ජනාධිපතිවරයා මේ බව අවධාරණය කළේ අද (29) පස්වරුවේ මධ්‍යම අධිවේගී මාර්ගයේ තෙවන කොටසේ (රඹුක්කන සිට ගලගෙදර දක්වා) ඉදිකිරීම් කටයුතුවලට එක්වෙමිනි.
ලෝකයේ විවිධ කලාපයන්හි මතුවන අර්බුද හේතුවෙන් ඉදිරියේදී ඩොලර් සංචිත පිළිබඳ ගැටලු මතුවීමේ අවදානමක් පවතින බව පෙන්වා දුන් ජනාධිපතිවරයා, ඊට මුහුණ දීම සඳහා ශක්තිමත් ආර්ථික සැලසුම් ක්‍රියාත්මක කළ යුතු බව සඳහන් කළේය.
"ඩොලර් ප්‍රශ්නයක් මතුවීමේ අවදානමක් තිබෙනවා. ක්ෂණිකව වෙනත් කලාපයක ඇතිවන අර්බුදයකට වුවත් මුහුණ දිය හැකි මට්ටමේ ආර්ථිකයක් අප ගොඩනැගිය යුතුයි. ඒ සඳහා සෘජු විදෙස් ආයෝජන රැගෙන ඒම අත්‍යවශ්‍යයි," යැයි ජනාධිපතිවරයා පැවසීය.
විදේශ ආයෝජන මෙරටට ගලා ඒමට පවතින බාධාවන් ඉවත් කිරීම කෙරෙහි රජයේ දැඩි අවධානය යොමුව ඇති බවත්, රාජ්‍ය යාන්ත්‍රණයේ පවතින අබල දුබලතා මෙන්ම ඉඩම් නිදහස් කිරීමේ ක්‍රියාවලියේ පවතින ගැටලු ඊට හේතු වී ඇති බවත් ඔහු පෙන්වා දුන්නේය.
මෙම බාධාවන් මැඩපවත්වා ආයෝජකයින් දිරිමත් කිරීම සඳහා ගතයුතු ප්‍රධාන පියවර දෙකක් පිළිබඳවද ජනාධිපතිවරයා මෙහිදී අනාවරණය කළේය:
ආයෝජන ආරක්ෂණ පනත:
ආයෝජකයින්ගේ ආරක්ෂාව තහවුරු කිරීම සඳහා වන විශේෂ පනතක් ඉතා ඉක්මනින් පාර්ලිමේන්තුවේදී සම්මත කිරීමට සැලසුම් කර ඇත.
තනි කවුළුවේ යාන්ත්‍රණය (Single Window System):
ආයෝජකයින්ට තමන්ගේ සියලුම පරිපාලන සහ නීතිමය කටයුතු එකම ස්ථානයකින් පහසුවෙන් කර ගැනීම සඳහා "තනි කවුළුවක්" නිර්මාණය කිරීමට අපේක්ෂා කෙරේ.
එමෙන්ම, මෙරට සමස්ත අපනයනවලින් 25%ක්ම ඇමෙරිකා එක්සත් ජනපදය පදනම් කරගෙන පවතින බැවින්, එම අවදානම අවම කරගැනීම සඳහා අපනයන වෙළෙඳපොළ තවත් රටවල් ගණනාවක් කරා විවිධාංගීකරණය කළ යුතු බවද හෙතෙම පැවසීය.
භාණ්ඩ විවිධාංගීකරණය මෙන්ම දේශීය ආනයන ආදේශන කර්මාන්ත නංවාලීම කෙරෙහිද රජයේ පූර්ණ දායකත්වය සපයන බව ජනාධිපති අනුර කුමාර දිසානායක වැඩිදුරටත් අවධාරණය කළේය.
