විදේශ ආයෝජන 55%කින් ඉහළට ගියත් ආර්ථික අර්බුදයට පෙර පැවති සැබෑ ඉදිකිරීම් වෙළෙඳපොළට ළඟාවීම තවමත් හීනයක්.
ශ්‍රී ලංකාවේ ආර්ථික අර්බුදයෙන් පසුව දරුණුතම කඩාවැටීමට ලක්වූ ඉදිකිරීම් ක්ෂේත්‍රය (Construction sector), 2025 වසර තුළ 9.2%ක කැපී පෙනෙන වර්ධනයක් වාර්තා කරමින් නැවත හිස ඔසවමින් පවතී. පොලී අනුපාත පහත වැටීම සහ විදේශීය ආයෝජන ගලා ඒම නිසා ක්ෂේත්‍රය තුළ නව ප්‍රාණවත් බවක් පෙන්නුම් කළද, කර්මාන්තයේ ප්‍රමුඛ සංඛ්‍යාලේඛනවලින් වැසී පවතින සැබෑ යථාර්ථය නම්, සමස්ත ඉදිකිරීම් ඉල්ලුම තවමත් ආර්ථික බිඳවැටීමට පෙර පැවති මට්ටමට වඩා සැලකිය යුතු ලෙස පහළින් පැවතීමයි.
සංඛ්‍යාලේඛනවල සුන්දර පැත්ත: ට්‍රිලියන 1.8ක ණය සෙල්ලම
පොලී අනුපාත ලිහිල් වීමත් සමඟ ඉදිකිරීම් සමාගම් වෙත ගලාගිය මූල්‍ය පහසුකම් මෙසේය.
වාර්තාගත ණය බර:
ඉදිකිරීම් සමාගම් ලබාගෙන ඇති බැංකු ණය ප්‍රමාණය 18.8%කින් ඉහළ ගොස් රුපියල් ට්‍රිලියන 1.81ක ඓතිහාසික මට්ටමකට ළඟා වී ඇත.
විදේශ ප්‍රාග්ධනය:
නිවාස, හෝටල් සහ වාණිජ දේපළ වෙළෙඳපොළ ඉලක්ක කරගත් සෘජු විදේශීය ආයෝජන (FDI) 55%කින් ඉහළ ගොස් ඩොලර් මිලියන 173ක් දක්වා වර්ධනය වී තිබේ.
ද්‍රව්‍ය සහ යන්ත්‍ර සූත්‍ර:
ගොඩනැඟිලි ද්‍රව්‍ය ආනයනය ඩොලර් බිලියන 1.02ක් දක්වා 9.7%කින් සහ බරපතළ යන්ත්‍ර සූත්‍ර ආනයනය 22%කින් ඉහළ ගොස් ඇත්තේ කෙටිකාලීන පරිභෝජනය වෙනුවට දිගුකාලීන ප්‍රාග්ධන ආයෝජන සිදුවන බව පෙන්වමිනි.
PMI දර්ශකය:
ක්ෂේත්‍රයේ සක්‍රීයභාවය මනින මිලදී ගැනුම්කරුවන්ගේ දර්ශකය (PMI) වසර පුරාම වර්ධන සීමාව ඉක්මවමින් සාමාන්‍ය අගය 59.1ක් ලෙස සනිටුහන් කර ඇත.
පොළොවේ යථාර්ථය: නවතන ලද ව්‍යාපෘති සහ සිමෙන්ති සීමාව
මෙම ක්ෂේත්‍රයේ ක්ෂණික පිබිදීමට හේතු වී ඇත්තේ අර්බුද සමයේ නැවතී තිබූ පැරණි මහා පරිමාණ ව්‍යාපෘති කිහිපයක් නැවත ආරම්භ වීමයි.
ව්‍යාපෘති නැවත ඇරඹීම:
මධ්‍යම අධිවේගී මාර්ගයේ කඩවත-මීරිගම කොටස, කොළඹ වරාය පුළුල් කිරීම, රජයේ නිවාස ව්‍යාපෘති සහ කොළඹ වරාය නගරයේ (Port City) නව ඉදිකිරීම් මීට සෘජුවම දායක වී ඇත.
සිමෙන්ති පරිභෝජනය:
මේ නිසා දේශීය සිමෙන්ති අලෙවිය 25.7%කින් ඉහළ ගොස් සමස්ත සිමෙන්ති පරිභෝජනය මෙට්‍රික් ටොන් මිලියන 5.29ක් දක්වා වැඩි වී තිබේ.
සැබෑ අර්බුදය:
කෙසේ වෙතත්, මෙම සිමෙන්ති පරිභෝජන පරිමාව තවමත් පවතින්නේ අර්බුදයට පෙර පැවති සාමාන්‍ය මට්ටමට වඩා බෙහෙවින් පහළිනි. පෙර පැවති ආයෝජන චක්‍රවලට සාපේක්ෂව නව යටිතල පහසුකම් ව්‍යාපෘති (New infrastructure developments) ආරම්භ වීම ඉතා අවම මට්ටමක පවතින අතර, දේශීය ඉදිකිරීම් සමාගම් සතු සැබෑ ධාරිතාවෙන් (Capacity utilization) උපරිම ප්‍රයෝජන ගැනීමට තවමත් අවස්ථාව ලැබී නැත.
ටෝකියෝ සිමෙන්ති සමාගමේ සභාපති ආචාර්ය හර්ෂ කබ්රාල් පෙන්වා දෙන්නේ පවතින මූල්‍ය විනය ඉදිරි ගමනට වේදිකාවක් තනා දුන්නද, ගෝලීය ආර්ථික පසුබෑම සහ භූ-දේශපාලනික ආතතීන් නිසා ඉදිරියේදී බාධා මතු විය හැකි බවයි. 2026 වසරේදී නිවාස හා වාණිජ ක්ෂේත්‍රයේ විදේශ ආයෝජන ඩොලර් මිලියන 210 දක්වා ඉහළ යනු ඇතැයි අපේක්ෂා කෙරේ. ඉදිරි සති කිහිපය තුළ නාගරික සංවර්ධන අධිකාරිය සහ ශ්‍රී ලංකා ආයෝජන මණ්ඩලය (BOI) ඒකාබද්ධව වරාය නගරය තුළ අලුතින් ඇරඹීමට නියමිත සුඛෝපභෝගී නිවාස සංකීර්ණ ව්‍යාපෘති 4ක මූලික සැලසුම් අනුමත කිරීමට නියමිතය.
(සටහන | සම්පත් ධීරසේකර )
මුලාශ්‍රය :
Record Construction Boom Masks Remaining Challenges beneath Recovery Story
