එක්සත් ජාතින්ගේ ආහාර හා කෘෂිකාර්මික සංවිධානය මේ බව අවධාරණය කරන්නේ ‘2026 මැදපෙරදිග ගැටුමෙන් ඇති වන ගෝලීය කෘෂි හා ආහාර පද්ධතිවල බලපෑම් මැයෙන්’ සිය නවතම වාර්තාව එළිදක්වමිනි.
ඉරානය සහ මැදපෙරදිග ප්‍රදේශයේ ගැටුම තවත් තීව්‍ර වීමෙන් ගෝලීය බලශක්ති, පොහොර සහ කෘෂි-ආහාර පද්ධති සඳහා අවදානම වර්ධනය කර ඇතැයි ද තෙල්, වායු සහ පොහොර සඳහා අත්‍යවශ්‍ය මාර්ගයක් වන හෝර්මුස් සමුද්‍ර සන්ධිය බාධාවන්ට ලක්වීමෙන් ලෝකය පුරා ශක්ති හා කෘෂිකාර්මික වියදම් ඉහළ ගොස් ඇතැයි ද එම වාර්තාවේ දැක්වේ.
පොහොර හිඟය සහ බලශක්ති මිල ඉහළ යාම අස්වැන්නට තර්ජනයක් වන අතර විදේශ ආදායම් අඩුවීම සහ ජෛව ඉන්ධන නිෂ්පාදන කටයුතුවලට යොදාගැනීම ආහාර මිලවල අස්ථාවරතාවය වැඩි කළ හැකි යැයි ද එහි සඳහන් වේ.
මෙය විශේෂයෙන් අප්‍රිකාව, ආසියාව සහ ආනයන මත පදනම් වූ රටවලට බලපාන බව පවසන ආහාර හා කෘෂිකර්ම සංවිධානය මේ නිසා සැපයුම් දාම ස්ථාවර කිරීමට වහාම ක්‍රියාමාර්ග අවශ්‍ය වන බව අවධාරණය කරයි.
ඒ සඳහා විකල්ප වෙළඳ මාර්ග සංවර්ධනය, වෙළඳපොළ නිරීක්ෂණය ශක්තිමත් කිරීම, ගොවීන්ට ආර්ථික සහාය ලබා දීම සහ අවදානම් රටවලට ඉලක්කගත ආධාර සැපයීම වැදගත් බව ද එම වාර්තාවේ සඳහන් වේ.
තවද දිගුකාලීන උපායමාර්ග ලෙස දේශීය කෘෂිකර්මය, තිරසාර පොහොර නිෂ්පාදනය, නවීන ශක්ති සහ ව්‍යුහමය වෙනස්කම් කෙරෙහි අවධානය යොමු කළ යුතු අතර, හෝර්මුස් සමුද්‍ර සන්ධිය නැවත විවෘත කිරීම සඳහා රාජ්‍යතාන්ත්‍රික උත්සාහයන් ගෝලීය ශක්ති සහ ආහාර ආරක්ෂාව සඳහා අත්‍යවශ්‍ය යැයි එහි වැඩිදුරටත් සඳහන් වේ.
(සටහන | ගිම්හාන් ද සිල්වා)
