රොහාන් වැලිවිට අධ්‍යක්ෂණය කළ ‘මම තනියම’ ඉන්දියා චිකාගෝ ජාත්‍යන්තර සිනමා උලෙළෙහි හොඳ ම ජාත්‍යන්තර වෘත්තාන්ත චිත්‍රපටය ලෙස සම්මාන දිනා ගනී.
ප්‍රවීණ සිනමා අධ්‍යක්ෂ රොහාන් වැලිවිට අධ්‍යක්ෂණය කළ ‘මම තනියම’ (Mama Taniyama – I Am Alone) චිත්‍රපටය ඉන්දියා චිකාගෝ ජාත්‍යන්තර සිනමා උලෙළේ (India Chicago International Film Festival) ‘හොඳම ජාත්‍යන්තර වෘත්තාන්ත චිත්‍රපටය’ ට (Best International Feature Film) හිමි සම්මානය දිනාගෙන තිබේ.
ඉන්දියා චිකාගෝ ජාත්‍යන්තර සිනමා උලෙළ යනු ලොව පුරා සිටින සිනමා නිර්මාණකරුවන් ගේ දක්ෂතා ඇගයීමට ලක්කරන ජාත්‍යන්තර වේදිකාවකි.
මෙම සම්මානය ශ්‍රී ලාංකේය සිනමාවේ මෙන්ම රොහාන් වැලිවිටගේ සිනමා දිවියේ තවත් වැදගත් සන්ධිස්ථානයක් ලෙස සැලකිය යුතු ය.
‘මම තනියම’ ඔහු ගේ දෙවන සිනමා නිර්මාණය යි. මෙහි සිනමා නිර්මාණය සඳහා: චමීර ලියනගේ, නෙතලි නානායක්කාර, ගාමිණී ජයලත්, දුමී වන්නිආරච්චි, කුමාර කරුණානන්ද, නිමල් පල්ලෙවත්ත සහ සුදර්ශනී ගැලනිගම ඇතුළු රංගන ශිල්පීහු රැසක් රංගනයෙන් දායක වෙති.
චිත්‍රපටයේ කතා සංකල්පය, දෙබස් සහ තිර රචනය චන්දන සමරසේකරගෙනි. කැමරා අධ්‍යක්ෂණය ත්‍රිශුල දීප තඹවිට විසින් සිදුකර ඇති අතර, කලා අධ්‍යක්ෂණය චන්දන පීරිස්ගෙනි. නිෂ්පාදන සැලසුම්කරණය දීප්ති වීරසූරිය විසිනි. සංස්කරණය අනුෂ ජයවර්ධනගෙනි. වර්ණ සංයෝජනය ආනන්ද බණ්ඩාර විසිනි. සංගීත අධ්‍යක්ෂණය නවරත්න ගමගේ ගෙනි.
මාර්ක් ප්‍රනාන්දු සහ රජිත මනරම් චිසින් නිෂ්පාදය කරන ලද ' මම තනියම' ළඟදී ම මෙරට සිනමා හල්වල තිරගත වීමට නියමිත ය.
මූලාශ්‍ර - I cinema face book පිටුවෙන්