බන්ධනාගාර සිරදඬුවමින් නිදහස් කරනු ලැබූවේ ඇයිද යන කාරණය මේවනවිට දේශපාලන ක්ෂේත්‍රයේ දැඩි ලෙස කතාබහට ලක්වෙමින් තිබේ.
අධිකරණයට අපහාස කළ බවට එල්ල වූ චෝදනා හතරකට 2018 අගෝස්තු 08 වෙනිදා වරදකරු කෙරුණු ඥානසාර හිමිට වසර 19 ක සිරදඬුවමක් නියම කළ අභියාචනාධිකරණය එකී දඬුවම වසර 6 කින් ගෙවී යන සේ දඬුවම් නියම තිබියදී ජනාධිපතිවරයා උන්වහන්සේට පසුගිය 23 දිනයේ සමාවක් ප්‍රධානය කරනු ලැබුවේ ඇතැමුන්ගේ බරපතල විරෝධතාවයන් ද නොතකා හරිමිනි.
ජනාධිපතිවරයා පසුගිය වෙසක් පොහෝද වැලිකඩ බන්ධනාගාර රෝහලට ගොස් සිරගත කර සිටි ඥානසාර හිමියන් බැහැදුටු අතර දෙදෙනා අතර රහස් සාකච්ජාවක් ද පවත්වා තිබිණ.
එහිදී ඇතිවූ එකඟතාවයන් මෙතෙක් ප්‍රකාශයට පත්ව නැතත් යළිත් ජනාධිපතිවරණයට ඉදිරිපත්වීමට අපේක්ෂාකරන මෛත්‍රීපාල සිරිසේන මහතා දේශපාලන වාසි ලබාගැනීමට මෙවැනි තීරණයක් ගත්බවට චෝදනා එල්ල වෙමින් තිබේ.
ගෝඨාභය රාජපක්ෂ මහතාගේ හිතවතුන් පවසන්නේ ඥානසාර හිමියන් නිදහස් කළේ ගෝඨාභය රාජපක්ෂ මහතාගේ ඡන්ද ව්‍යාපාරය දුර්වල කිරීම සඳහා බවයි.
''ගෝඨා හිටියා නම් මේ ප්‍රශ්ණෙ අවුරුදු තුනෙන් ඉවර කරනවා ''
කෙසේවුවද ඊයේ (27) රාත්‍රී 'හිරු' නාලිකාවේ පැවති සජීවී සංවාදයකට එක්වෙමින් ඥානසාර හිමියන් ගෝඨාභය රාජපක්ෂ මහතාව ඉහලින්ම වර්ණනා කළහ. ''ගෝඨාභය හිටියා නම් මේ ප්‍රශ්ණෙ අවුරුදු තුනෙන් ඉවර කරනවා. ඒ මනුස්සයා විතරයි මට ඇහුම්කම් දුන්නේ'' උන්වහන්සේ එහිදී වැඩිදුරටත් පැවසුහ.
වීඩියෝ - ඥානසාර හිමියන්ගේ ප්‍රකාශය
''කුමන්ත්‍රණය හරිහැටි හඳුනාගන්න''
කෙසේවෙතත් විමල් විරවංශ මහතාගේ ජාතික නිදහස් පෙරමුණ පවසන්නේ, ගලගොඩඅත්තේ ඥානසාර හිමියන්ට නිදහස ලබාදී උන්වහන්සේව යම්කිසි අයුරකින් කොටුකරගැනීමේ සැලසුමක් පවතින බවට සැක පහළ වී ඇති බවයි.
එහි තරුණ කටයුතු ලේකම් පාර්ලිමේන්තු මන්ත්‍රි පද්ම උදයශාන්ත ගුණසේකර පැවැසුවේ උන්වහන්සේට නිදහස ලබාදීම යන කාරණය ඉතා පැහැදිලි මනසින් සහ නුවණින් උන්වහන්සේම තේරුම් ගතයුතුව පවතින බවයි.
මේ අවස්ථාවේදී තමන් වහන්සේව නිදහස් කිරීමට පියවර ගැනීම, එදා උන්වහන්සේ ඇතුළු භික්ෂුන්ට අන්තවාදීන් යැයි ඇඟිල්ල දිගු කළ අසාද් සාලි වැන්නවුන් උන්වහන්සේට නිදහස දෙන ලෙස පවසමින් බන්ධනාගාරයට පැමිණීම මෙන්ම තමන් වහන්සේ හිතන ලෙසට කිසිදු හේතුවක් නොමැතිව තමන් වහන්සේ සිරගත කළේ ඇයි? යන ප්‍රශ්නවලට තමන් වහන්සේම පිළිතුරු සපයා ගත යුතුයැයි ද හෙතෙම පැවැසීය.
රට, ජාතිය, බුද්ධශාසනය ආරක්ෂා කිරීමට උන්වහන්සේගේ ශක්තිය සහ ජවය තවදුරටත් අවශ්‍ය හෙයින් කුමන්ත්‍රණය හරිහැටි හඳුනාගෙන කටයුතු කරන ලෙස ගෞරවයෙන් උන්වහන්සේගෙන් ඉල්ලා සිටින බවද ඔහු කීවේය.
ජාතික නිදහස් පෙරමුණු පක්ෂ කාර්යාලයේ පැවැති මාධ්‍ය හමුවකදී ඔහු එසේ පැවැසීය.
සබැඳි පුවත් :
ඥානසාර හිමි පොදු අපේක්ෂකයා කරමු ! - සමාජ මාධ්‍ය කතිකාවක් !!