ආයෝජකයින් දිනාගැනීමට නම් 'නම' වෙනුවට 'ක්‍රමය' වෙනස් විය යුතුයි

ශ්‍රී ලංකාව යළිත් වරක් ජාත්‍යන්තර ව්‍යාපාරික ප්‍රජාව හමුවේ අලුත් ආයෝජන කතාවක් කීමට සූදානම් වේ. විදේශීය ආයෝජකයින්ට මෙරටට එන්නැයි ආරාධනා කිරීමට පෙර, අප විසින්ම විසඳාගත යුතු බරපතළ ගැටලුවක් තිබේ.

ඒ වසර ගණනාවක් පුරා ස්ථාවර නීති පද්ධතියක් සහ කාර්යක්ෂම අනුමැතියක් ලබාදීමට අපොහොසත් වූ රටක් කෙරෙහි විදේශිකයන් විශ්වාසය තබන්නේ කෙසේද යන්නයි.

ජනාධිපති ජ්‍යෙෂ්ඨ ආර්ථික උපදේශක දුමින්ද හුලංගමුව පසුගියදා කළ ප්‍රකාශයකින් මේ යථාර්ථය මනාව පැහැදිලි විය. හුදු ප්‍රචාරක ව්‍යාපාරවලින් සහ විදේශීය හමුවීම්වලින් පමණක් විදේශ ආයෝජන ගෙන්වා ගත නොහැකි බව ඔහු පිළිගෙන තිබේ.

කතාව සහ යථාර්ථය: ආයෝජකයින් පසුබසින්නේ ඇයි?

1. අලුත් ආයතන හැදුවාම ආයෝජකයෝ එයිද?

නැත. පසුගිය දශක කිහිපය තුළ මෙරට ආයෝජන සමුළු සහ දේශපාලන පොරොන්දුවලින් අඩුවක් නොතිබුණි. අඩුව තිබුණේ ඒ පොරොන්දු සැබෑ ව්‍යාපාර බවට පත්කරන ආයතනික විනයයි.

ආයෝජන මණ්ඩලය (BOI) ශක්තිමත් කිරීමට සහ නව පර්යේෂණ ආයතනයක් පිහිටුවීමට යෝජනා වී ඇතත්, නම වෙනස් වූ පමණින් ආයෝජකයින් සෑහීමකට පත් නොවේ.

2. 'One-Stop Shop' සංකල්පය සැබෑවක් වෙයිද?

ආයෝජකයෙකුට සියලුම අනුමැතීන් එකම වහලක් යටින් ලබාදෙන මධ්‍යස්ථානයක් බවට BOI ආයතනය පත්කිරීම ඉතා වැදගත් පියවරකි.

ආයෝජකයෙකුට තවදුරටත් අමාත්‍යාංශ ගණනාවක් පසුපස යමින්, එකම ලියවිල්ලට අත්සන් දහයක් ගැනීමට සිදුවේ නම් එවැනි ආයතනවලින් ඵලක් නැත. තවත් අලුත් ආයතනයක් හැදීමෙන් රජයේ පරිපාලන වියදම් ඉහළ යාම පමණක් සිදුවිය හැකි බව ආර්ථික විශ්ලේෂකයෝ පෙන්වා දෙති.

3-ආයෝජකයින්ට අපි දෙන සහතිකය කුමක්ද?

රටවල් 5ක් ඉලක්ක කරගෙන සෘජු ආයෝජන සාකච්ඡා පැවැත්වීම ප්‍රායෝගික තීරණයකි. ඒ ආයෝජකයින් මෙරටට එන්නේ අපේ සුන්දර කතා අසා නොවේ.