මැදපෙරදිග යුද්ධයෙන් යූරියා පොහොර මිලත් අහසට !

නවතම දත්තවලට අනුව, එක්සත් ජනපදයේ නිව් ඕර්ලියන්ස් (New Orleans) වෙළෙඳපොළේ කැටිති යූරියා (Granular Urea) ටොන් එකක මිල ඇමෙරිකානු ඩොලර් 660 දක්වා වාර්තාගත ලෙස ඉහළ ගොස් ඇත.

මෙය සාමාන්‍ය මිල ගණන්වලට සාපේක්ෂව 89%ක දැවැන්ත වැඩිවීමක් වන අතර, වසර තුනකට අධික කාලයකින් පසු ලෝක පොහොර මිල මෙතරම් ඉහළ ගිය පළමු අවස්ථාව ද මෙය වේ.

මෙම මිල ඉහළ යාමට ප්‍රධානතම හේතුව වී ඇත්තේ, ලෝක තෙල් සහ පොහොර සැපයුමේ ප්‍රධානතම නාවික මාර්ගය වන ‘හෝමූස් සමුද්‍ර සන්ධිය’ (Strait of Hormuz) ඉරාන යුද අවදානම හේතුවෙන් මේ වන විට අවහිර වී තිබීමයි. මේ නිසා මැදපෙරදිග කලාපයෙන් ලෝකයට කෙරෙන පොහොර නැව්ගත කිරීම් විශාල වශයෙන් අඩාල වී ඇති අතර, නෞකා සඳහා වන රක්ෂණ ගාස්තු ද අතිශයින් ඉහළ ගොස් තිබේ.

ඊට අමතරව, ලෝකයේ ප්‍රධානතම පොහොර අපනයනකරුවෙකු වන චීනය ද සිය දේශීය වෙළෙඳපොළ ආරක්ෂා කර ගැනීම සඳහා මේ වන විටත් පොහොර අපනයනය සීමා කිරීමට පියවර ගැනීම මෙම අර්බුදය තවත් උග්‍ර කිරීමට සෘජුවම බලපා ඇත.

ලෝක පොහොර මිල මෙලෙස ශීඝ්‍රයෙන් ඉහළ යාම, ගෝලීය කෘෂිකර්මාන්තයට සහ ආහාර නිෂ්පාදන පිරිවැයට දැඩි ලෙස බලපාන බැවින් ඉදිරියේදී දැවැන්ත ආහාර උද්ධමනයක් නිර්මාණය වීමේ අවදානමක් පවතින බවට ආර්ථික විශ්ලේෂකයෝ අනතුරු අඟවති.

මීට පෙර 2022 වසරේදී රුසියානු-යුක්‍රේන යුද්ධය ආරම්භ වූ සමයේදී ද යූරියා ටොන් එකක මිල ඩොලර් 910 දක්වා ඉහළ ගොස් ලොව පුරා බරපතල ආහාර අර්බුදයක් නිර්මාණය විය.

වත්මන් මැදපෙරදිග අර්බුදය කඩිනමින් සමනය නොවුවහොත්, 2022 වසරේ මුහුණ දුන් එම බියකරු ගෝලීය ආහාර අර්බුදයට ලෝකයට යළිත් මුහුණ දීමට සිදුවනු ඇතැයි විශේෂඥයෝ පෙන්වා දෙති.

| lankalokaya.lk