අප්‍රේල් 2 වැනිදා,
කොළඹදී.
පොලිස්පතිතුමනි,
මගේ මේ ලියුමට එබිලා බිරිඳ කිව්වා මාස තුනක සේවා දිගුවක් ලැබුණට ඔය මනුස්සයට සුබ පතන්න පිස්සුද හලෝ, ඊළඟ පොලිස්පති කවුද කියල හොයල එයැයිට සුබ පතනවකො කියල. එතකොට මම කිව්ව ඊළඟට පොලිස්පති වෙනව කියන කෙනාට සුබ පැතුවොත් මට පාරෙ බැහැල යන්නත් බැරිවෙයිද දන්නෑ කියල.
මම තමුන්නැහෙට ලියන්න ගත්තෙ නම් සුබ පතන්න තමයි. හැබැයි සේවා දිගුවට නෙවෙයි තමුන්ගෙ යටතෙ තියෙන පොලිසියේ කාර්යක්ෂමතාවටයි. පහුගියදාක හෝමාගම බුදු පිළිමයක් විවෘත කරන්න පලච්ච බන්දුල ගුණවර්ධන ඇමතිට හූවක් කියපු පාරේ ගිය මනුස්සයෙක්ව වහාම අත්අඩංගුවට ගන්න එහේ පොලිසිය කාර්යක්ෂම වෙලා කියල පත්තරේ තිබුණ. කාට ද ආඩම්බර නේද ලොක්කා ?
මේක අහපු මගේ බිරිඳ හොඳටම කලබල වෙලා ඇහුවා දැන් අපිවත් අඩංගුවට ගනියිද කියල. මම කිව්වා නෑ, නෑ, හූ කියන්න හිතුණට අත්අඩංගුවට ගන්නෙ නැතිවෙයිනෙ. එහෙම නම් රටේ ටෙලිවිෂන් ප්‍රවෘත්ති බලන බහුතරයක් අත්අඩංගුවට ගන්න වෙනවනෙ කියල.
මේ ආරංචිය අහල අපේ පුතාට හොඳටම කේන්ති ගියා. රටේ සල්ලි හොරකම් කරපු, රට බංකොලොත් කරපු, අල්ලස්, මිනීමැරුම්, ස්ත්‍රී දූෂණවලට චෝදනා ලබපු දේශපාලනඥයන්ට ආරක්ෂාව සපයන පොලිසිය, දේශපාලනඥයෙකුට හූවක් කිව්වම පුරවැසියෙක් අත්අඩංගුවට ගන්නෙ කොහොමද කියල. අපේ මිනිහට තේරෙන්නෙ නෑ ඔය ස්ටේජ්වල මහ හයියෙන් රැකගන්න ඕන කියන ප්‍රජාතන්ත්‍රවාදය රැකගන්නනෙ ඔහොම කරන්නෙ.
බුදු පිළිමයක් විවෘත කරන්න ගිය හාදයට හූවක් කිව්වම අත්අඩංගුවට ගත්තට බුදු හාමුදුරුවො නම් තමන්ව මරන්න ආපු එවුන්ටත් සමාව දුන්නනෙ කියල මගේ බිරිඳ කියනව. මේ වෙලාවෙත් බුදු පිළිමෙ නම් හූ කියපු මිනිහට සමාව දෙන්න ඇති.
පොලිසිය බන්දුල ගුණවර්ධන සතුටු කරන්න තකතිරුකම් කරාට මිනිස්සුන්ගෙ විරෝධය අත්අඩංගුවෙ තියන්න බෑනෙ. මතකද 2021දි වීඅයිපී වාහනේකට යන්න කොළඹ පාරක් වහපු වෙලාවක හූවක් කියපු මනුස්සයෙක්වත් පොලිසිය අත්අඩංගුවට ගත්ත. හැබැයි ඊට ටිකදවසකට පස්සෙ කෝට්ටෙ පැත්තෙ කිරිපිටි පෝලිමක හිටපු මිනිස්සු ජනාධිපති ගෝටාටම නොනවත්වා හූ කිව්වෙ. කෝට්ටෙන් ගෝල්ෆේස් ගිය හූව නවත්තගන්න ඒ ජනාධිපතිට ගෙදර යන්නම වුණානෙ.
හැබැයි සාධාරණව කල්පනා කරල බැලුවම ලංකාවෙ පොලිසියට අපි බැන්නට ඒක සුළු අපරාධ පොලිසියක් මිසක් ලොකු අපරාධ පොලිසියක් නෙවෙයිනෙ. ඉස්කෝලෙ යන ළමයෙක් පොල් ගෙඩියක් හොරකම් කරාම මෙහේ පොලිසිය උසාවි නොදා ගොඩින් බේරන්නෙ නෑනෙ. හූවක් කිව්වම අත්අඩංගුවට ගන්නවමනෙ. ඒත් පොලිසිය හෙව්වෙ නැති ලොකු අපරාධ ඔක්කොම ලියන්න තරම් ඉඩක් පත්තරෙන් වෙන්කර ගන්න විදිහක් නෑනෙ.
තමුන්නැහේත් පොලිසියට උපදෙස් දීල ඇතිනෙ ලොකු අපරාධ හොයන්න ගියාම ලොකු කරදර වෙන නිසා, සුළු අපරාධවලින් සෑහීමකට පත්වෙන්න කියල .මං හිතන්නෙ ඊළඟ වතාවෙ අපි මැතිවරණ ප්‍රතිපත්තිවල බලන්න ඕන ලොකු අපරාධ පොලිසියක් පිහිටුවන්න කවුරුවත් පොරොන්දු වෙලා තියෙනවද කියල, ඒ අයට ඡන්දෙ දෙන්න.
බන්දුල ඇමති බුදු පිළිමයක් විවෘත කරන්න ගිය වෙලාවක වෙච්චි අලකලංචියක් නිසා උන්නැහේට කර්මය මතක් වුණේ නැද්ද දන්නෑ කියල මගේ පුතා අහනව.
ආර්ථික විද්‍යාව ටියුෂන් දුන්නට බුද්දාගම දන්නෙ නැතුව ඇතිනෙ, නැත්නම් කර්මය පඩිසන් දෙනව කියල මතක් වෙයිනෙ කියල මගේ බිරිඳ එතකොට කිව්ව. මෑන් බුද්දාගම දන්නෙ නැතිවෙන්නත් බෑ. ලුම්බිණි ඉස්කෝලෙලුනෙ ඉගෙනගත්ත කියන්නෙ.
මම ,
මානි.
ප:ලි: ලියුම ඉවර කරාටත් පස්සෙයි මට මතක් වුණේ හූවක් කියපු මිනිහව වහාම අල්ලගත්ත පොලිසිය, බන්දුල ඇමතිගෙ ගේ ගිනි තියපු දවසෙ නිවාඩු ගිහින් ඉන්න ඇති කියල. නැත්නම් ඔය කාර්යක්ෂමතාවෙ හැටියට ගේත් ගිනි තියන්න නොදී ගිනි තියෙන්න ආපු එවුන්වත් අත්අඩංගුවට ගනියිනෙ. කරුමෙ තමයි නේද ?
(සුන්දර නිහතමානි ද මැල්)
ජ්‍යෙෂ්ඨ මාධ්‍යවේදී
(සුන්දර නිහතමානි ද මැල් ගේ ෆේස්බුක් පිටුවෙන් උපුටා ගැනිණ )
