අමෙරිකාවේ ඔස්කාර් සම්මානලාභි ගායිකාවක් සහ නිළියක් වූ අයරින් කාරා මියගොස් තිබේ.
ෆ්ලොරීඩාහි නිවසේ සිටියදී ඇය මියගොස් ඇති අතර මරණයට හේතුව මෙතෙක් අනාවරණය වී නොමැති බව විදෙස් මාධ්‍ය වාර්තා කළේය.
මියයන විට 63 වන වියේ පසු වූ අයරින් ඔස්කාර් සහ ග්‍රෑමී ඇතුළු සම්මාන රැසක් හිමිකරගෙන තිබුණාය.
ඉංග්‍රීසි සහ ස්පාඤ්ඤ යන භාෂා ද්විත්වයෙන්ම ගීත ගායනා කිරීමේ විශේෂ හැකියාවක් ඇය සතුය.
1984 වර්ෂයේදී අයරින් හොඳම ගීතයට අදාළ ඔස්කාර් සම්මානය හිමිකරගෙන ඇති අතර 1981 වර්ෂයේදී ඇය හොඳම නිළිය වශයෙන් ගෝල්ඩන් ග්ලෝබ් සම්මානය හිමිකරගත්තාය.
