එම වන අලි කළමනාකරණ කලාපය සම්බන්ධයෙන් රෙගුලාසි මාලාවක් සකස් කර ගැසට් කරන ලෙස ගොනු කළ මූලික අයිතිවාසිකම් පෙත්සමක් අද කැඳවූ අවස්ථාවේදී නීතිපතිවරයා වෙනුවෙන් පෙනී සිටි රජයේ නියෝජ්‍ය සොලිසිටර් ජෙනරාල් ආචාර්ය අවන්ති පෙරේරා මේ බව දන්වා සිටියාය.
අග විනිසුරු ප්‍රීති පද්මන් සූරසේන, අචල වෙංගප්පුලි සහ ප්‍රියන්ත ප්‍රනාන්දු යන ශ්‍රේෂ්ඨාධිකරණ විනිසුරු මඩුල්ල හමුවේ මෙම පෙත්සම කැඳවන ලදි.
අදාළ ගැසට් නිවේදනය මේ වන විට සකස් කර ඇති බවත් අතර එහි පිටපතක් අධිකරණයට ඉදිරිපත් කරන බව එහිදී වග උත්තරකරුවන් වෙනුවෙන් පෙනී සිටි නියෝජ්‍ය සොලිසිටර් ජෙනරාල් ආචාර්ය අවන්ති පෙරේරා අධිකරණයට දැනුම් දුන්නාය.
පෙත්සම්කාර පාර්ශ්වය වෙනුවෙන් පෙනී සිටි නීතිඥ රවීන්ද්‍රනාත් දාබරේ, එහිදී කියා සිටියේ එම රෙගුලාසි පිළිබඳව අධ්‍යයනය කර කරුණු දැක්වීම ට අපේක්ෂා කරන බව ය.
ඒ සඳහා කල් ලබාදෙන ලෙස ඔහු අධිකරණයෙන් ඉල්ලා සිටි අතර ඊට විනිසුරු මඩුල්ල අවසර ලබා දුන්නේ ය.
හම්බන්තොට වන අලි කළමනාකරණ කලාපය තුළ සිදු කළ හැකි සහ සිදු කළ නොහැකි කරුණු ඇතුළත් ගැසට් නිවේදනයක් නිකුත් කරන ලෙස ඉල්ලා පරිසර යුක්ති කේන්ද්‍රය සහ අදාල ප්‍රදේශවාසීන් විසින් මෙම පෙත්සම ගොනු කර තිබුණි.
(සටහන | නෙල්කා මැදගෙදර)
අධිකරණ වාර්තාකාරිනී
nelindum41@gmail.com
