු යවන්නන්ට තවත් සුභාරංචියක් ගෙන එමින් රාත්‍රී තරගවල දෙවැනි ඉනිමේදී පන්දු දෙකක් භාවිතා කිරීමටද අවසර ලබා දී තිබෙනවා. මේ නැවුම් වෙනස සිදුකර තිබෙන්නේ පින්න නමැති සාධකයට එරෙහි වීමට. ඉලක්කය හඹා යාමේ 11 වැනි ඕවරයෙන් පසුව, ක්‍රීඩා කරමින් තිබෙන පන්දුව වෙනුවට තරග විනිසුරුගේ අභිමතය පරිදි ලකයක් නැති එහෙත් වියළි පන්දුවක් භාවිතා කිරීමට මේ අනුව ඉඩ ලැබෙනවා.
පන්දුව වෙනස් කරන ලෙසට විනිසුරුගෙන් ඉල්ලා සිටීමට පන්දු රකින කණ්ඩායමට පුළුවන්. එහෙත් දේශගුණික තත්ත්වයන් තක්සේරු කර ඊට එකඟ වීම හෝ එකඟ නොවීම තීරණය කරන්නේ පිටියේ සිටින විනිසුරුවන්.
දෙවැනි ඉනිමේදී වෙනස් පන්දු දෙකක් භාවිතා කිරීමේ බලය සම්පූර්ණයෙන් පවරා තිබෙන්නේ පිටියේ තරග විනිසුරුවන්ට. 11 වැනි ඕවරයෙන් පසුව දෙවැනි පන්දුවක් යොදා ගැනීමට විනිසුරුවරයෙකුට හැකියාව තිබෙන අතර ඒ අවස්ථාවේ දේශගුණයේ තත්ත්වය දෙස බැලීමෙන් පසුව දෙවැනි පන්දුවක් පාවිච්චි කිරීම පිණිස අවසර දීම ඔහුගේ තීරණයක්. පිනි වැටීම නිසා ක්‍රීඩාවට බාධාවක් ඇතිවන බවක් කණ්ඩායමකට හැඟෙනවා නම් පන්දුව වෙනස් කරන ලෙසට විනිසුරුගෙන් ඉල්ලා සිටීමට ඔවුන්ට පුළුවන්.
මේ වෙනස සිදුකිරීම සහ කොවිඩ් වසංගතය සමයේදී ජාත්‍යන්තර ක්‍රිකට් කවුන්සලය (ICC) විසින් පනවනු ලැබූ පන්දුව ඛේටයෙන් ඔප දැමීමේ තහනම අවලංගු කිරීම ඉන්දියා ක්‍රිකට් පාලක මණ්ඩලය (BCCI) විසින් ක්‍රියාත්මක කර තිබෙන්නේ මුම්බායි නගරයේ ඊයේ පැවති IPL කණ්ඩායම් නායකයන් සමග සාකච්ඡාවෙන් පසුව.
මේ පිළිබඳව අදහස් විමසීමේදී පන්දුව ඔප දැමීම සඳහා කෙළ පාවිච්චි කිරීමට කිසිම නායකයෙක් අකමැති වී නැති බැවින් එම තහනම ඉවත් කිරීමට ඒකමතික එකඟත්වයකට පිවිස තිබෙන බව වාර්තා වනවා. “මෙය ඉන්දියා ක්‍රිකට් පාලක මණ්ඩලයේ දේශීය තරගාවලියක්. ඒ නිසා අපි ICCයේ නිර්ණායකයන් පිළිපැදීමට බැඳී නැතැයි BCCI උසස් නිලධාරියෙක් ප්‍රකාශ කරනවා.
ඛේටය යොදා ගනිමින් පන්දු ඔප දැමීමේ ක්‍රියාවලියෙන් විස්සයි20 තරගවලට නියම බලපෑමක් ඇති වේවිද යන්න ඉදිරියේදී දැකගත හැකි වේවි. එහෙත් අනෙක් නීති වෙනස වන ලකුණු හඹා යාමේදී පන්දු දෙකක් භාවිතා කිරීමෙන් ක්‍රීඩාවට ඇති වන ප්‍රබල බලපෑම ගැන නම් කිසිම සැකයක් නැහැ.
(සටහන | වර්නන් ගුණසේකර)
ජ්‍යෙෂ්ඨ මාධ්‍යවේදී
gunasekera33@gmail.com
සබැඳි පුවතක් :
පන්දුව ඔප දැමීමට කෙළ පාවිච්චි කිරීමේ තහනම IPL සමග ඉවත් වේවිද?