ඒ අනුව සමාජ මාධ්‍ය භාවිතයේදී වඩා කල්පනාකාරී වන ලෙස පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතා මහජනතාව ගෙන් ඉල්ලා සිටියේය.
පොලිස් මාධ්‍ය ප්‍රකාශකවරයා එම ඉල්ලීම සිදුකළේ ආරක්ෂක අමාත්‍යාංශයේ මාධ්‍ය කේන්ද්‍රයේ ඊයේ (27) පැවැත්වූ මාධ්‍ය හමුවකදීය.
පොලිස් මාධ්‍ය ප්‍රකාශකවරයාගේ ප්‍රකාශය
වෛරී ප්‍රකාශනවලට වැට බැඳීම පිණිස පවතින නීතියේ විධි විධාන පවතින නමුත් රජය හෝ ආරක්ෂක අංශ මෙතෙක් ඒ සම්බන්ධයෙන් කටයුතු නොකිරීම පිළිබඳව සමාජ ක්‍රියාකාරීන් ගෙන් දැඩි විවේචනයක් එල්ලවී ඇත.
වෛරී ප්‍රකාශන තවදුරටත් සමාජ ජාල වෙබ් අඩවි ඔස්සේ පළ කෙරෙමින් ඇතැයි ෆේස්බුක් පරිවර්තන සමූහය පවසයි. එහි සභාපති රජිව් යසිරු සහ එම සමූහයේ සාමාජිකයෙකු වන ඉසුරු චාමර මේබව කියා සිටියේ 'නෙත් එෆ් එම් අන්ලිමිඩට් කණපිට' වැඩසටහනට එක්වෙමිනි.
මෙම වැඩසටහනට එක්වූ ජ්‍යෙෂ්ඨ මාධ්‍යවේදී ආරියනන්ද දොඹගහවත්ත මහතා පෙන්වා දුන්නේ සමාජ මාධ්‍ය ජාල ඔස්සේ වර්තමානයේ ඇති වී ඇති ගැටලූවලට දේශපාලනඥයන් වගකිව යුතු බවයි.
රජය විවේචනය වෛරී ප්‍රකාශන නොවේ !
කෙසේවුවද Facebook තුලින් රජය, ජනාධිපතිවරයා හා අගමැති විවේචනය කිරීම වෛරී ප්‍රකාශන නොවන බවත් ආන්ඩුක්‍රම ව්‍යවස්ථාවෙන් ලබා දී ඇති භාෂණයේ හා ප්‍රකාශනයේ නිදහස මූලික අයිතිවාසිකමක් බවත් නීතීඥ මනෝජ් ගමගේ මහතා පවසයි.
ෆේස්බුක් සමාගමෙන් ඉල්ලීමක්
ෆේස්බුක් සමාජ ජාලය තුළ සිංහල භාෂාවෙන් පළකෙරෙන වෛරී ප්‍රකාශන නිරීක්ෂණය සහ වාර්තා කිරීම පිණිස උපකාර කරන්නැයි ෆේස්බුක් සමාගම ශ්‍රී ලංකාවේ සමාජ ජාල විශ්ලේෂකයන් පිරිසක ගෙන් මිට ඉහතදී ඉල්ලීමක් කර තිබිණ.
යුධන්ජය විජේරත්න, ග්‍රවුන්ඩ්වීව්ස් වෙබ් අඩවියේ සම කර්තෘ සංජන හත්තොටුව සහ සමාජ ජාල විශ්ලේෂක නාලක ගුණවර්ධන යන මහත්වරුන් වෙත එම ඉල්ලීම සිදුකර තිබිණ.
ෆේස්බුක් ජාලයේ ප්‍රකාශයට පත්වන වෛරී අදහස් ඉවත් කිරීම සිදුවන්නේ ඉතා මන්දගාමීව බව විදුලි සංදේශ අමාත්‍ය හරින් ප්‍රනාන්දු මහතා ද මීට ඉහතදී ප්‍රකාශකර තිබිණ.
මුස්ලිම් ප්‍රජාව ඉලක්ක කර ගනිමින් ආගමික පදනමින් හිරිහැර සිදු කරනු ලැබීම සම්බන්ධයෙන් චෝදනා ලද 'බ්‍රිට්න් ෆස්ට්' (Britain First) අන්ත දක්ෂිණාංශික සංවිධානයේ ගිණුම් අත්හිටුවීමට ෆේස්බුක් සහ ට්විටර් සමාගම මිට ඉහතදී පියවර ගෙන තිබිණ.