ජපානයෙන් කිලෝමීටර් 350ක දැවැන්ත සොබාදම් පදික මාවතක්

ගම්බද වගාබිම්, කඳු මුදුන් සහ ගංගා නිම්න එකිනෙක යා කෙරෙන සුවිශේෂී පරිසර පද්ධතියක් ඔස්සේ පියමනින්නට සොබාදහමට පෙම්බඳින්නන්ට දැන් ජපානයේදී දුර්ලභ අවස්ථාවක් උදාවී තිබේ.

ටෝකියෝ නුවර සිට පැය එකහමාරක පමණ ගමනකින් ළඟාවිය හැකි උතුරු ඉබරාකි ප්‍රාන්තය කේන්ද්‍ර කරගනිමින් නිමවූ ‘හිතචිනොකුනි ලෝන්ග් ට්‍රේල්’ (Hitachinokuni Long Trail) පදික මාවත පසුගියදා සම්පූර්ණයෙන්ම පාගමන්කරුවන් වෙනුවෙන් විවෘත විය. 2019 වසරේ සැලසුම් ඇරඹි මෙම දැවැන්ත ව්‍යාපෘතියේ අවසන් කිලෝමීටර් 75ක අදියර නිමවීමත් සමඟ, මෙය ජපානයේ දිගම වක්‍රාකාර පාදික මංපෙත බවට පත්වෙයි.

ගම්බද සිරියාව හා කඳුකර අභියෝගය

කිතයිබරාකි, තකහගි, හිතචි, හිතචියෝටා, හිතචියෝමියා යන නගර පහ සහ දයිගෝ ගම්මානය යා කරමින් මෙම මාවත දිවෙයි. මෙහි ඇති සුවිශේෂීත්වය වන්නේ සාම්ප්‍රදායික ජපන් ගම්බද ජීවිතය සහ පරිසරය විදහා දක්වන 'සතොයාමා' (Satoyama) භූමි දර්ශන ඔස්සේ ගමන් කිරීමට ඉඩ සැලසීමයි.

ප්‍රධාන කලාප පහකට බෙදා ඇති මෙම මාවත කොටස් වශයෙන් තරණය කිරීමේ පහසුකම පවතී. මධ්‍යම කලාපය දැඩි බෑවුම් සහිත කඳු, ගිරිදුර්ග සහ ගංගා තරණය කිරීම්වලින් සමන්විත බැවින් එය පළපුරුදු කඳු නගින්නන්ට වඩාත් උචිත අභියෝගාත්මක කොටසක් ලෙස හඳුනාගෙන තිබේ. අතහැර දමා තිබූ පැරණි කඳුකර අඩිපාරවල් රැසක් ද ප්‍රතිසංස්කරණය කරමින් මෙම මංපෙතට ඈඳා තිබීම කැපීපෙනෙන ලක්ෂණයකි.

තිරසාර සංචාරක ව්‍යාපාරයට නව ආදර්ශයක්

මෙය හුදු කඳු නැගීමක් පමණක් නොව, ග්‍රාමීය සංස්කෘතිය, ඉතිහාසය සහ ගැමි ජනජීවිතය සමීපව අත්විඳිය හැකි ගමනක් බව සංවිධායකයෝ පෙන්වා දෙති. ඉබරාකි ප්‍රාන්තයේ ස්වභාවික සෞන්දර්යය සහ සංස්කෘතික උරුමයන් හරහා සංචාරක ආකර්ෂණය ඉහළ නැංවීම මෙහි මූලික අරමුණයි.

දේශීය ආර්ථිකය හා පරිසර පද්ධතිය රැකගනිමින් ග්‍රාමීය ප්‍රදේශ සංචාරක කලාප ලෙස නඟාසිටුවීමට ගෙන ඇති මෙම පියවර, පරිසර හිතකාමී සංචාරක ව්‍යාපෘති කෙරෙහි අවධානය යොමුකරන ශ්‍රී ලංකාව වැනි රටවලට ද වැදගත් අත්දැකීමක් සපයයි. විශේෂයෙන් මෙරට මධ්‍යම කඳුකරය ආශ්‍රිත 'පෙකෝ ට්‍රේල්' වැනි දීර්ඝ පාදික මංපෙත් හරහා ග්‍රාමීය ආර්ථිකය ශක්තිමත් කිරීමට ක්‍රියාත්මක වන වැඩපිළිවෙළට මෙවැනි ජාත්‍යන්තර ප්‍රවණතා මනා පිටිවහලක් වන බව සංචාරක ක්ෂේත්‍රයේ විශ්ලේෂකයෝ පෙන්වා දෙති.


වැඩිදුර තොරතුරු සඳහා මූලාශ්‍ර:

The Independent වාර්තාව: Japan opens new 350km walking trail connecting six cities and towns