මේ හේතුවෙන් යුරෝපා වෙළෙඳපොළ වෙත කෙරෙන ශ්‍රී ලාංකීය කෘෂි අපනයන සුරක්ෂිත කිරීම සඳහා රජය විසින් වහාම ක්‍රියාත්මක වන පරිදි දැඩි කොන්දේසි පැනවීමට පියවර ගෙන ඇත.
ඒ අනුව, යුරෝපා සංගමයේ රටවල් ඉලක්ක කර ගනිමින් අපනයනය කෙරෙන සියලුම නැවුම් පළතුරු සහ එළවළු, ශ්‍රී ලංකා යහපත් කෘෂිකාර්මික පිළිවෙත් (SL-GAP) මාර්ගෝපදේශ යටතේ වගා කිරීම, සකස් කිරීම සහ සහතික කිරීම අනිවාර්ය කිරීමට කැබිනට් මණ්ඩලයේ අනුමැතිය හිමිව තිබේ.
කෘෂිකර්ම, පශු සම්පත්, ඉඩම් සහ වාරිමාර්ග අමාත්‍ය කේ. ඩී. ලාල්කාන්ත විසින් ඉදිරිපත් කරන ලද මෙම හදිසි යෝජනාවට අනුව, මින් ඉදිරියට අපනයන කටයුතු සිදු කළ හැක්කේ ලියාපදිංචි අපනයනකරුවන්ට සහ අනුමත ඇසුරුම් මධ්‍යස්ථාන හරහා පමණි.
යුරෝපීය කොමිසමේ සෞඛ්‍ය හා ආහාර සුරක්ෂිතතා නියාමන අධිකාරිය පෙන්වා දෙන්නේ ලංකාවෙන් එවන ලද ඇතැම් කෘෂි නිෂ්පාදනවල රසායනික ද්‍රව්‍ය අගය, ඔවුන්ගේ උපරිම අවශේෂ සීමාවන් (MRLs) ඉක්මවා ගොස් ඇති බවයි. මෙය පාරිභෝගික සෞඛ්‍යයට දැඩි අවදානමක් බවට වර්ගීකරණය කර ඇති බැවින්, මින් ඉදිරියට ශ්‍රී ලංකාව නීති රීති උල්ලංඝනය කළහොත් සමස්ත වෙළෙඳපොළ තහනමකට හෝ දැඩි පරීක්ෂාවන්ට ලක්වීමේ අවදානමක් පවතී.
ඩොලර් මිලියන 27ක යුරෝපා වෙළෙඳපොළ රැකගන්න SL-GAP සහතිකය අනිවාර්ය කෙරේ
මෙරට සමස්ත වෙළෙඳ භාණ්ඩ අපනයනයෙන් හතරෙන් පංගුවකට වඩා වැඩි ප්‍රමාණයක් හිමිකර ගන්නේ යුරෝපා සංගමයයි. ආර්ථික දත්තවලට අනුව, 2026 අප්‍රේල් මාසයේදී පමණක් යුරෝපා රටවලට කළ අපනයන ආදායම ඇමරිකානු ඩොලර් මිලියන 224.42ක් දක්වා 5%කින් වර්ධනය වී තිබේ. වසරේ මුල් මාස හතර තුළ මුළු අපනයන ආදායම ඩොලර් බිලියනයකට ආසන්න වී ඇති අතර, ඉන් ඩොලර් මිලියන 27.5ක්ම උපයා ඇත්තේ පළතුරු සහ එළවළු අපනයනයෙනි.
කෙසේ වෙතත්, නව SL-GAP සහතිකකරණය සහ දැඩි විද්‍යාගාර පරීක්ෂණ හේතුවෙන් අපනයනකරුවන්ගේ මෙහෙයුම් පිරිවැය ඉහළ යා හැකි බව ක්ෂේත්‍රයේ විශ්ලේෂකයෝ පවසති. එමෙන්ම, යුරෝපා සංගමයේ නව නීති බලාත්මක වීමට පෙර, මෙරට සුළු පරිමාණ ගොවීන්ට තාක්ෂණික දැනුම සහ අවශ්‍ය සම්පත් කඩිනමින් ලබාදීමට රජය කටයුතු කළ යුතු බවද ඔවුහු අවධාරණය කරති.
