පොහොට්ටුවට චන්දෙ දුන්නේ තනිකරම බයියෝ නෙවෙයි කියල එක්තරා දවසක ලියන්න මෙන්න මේ මිනිහ මට රුකුලක් සැපයුවා.
මේ බයියෙක් නෙවෙයි. හැබැයි ජාතිකත්වය ගැන විශාල විශ්වාසයක් තිබ්බ මිහිහෙක්. ඒ නිසා බයි ලේබලය ලේසියෙන් වදින්න ඉඩකඩ තිබ්බ කෙනෙක්.
යුරෝපෙ කොච්චර රටවල් ප්‍රමාණයකට එයාගේ ජිවිතකාලේ ඇතුලේ ගිහින් තිබ්බද, මිනිස්සු හමුවෙලා තිබ්බද කියන්න කවුන්ට් එකක් මම ළඟ තිබ්බේ නැහැ. හැබැයි මම අහපු ගොඩක් රටවල් වලට මේ මිනිහ ගිහිං තිබ්බ. ඒ හැම රටක් ගැනම කියනකොට අන්තිමට කිව්ව දේ තමයි මචං කොහේ ගියත් මෙහෙ වගේ නැහැ කියල. මම එතකොට මගේ හැමදාම ගහන තර්කෙන් ඌට දමල ගැහුවා. උඹලට නොස්ටැල්ජියාව අයියේ...
උඹ කියන එක හරි බං..මට ඔය උඹ කියන එක තමයි ඇත්තේ. හැබැයි උඹ ඔය එහෙ (වෙස්ට් එකේ) ඉන්නවා කියන සිරා කියල කියන එවුණුත් අපි වගේ තමයි. අපිට උං වගේ වෙන්න බැහැ වාගෙම තමයි උන්ටත් අපි වගේ වෙන්න බැහැ. අපි හයිය මිනිස්සු බං...
සබරේ මගේ නවාතැනට වැඩියෙන්ම ආපු ගියපු, මගේ දුප්පත් තේ එක වැඩියෙන්ම බෙදා හදාගත්ත එකෙක් තමයි මේ. පට්ට බඩගිනියි බං. මේ මීටින් මඟුල් ඉවරයක් නැහැ බං කියල ඇවිල්ල තියන දෙයක් කාල සීනි නැති කහට අනන්ත බිල ඇති.
මැණුම් පිඨයේ පීඨාධිපති උණා කියල, වැඩ වැඩි උණා කියල කිසිම දවසක මගේ කාමරේට එන එකේ අඩුවක් උණේ නැහැ.
ඒ එන හැම වාරයකම මගේ අන්තිම පෝස්ට් එක මිනිහ කියවල ඉවරයි. ඇවිල්ල කරන්නේ කොමෙන්ට් කරන එක. සංවාද කරන එක. කාලය ගැන හැඟීමක් තිබ්බේ නැහැ දේශපාලනය කතා කරන්න ගියාම.
එකඟ වෙච්ච තැන් අඩුයි. නැති තැන් වැඩියි. ප්‍රසිද්ධියේ කොමෙන්ට් නොකළත් එයාගේ මතය කියන්න තමයි මගේ කාමරේට රිංගුවේ.
සයන්ස් පසුබිමක් තියාගෙන ආටෙක් එක්ක අපේ වර්ගයේ සීරියස් ෆිල්ම් එකක් බලන්න, ඒ ගැන කතා කරන්න හැකියාවක් තිබ්බ එකෙක්. එහෙම උං අඩුයි.
විරුද්ධ මත දෙකක් තියාන පොහොසත් කතාබහක් කරන්න පුළුවන් මිනිස්සු අඩු ලෝකෙක, කතා කරන්නවත් වෙලාවක් නැතුව මිනිස්සු බොරු බිසී වෙච්ච ලෝකෙක, මහාචාර්ය පදවියට ඇප්ලිකේෂන් දාන්න ලකුණු එකතුවෙනවා නම් හැරෙන්න වෙන කිසිම දෙයකට සිහියක් නැති ඇකඩමික් ලෝකෙක, ලෝකය එක්ක හැල්මේ දිව්වේ නැති අපේ පරම්පරාවේ එකෙක් විපුල අයිය.
ආයේ මගේ කාමරේට එන්නේ නැහැ කියන එක තරමක් දරා ගන්න අමාරුයි විපුල අයියේ. මම කැම්පස් එකේ ඉන්න දවසට අනිවා හොයාගෙන ඇවිල්ල කතා කරපු එකෙක්. ඒ නිසා මේ වෙන්වීම අමාරු එකක්.
එකඟ නොවෙච්ච දහසකුත් දේවල් අස්සේ අයියත් මමත් හැමදාම එකඟ වෙච්ච එකම එක දෙයක් තිබ්බ. ඒ දේට මම එකඟ වෙද්දී අයියගේ ඇස් හැමදාම දීප්තිමත් උණා.
ඒ වචන හතර විපුල අබේරත්න සහෝදරයා වෙනුවෙන් මෙතන ලියල තියනවා.
අපි හයිය මිනිස්සු බං....
නිවන් සුව!
(ආචාර්ය මහේෂ් හපුගොඩ)
සමාජ හා දේශපාලන විශ්ලේෂක
(Mahesh Hapugoda ගේ ෆේස්බුක් පිටුවෙන්...)
