ශ්‍රී ලංකා පරිපාලන සේවයේ ජ්‍යෙෂ්ඨ නිලධාරියෙකුගේ මූලික මිනිස් අයිතිවාසිකම් උල්ලංඝනය කර ඇති බවට ශ්‍රේෂ්ඨාධිකරණය විසින් ඔහුට එරෙහිව තීන්දුවක් ලබාදීමෙන් අනතුරුව ලේකම්වරයා මෙම පියවර ගෙන ඇත.
සිය ඉල්ලා අස්වීමේ තීරණය සම්බන්ධයෙන් මහාචාර්ය කපිල පෙරේරා ජනාධිපති අනුර කුමාර දිසානායක දැනුම්වත් කර ඇති අතර, ලේකම් ධුරයෙන් ඉවත් වන බව රාජ්‍ය පරිපාලන, පළාත් සභා හා පළාත් පාලන අමාත්‍යාංශයට ද නිල වශයෙන් දන්වා තිබේ.
විශ්වවිද්‍යාල සේවයේ සිට රාජ්‍ය සේවයට පැමිණි ඔහුගේ රාජ්‍ය සේවා කාලය අවසන් වීමත් සමඟ මෙලෙස ඉල්ලා අස්වීමට තීරණය කර ඇති අතර, ඔහු යළිත් විශ්වවිද්‍යාල සේවයට එක්වීමට නියමිතය. මහාචාර්ය කපිල පෙරේරා මීට පෙර මොරටුව විශ්වවිද්‍යාලයේ උපකුලපතිවරයා ලෙස ද කටයුතු කර ඇත.
නඩුවට පසුබිම් වූ හේතුව
ප්‍රවාහන අමාත්‍යාංශයේ අතිරේක ලේකම්වරයෙකු ලෙස රාජ්‍ය සේවා කොමිෂන් සභාව විසින් නීත්‍යානුකූලව පත් කර සිටි, වසර 30ක සේවා පළපුරුද්දක් සහිත විශේෂ ශ්‍රේණියේ නිලධාරියෙකු වන ඩබ්ලිව්.එස්. සත්‍යානන්ද විසින් මෙම පෙත්සම ඉදිරිපත් කර තිබුණි.
2024 දෙසැම්බර් 18 වන දින පෙත්සම්කරු අදාළ තනතුරේ වැඩ භාරගෙන සිටි අවස්ථාවේදී, එදිනම දහවල් කාලයේ කාර්යාලයට පැමිණි අමාත්‍යාංශ ලේකම්වරයා, ඔහුගේ සේවය අවශ්‍ය නොවන බැවින් වහාම කාර්යාලයෙන් පිටව යන ලෙස දැනුම් දී ඇත. මෙම අත්තනෝමතික ක්‍රියාව හේතුවෙන් තමා දැඩි අවමානයට සහ මානසික කනස්සල්ලට පත් වූ බවත්, එමඟින් සිය මූලික අයිතිවාසිකම් උල්ලංඝනය වූ බවත් පවසමින් පෙත්සම්කරු අධිකරණයේ පිහිට පතා තිබුණි.
ශ්‍රේෂ්ඨාධිකරණ තීන්දුව
ආචාර්ය සෝභිත රාජකරුණා සහ ජනක් ද සිල්වා යන ශ්‍රේෂ්ඨාධිකරණ විනිසුරුවරුන්ගේ එකඟත්වය ඇතිව, විනිසුරු අර්ජුන ඔබේසේකර විසින් මෙම නඩු තීන්දුව ප්‍රකාශයට පත් කරන ලදී.
ව්‍යවස්ථාපිත බලතල උල්ලංඝනය කිරීම:
රාජ්‍ය සේවා කොමිෂන් සභා රීතිවලට අනුව අතිරේක ලේකම්වරුන් පත් කිරීමේ පූර්ණ බලය ඇත්තේ රාජ්‍ය සේවා කොමිසමට පමණක් බව අධිකරණය පෙන්වා දුන්නේය. ලේකම්වරයා කොමිසමේ තීරණවලට බලපෑම් කරමින් එහි බලතලවලට මැදිහත් වී ඇති බව තීන්දු විය.
නීතිය ඉදිරියේ සමානත්වයේ අයිතිය:
මෙම ක්‍රියාව මඟින් ආණ්ඩුක්‍රම ව්‍යවස්ථාවේ 12(1) ව්‍යවස්ථාවෙන් සහතික කර ඇති නීතිය ඉදිරියේ සමාන සැලකිලි ලැබීමේ අයිතිය උල්ලංඝනය වී ඇති බව අධිකරණය අවධාරණය කළේය.
රාජ්‍ය නිලධාරීන්ගේ භාරකාරිත්වය:
රාජ්‍ය නිලධාරීන් යනු ජනතාවගේ භාරකරුවන් වන බැවින් ඔවුන් තමන්ට පැවරී ඇති බලතල විශ්වාසය මත ක්‍රියාත්මක කළ යුතු බව අධිකරණය මතක් කර දුන් නමුත්, මෙම සිදුවීම වෙනුවෙන් වන්දි හෝ නඩු ගාස්තු ගෙවන ලෙසට නියෝගයක් නිකුත් නොකිරීමට තීරණය කළේය.
සබැඳි පුවත් :
අමාත්‍යාංශ ලේකම්වරයෙකු මූලික අයිතිවාසිකම් උල්ලංඝනය කළ බවට තීන්දුවක්
