ක්‍රීඩා අමාත්‍යවරයා විසින් නිකුත් කරන ලද නව රෙගුලාසි අඩංගු ගැසට් පත්‍රය හේතුවෙන් මෙතෙක් ක්‍රීඩා සංගම් හා සම්මේලනවල මුල් බැස ගෙන සිටි නිලධාරීන් රැසකට ඉදිරියේ පැවැත්වෙන නිලවරණවලට ඉදිරිපත් විය නොහැකි වී ඇතැයි වාර්තා වේ.
මේ අනුව ශ්‍රී ලංකා ක්‍රිකට් ආයතනයේ දැනට මුල්පුටු දරණ බොහෝ දෙනකුට මෙවර නිලවරණයට ඉදිරිපත් වීමේ අවස්ථාව අහිමිවේ. සභාපති ෂම්මි ද සිල්වා දෙවරක්ම සභාපති ධූරය ඉසිලූ බැවින් නව රෙගුලාසි අනුව නැවත තරග කළ නොහැකිය. එසේම, උප සභාපතිවරයකු වන ජයන්ත ධර්මදාස හා ලේකම් මොහාන් ද සිල්වා වයස අවුරුදු 70 ට වැඩි වීම නිසාත්, උප සභාපති රවින් වික්‍රමරත්න අවුරුදු 8 ක් විධායක සභාවේ සිටීම නිසාත් යළි තරග කළ නොහැකි තත්ත්වයක් උදා වී තිබේ.
පාපන්දු සම්මේලනයේ හිටපු සභාපති ජැස්වර් උමාර්ටද මීට පෙර අමාත්‍යාංශයේ දූෂණ විමර්ෂණ ඒකකයක් මගින් වරදකරුවකු බවට නිර්දේශ කර ඇති බැවින් ඔහුටද යළි තරග කළ නොහැකිබව පැවසුන ද ඔහු පාපන්දු නිලවරණය සඳහා ඊයේ නාමයෝජනා බාර දී ඇත.
මලල ක්‍රීඩා සංගමයේ සභාපති පාලිත ප්‍රනාන්දු හා ලේකම් ප්‍රේමා පින්නවලටද වයස් මට්ටම හා ඉහළ නිලතල වල රැඳී සිටි කාල සීමාව නිසා යළි තරග කළ නොහැකි වී තිබේ.
ජාතික ඔලිම්පික් කමිටුවේ ලේකම් මැක්ස්වෙල් ද සිල්වාටද නව රෙගුලාසියට අනුව පිට පිට දෙවරක් ධූරයේ සිටි නිසා නැවත වරක් තරග කළ නොහැක.
බැඩ්මින්ටන් සංගමයේද සභාපති රොහාන් ද සිල්වා හා වූෂු සම්මේලනයේ සභාපති මානෙල් ධර්මකීර්තිටත් නැවත වතාවක් තරග කළ නොහැකි බව වාර්තා වේ.
මේ අතර තවත් කිහිප දෙනකුම නව රෙගුලාසිවලට අනුව වසර තුනක වත්කම් බැරකම් ප්‍රකාශයක් ඉදිරිපත් කළ යුතු බැවින් තම වත්කම් හෙළි දරව් වන නිසා ඉදිරිපත් නොවී සිටීමට තීරණය කර ඇත. ක්‍රිකට් ආයතනයේද මෙවැන්නන් කිහිප දෙනකුම සිටින බවත් වාර්තාවේ .
ක්‍රීඩා ඇමතිවරයාගේ මෙම පියවර තුලින් ක්‍රීඩා ක්ෂේත්‍රයට බොහෝ යහපත් ප්‍රතිඵල ක්‍රීඩාවට උදා කරනු ඇතැයි ඇතැමුන් පැවසුවද තවත් පිරිස් මෙම ගැසට් නිවේදනය දැඩි ලෙස විවේචනය කර ඇත්තේ එය අමාත්‍ය උපදේශක අර්ජුන රණතුංග විසින් ඇමතිවරයා නොමග යවමින් ක්‍රීඩාවට සිදුකර ඇති බරපතල හානියක් ලෙසිනි.
ඇතැම් ක්‍රීඩා සමාජ මෙම ගැසට් නිවේදනයට එරෙහිව අධිකරණයට යාමට දැනටම පියවර ගනිමින් සිටින බව වාර්තාවේ.
ක්‍රීඩා ඇමතිවරයා විසින් ප්‍රකාශයට පත්කර ඇති ගැසට් නිවේදන පහතින්
ගැසට් නිවේදන 2310/26
(උපුටා ගැනීම් - lankasara.com)
සබැඳි පුවත් :
ක්‍රීඩා පනත සංශෝධනය කෙරේ : ක්‍රීඩා සංගම්වලට තහංචි පැනවේ!
ක්‍රීඩා ඇමති ගේමට බසී - ක්‍රීඩා සම්මේලන තනතුරු වලට සිමා පනවයි !
