ජකර්තා නුවරින් පෑදුණු ආර්ථික මාවත
දකුණු ආසියානු කලාපයේ උපායමාර්ගික ආයෝජන කේන්ද්‍රස්ථානයක් ලෙස ශ්‍රී ලංකාව නැවත ගොඩනැගීමේ විශේෂ රාජ්‍ය තාන්ත්‍රික ප්‍රයත්නයක් පසුගියදා ඉන්දුනීසියාවේ ජකර්තා අගනුවරදී දියත් විය.
ජකර්තාහි JW Marriott හෝටල් පරිශ්‍රයේදී පැවති “Sri Lanka Connect 2026” ව්‍යාපාර හා ආයෝජන සමුළුව සංවිධානය කර තිබුණේ ඉන්දුනීසියාවේ ශ්‍රී ලංකා තානාපතිනී ශෂීකලා ප්‍රේමවර්ධන මෙනවියගේ ප්‍රධානත්වයෙන් යුත් ශ්‍රී ලංකා තානාපති කාර්යාලය සහ ශ්‍රී ලංකා ආයෝජන මණ්ඩලය (BOI) ඒකාබද්ධවයි.
දෙරටේ ප්‍රමුඛ පෙළේ ප්‍රතිපත්ති සම්පාදකයෝ, ව්‍යාපාරික නායකයෝ මෙන්ම විදේශ ප්‍රාග්ධනය මෙහෙයවන ප්‍රධාන ආයෝජකයෝ රැසක් ඊට එක්ව සිටියහ.
ප්‍රමුඛතා ක්ෂේත්‍ර 5ක් කෙරෙහි සෘජු අවධානය
සමුළුවේ මුඛ්‍ය දේශනය පැවැත්වූයේ ඉන්දුනීසියාවේ ආයෝජන සහ අගය එකතු කළ නිෂ්පාදන කර්මාන්ත (Downstream Industries) අමාත්‍ය රොසාන් රොස්ලානි විසිනි. දෙරට අතර වෙළෙඳ සහ නිෂ්පාදන සබඳතා නව මුහුණුවරකින් ශක්තිමත් කළ යුතු බව හෙතෙම පෙන්වා දුන්නේය.
ශ්‍රී ලංකාවේ ආර්ථික සංවර්ධන නියෝජ්‍ය අමාත්‍ය නිශාන්ත ජයවීර වීඩියෝ පණිවුඩයක් මගින් සමුළුව අමතමින්, විදේශ ආයෝජන ආරක්ෂා කිරීමට සහ ව්‍යාපාර ඇරඹීමේ ක්‍රියාවලිය පහසු කිරීමට රජය ගෙන ඇති ප්‍රතිපත්තිමය ක්‍රියාමාර්ග පැහැදිලි කළේය.
ලංකා වාණිජ මණ්ඩලයේ ප්‍රධාන විධායක ශිරාන් ප්‍රනාන්දු මෙහෙයවූ මණ්ඩල සාකච්ඡාවේදී, ඉන්දුනීසියානු ව්‍යාපාරිකයන්ට මෙරට ආයෝජනය කළ හැකි ප්‍රධාන ක්ෂේත්‍ර 5ක් හඳුනා ගැනිණි:
* දේපළ වෙළෙඳාම් සහ නාගරික යටිතල පහසුකම් සංවර්ධනය
* නාවික, වරාය ආශ්‍රිත සේවා හා ගබඩා පහසුකම්
* භාණ්ඩ ප්‍රවාහන හා සැපයුම් දාම කළමනාකරණය (Logistics)
* උසස් ඇඟලුම් හා රෙදිපිළි නිෂ්පාදන කර්මාන්තය
* ඖෂධ නිෂ්පාදනය සහ සෞඛ්‍ය සේවා තාක්ෂණය
කොළඹ වරාය නගර ආර්ථික කොමිෂන් සභාවේ අධ්‍යක්ෂිකා රාධිකා ඔබේසේකර, කැලිබේ ඉන්ටර්නැෂනල් අධ්‍යක්ෂ රූඩි සන්තෝසා, CBL Global Foods සභාපතිනී ශ්‍යාමලී වික්‍රමසිංහ සහ ආයෝජන මණ්ඩලයේ විධායක අධ්‍යක්ෂිකා ගංගා පලකැටිය යන මහත්ම මහත්මීහු මෙරට ආයෝජන පහසුකම් සහ නීතිමය පසුබිම පිළිබඳව කරුණු ඉදිරිපත් කළහ.
ආයෝජන ගලායන්නේ එක් පැත්තකට පමණක් නොවේ
ද්විපාර්ශ්වික ආර්ථික සබඳතාවක සැබෑ ශක්තිය රැඳී ඇත්තේ දෙපසටම ප්‍රතිලාභ ගලායන පරිසරයක් නිර්මාණය වීම මතය. ආසියාවේ වේගයෙන්ම ඉදිරියට එන ඉන්දුනීසියානු දැවැන්ත වෙළෙඳපොළ තුළ ශ්‍රී ලාංකික ව්‍යවසායකයන්ට දොරටු විවර කරගැනීම පිළිබඳව සමුළුවේ දෙවන අදියරේදී අවධානය යොමු විය.
CIMA Global නියෝජිත අකලංක ද සොයිසාගේ මෙහෙයවීමෙන් පැවති එම සාකච්ඡාවට ඩනන්ටාරා (Danantara) ආයතනයේ ප්‍රධාන ආර්ථික විද්‍යාඥ රේසා සිරේගර්, හේලීස් ඇවෙන්චුරා කළමනාකාර අධ්‍යක්ෂ ආචාර්ය වසබ ජයසේකර සහ MAS හෝල්ඩින්ග්ස් සමූහයේ සිලුඑටා සමාගමේ ප්‍රධාන විධායක රුවන් කෑරගල එක්වූහ.
ඉන්දුනීසියාවේ දැනටමත් ක්‍රියාත්මක ශ්‍රී ලාංකික සමාගම් ලබන ප්‍රායෝගික අත්දැකීම් සහ ආසියානු කලාපීය සැපයුම් ජාලය සමඟ ශ්‍රී ලංකාවේ නිෂ්පාදන එකිනෙකට බද්ධ කළ හැකි ආකාරය එහිදී විශ්ලේෂණය කෙරිණි.
සාකච්ඡාවෙන් ඔබ්බට ගිය ආර්ථික ඉලක්කයක්
මෙම ඉහළ පෙළේ හමුව හුදු රාජ්‍ය තාන්ත්‍රික කතාබහකට සීමා නොවී, රට තුළට සැබෑ විදේශ මුදල් ප්‍රවාහ (FDI) ගලා ඒම දක්වා පරිවර්තනය කරගැනීම ශ්‍රී ලංකාවේ මූලික අපේක්ෂාවයි.
විශේෂයෙන්ම ඖෂධ, සැපයුම් සේවා සහ වරාය ආශ්‍රිත ක්ෂේත්‍රවලට ඉන්දුනීසියානු ආයෝජන ආකර්ෂණය කරගත හැකි වුවහොත්, එය මෙරට ඩොලර් අර්බුදයට තිරසර විසඳුමක් මෙන්ම නව රැකියා අවස්ථා බිහිවීමට ද ප්‍රබල පිටුවහලක් වනු ඇත.
