මැදපෙරදිග නොසන්සුන්තාව මැද විදේශ ප්‍රේෂණ ඉහළට; ආර්ථිකයේ අවදානම් තවමත් එලෙසම !

මහ බැංකු දත්තවලට අනුව මාර්තු මාසයේ නිල ප්‍රේෂණ ප්‍රමාණය ඇමරිකානු ඩොලර් මිලියන 814.8ක් දක්වා සියයට 17.5කින් වර්ධනය වී තිබේ.

2026 වසරේ පළමු කාර්තුව තුළ සමස්ත ප්‍රේෂණ ලැබීම් ඩොලර් බිලියන 2.29ක් වන අතර එය පසුගිය වසරේ අදාළ කාලයට සාපේක්ෂව සියයට 26.5ක වර්ධනයකි. විදේශ විනිමය අනුපාතිකයේ පවතින ස්ථාවරත්වය හේතුවෙන් උණ්ඩියල් සහ හවාලා වැනි අවිධිමත් මාර්ග වෙනුවට නිල බැංකු පද්ධතිය කෙරෙහි විදේශගත ශ්‍රමිකයන්ගේ විශ්වාසය තහවුරු වී ඇති බව මෙයින් පෙනී යයි.

2021-2022 සමයේ පැවති සමාන්තර විනිමය අනුපාත ක්‍රමය ඉවත් කිරීම මෙම වර්ධනයට මූලික හේතුව විය. එවකට නිල අනුපාතය සහ කළු කඩයේ අනුපාතය අතර පැවති දැඩි පරතරය නිසා ශ්‍රමිකයන් බැංකු ක්‍රමයෙන් ඉවත් වී සිටියද, 2022 අප්‍රේල් මාසයෙන් පසු සිදු කළ ප්‍රතිපත්තිමය වෙනස්කම් සමඟ එම තත්ත්වය සමනය විය.

එසේ වුවද, මැදපෙරදිග කලාපයේ යුදමය තත්ත්වයක් උත්සන්න වුවහොත් රැකියා අවස්ථා අහිමි වීම, වැටුප් ගෙවීම් ප්‍රමාද වීම හෝ ශ්‍රමිකයන් යළි මෙරටට ගෙන්වා ගැනීමට සිදු වීම වැනි අවදානම් පවතී. එමෙන්ම මෙරට දක්ෂ වෘත්තිකයන් විදේශගත වීම කෙටි කාලීන විදේශ විනිමය වාසියක් වුවද, එය දේශීය ශ්‍රම වෙළෙඳපොළට දිගුකාලීන අහිතකර බලපෑමක් එල්ල කරයි.

ශ්‍රී ලංකාවේ විදේශ සංචිත ශක්තිමත් කිරීමට මෙම ප්‍රේෂණ විශාල දායකත්වයක් ලබා දුන්නද, බාහිර කම්පනයන්ට මුහුණ දීමේ හැකියාව තවමත් පවතින්නේ අවම මට්ටමක බව ආර්ථික විශ්ලේෂකයෝ පවසති.

මුලාශ්‍රය :

Remittance Surge Defies Gulf Tensions, Masks Sri Lanka Fragile Recovery