යුද්ධයේදී ඝාතනයට ලක් වු දෙමළ ඊලාම් විමුක්ති කොටි සාමාජිකයන් සිහිපත් කිරීම සඳහා ඊයේ (27)  දිනයේ පැවැති උතුරු පළාතේ අනුස්මරණ,

අධිකරණ නියෝග හරහා නවතාලීමට පොලීසිය ගත් උත්සාහයන් කිහිපයක්ම අසාර්ථක වී තිබේ.


කෙසේවෙතත්, නැගෙනහිර පළාතේ දෙමළ මහවිරු අනුස්මරණ කිහිපයක්ම පොලීසිය විසින් අධිකරණ නියෝග හරහා තහනම් කර ඇති බව පළාත් බද වාර්තාකරුවෝ පවසති.

යාපනයේ, කයිට්ස් පොලිස් බල ප්‍රදේශය තුළ දෙමළ මහවිරු අනුස්මරණ තහනම් කරන ලෙස කයිට්ස් පොලීසිය, කයිට්ස් අධිකරණයෙන් කළ ඉල්ලිම නොවැම්බර් 27 වැනි සදුදා පෙරවරුවේ මහේස්ත්‍රාත් කේ.ගජනිධිපාලන් විසින් ප්‍රතික්ෂේප කර තිබේ.

අධිකරණ කටයුතු නිමා වීමෙන් පසු මාධ්‍ය වෙත අදහස් දක්වමින් නීතිඥ කනගරත්නම් සුගාස් සදහන් කළේ තහනම් කර ඇති රතු සහ කහ පැහැති කොඩි භාවිත කරමින් තහනම් සංවිධානයක සාමාජිකයන් අනුස්මරණය කිරීමට සුදානම් වන බවට පොලීසිය අධිකරණය හමුවේ කරුණු වාර්තා කර තිබු බවයි.

 

“රතු සහ කහ භාවිත කරන එක තහනම් කරන්න අවශ්‍ය නම් මුලින්ම තහනම් කරන්න ඕන ශ්‍රී ලංකාවේ ජාතික කොඩිය තමයි කියලා අපි අධිකරණයට පැහැදිලි කරා,“ යි නීතිඥ කනගරත්නම් සුගාස් අවධාරණය කළේය.

 

මහවිරු සැමරුම් තහනම් කරන ලෙස යාපනය පොලීසිය හා කෝපායි පොලීසිය යාපනය අධිකරණයෙන් කළ ඉල්ලිම ද නොවැම්බර් 27 වැනි සදුදා පෙරවරුවේ ප්‍රතික්ෂේප කළ යාපනය මහේස්ත්‍රාත් ඒ.ඒ ආනන්දරාජා පවසා ඇත්තේ මළවුන් සිහිපත් කිරීම තහනම් කළ නොහැකි බවයි.

“මළවුන් අනුස්මරණය කිරීම තහනම් කරන්න බෑ. නමුත් කොටි සංවිධානයේ සහ/ හෝ ඔවුන්ගේ බවට හදුනාගත හැකි කොඩි ඇතුළු කිසිවක් භාවිතා කරන්න බෑ.“

මන්නාරම දිස්ත්‍රික්කයේ ආට්කාට්ටිවේලි සහ පෙරිය පන්ඩිවිරිච්චාන් මහවිරු සුසාන භුමි තුළ සිදු කිරිමට නියමිත දෙමළ මහවිරු සැමරුම් තහනම් කරන ලෙස අඩම්බන් පොලීසිය මන්නාරම අධිකරණයෙන් කළ ඉල්ලිමද එම අධිකරණයේ විනිසුරුවරයා පසුගියදා ප්‍රතික්ෂේප කර තිබේ.

මන්නාරම අධිකරණයේ වැඩ බලන විනිසුරු ඊ.කේ බෙල්ඩෝනෝ නියෝග කර ඇත්තේ ප්‍රදේශයේ ජන ජීවිතයට බාධා නොවන ආකාරයෙන් අනුස්මරණ සිදු කළ හැකි නමුත් එල්.ටී.ටී.ඊ සංවිධානයට අයත් ලාංඡන හෝ ධජ ප්‍රදර්ශනය කළ නොහැකි බවයි.

 

දෙමළ මහවිරු අනුස්මරණ තහනම් කරන ලෙස 2023 නොවැම්බර් 24 වැනිදා මුලතිව් දිස්ත්‍රික්කයේ පොලිස් ස්ථාන කිහිපයක්ම මුලතිව් මහේස්ත්‍රාත් අධිකරණයෙන් කළ ඉල්ලීමට අනුව අධිකරණය ලබා දුන් අතුරු තහනම් නියෝගය සම්බන්ධයෙන් මහවිරු අනුස්මරණ කමිටු සාමාජිකයන් වෙනුවෙන් ජ්‍යෙෂ්ඨ නීතිඥ ඇන්ටන් පුනිදනායගම් ඇතුළු කණ්ඩායම අධිකරණය හමුවේ ගොනු කළ මෝසම විභාගයට ගත් මහේස්ත්‍රාත් වරයා නොවැම්බර් 27 වැනිදා නියෝග කර ඇත්තේ මහවිරු යන වචනය භාවිතයෙන් තොරව අනුස්මරණ සිදු කළ හැකි බවයි.

 

දෙමළ මහවිරු සැමරුම් තහනම් කරන ලෙස කිලිනොච්චි පොලිස් කොට්ඨාසයට අයත් පොලිස් ස්ථාන හතක ස්ථානාධිපතිවරුන් කළ ඉල්ලීමද නොවැම්බර් 25 වැනි සෙනසුරාදා කිලිනොච්චි මහේස්ත්‍රාත් අධිකරණය විසින් ප්‍රතික්ෂේප කළ බව ජනාධිපති නීතිඥ පාර්ලිමේන්තු මන්ත්‍රී එම්. ඒ සුමන්තිරන් ජනමාධ්‍යවෙත පවසා තිබුනි.

යුද්ධයේදී ඝාතනයට ලක් වු දෙමළ ඊලාම් විමුක්ති කොටි සාමාජිකයන් සිහිපත් කිරීම සඳහා පැවැත්වීමට නියමිත අනුස්මරණ තහනම් කරන ලෙස පොලීසිය කළ ඉල්ලීම් හතරක් පසුගිය සතියේ දී උතුරේ අධිකරණයක් විසින් ප්‍රතික්ෂේප කර තිබුනි.

පළාත් බද වාර්තාකරුවන් පවසන්නේ තෙල්ලිපලෙයි හා අච්චුවේලි පොලීසිය විසින් සිදු කළ ඉල්ලීම් නොවැම්බර් 20 වැනිදා දිනත් මානිප්පායි සහ පලාලි පොලිසිය විසින් සිදු කළ ඉල්ලීම් නොවැම්බර් 21 වැනි දිනත් මල්ලාහම් මහේස්ත්‍රාත් අධිකරණය විසින් ප්‍රතික්ෂේප කරන ලද බවයි.

 

නොවැම්බර් 27 වැනිදාට දෙමළ මහවිරුවන් අනුස්මරණය සදහා මුලතිව් ඉරට්ටෙයි වායික්කාල් සුසාන භුමිය නොවැම්බර් 26 වැනිදා සරසමින් සිටියදී එම ස්ථානයට පැමිණි මුලතිව් පොලිස් ස්ථානයේ නිලධාරීන් සුසාන භුමිය සැරසීමට මහවිරු අනුස්මරණ කමිටුව රැගෙන විත් තිබු රතු සහ කහ පැහැති කොඩි ගලවාගෙන ගිය බව පවසන පළාත් බද මාධ්‍යවේදීන් වැඩි දුරටත් සදහන් කරන්නේ උතුරු පළාත් සභාවේ හිටපු මන්ත්‍රී තුරෙයිරාසා රවිහරන් පොලිස්ථානය වෙත කැදවා පැයක පමණ කාලයක් මුලතිව් පොලීසිය ප්‍රකාශ සටහන් කරගත් බවයි.

 

පොලීසියට ප්‍රකාශ ලබා දිමෙන් පසු තුරෙයිරාසා රවිහරන් ප්‍රදේශයේ මාධ්‍යවේදීන් හමුවේ අවධාරණය කර ඇත්තේ කුමන බාධක පැමිණියත් මළවුන් අනුස්මරණය කිරීම නතර නොකරන බවයි.

“මේ මහවිරු සැමරුම අවුල් කිරීමේ අදහසින් සෑම තැනකම, සෑම ආකාරයකින්ම ඔවුන් හිතන විදිහට මේක අවුල් කිරීමේ අරමුණින් ක්‍රියාත්මක කිරීම සහ ඒකට ඉදිරියෙන් සිටින අයට කැදවීම දිගටම සිදු උනත් මිය ගිය අයව සිහිපත් කිරීම අපි නතර කරන්නේ නෑ.“

මේ අතර නැගෙනහිර පළාතේ සිදු කිරීමට සැලසුම් කර තිබු දෙමළ මහවිරු අනුස්මරණ කිහිපයක්ම අධිකරණ නියෝග මගින් තහනම් කිරීමට පොලීසිය කටයුතු කර තිබේ.

නොවැම්බර් 27 වැනි සදුදා දෙමළ මහවිරු දිනය සැමරීම වෙනුවෙන් මඩකලපුව මාවඩි මුන්මාරි සුසාන භුමිය නොවැම්බර් 26 වැනිදා සැරසිමේ කටයුතු වල නිතරව සිටියදී එම ස්ථානයට පැමිණි කොක්කච්චෝලේ පොලීසිය මඩකලපුව මහේස්ත්‍රාත් අධිකරණයෙන් ලබා ගත් තහනම් නියෝගයක් හිටපු පාර්ලිමේන්තු මන්ත්‍රී පී. අරියනේන්ද්‍රට ලබා දෙමින් දැනුම් දී ඇත්තේ එම ස්ථානයේ මහවිරු සැමරුම් පැවැත්විම අධිකරණයෙන් තහනම් කර ඇති බවයි.

පාර්ලිමේන්තු මන්ත්‍රී රාසමානික්‍යම් ශානක්‍යන්, දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන්, හිටපු පාර්ලිමේන්තු එස්. යෝගේෂ්වරන් ඇතුළු 19 දෙනකුගේ නම් සදහන් කරමින් එම නියෝගය නිකුත් කර ඇති බවයි පළාත් බද වාර්තාකරුවන් පවසන්නේ.

වාකරේ පොලීසිය අධිකරණයෙන් කළ ඉල්ලීමකට අනුව කන්ඩලඩි සුසාන භුමියේ දෙමළ මහවිරු සැමරුම් පැවැත්වීම වාලච්චේන මහේස්ත්‍රාත් අධිකරණය විසින් පුද්ගලයන් 23 දෙනකුගේ නම් සදහන් කරමින් තහනම් කර ඇති බව ඔවුහු වැඩි දුරටත් පවසති.

 

යු ටියුබ් නාලිකාවකට ලබා දුන් සම්මුඛ සාකච්ඡාවක දී රාජ්‍ය අමාත්‍යවරයකු සම්බන්ධයෙන් සිදු කළ ප්‍රකාශයකින් පසු මරණිය තර්ජනයකට මුහුණ පෑ නැගෙනහිර පළාතේ සිවිල් සමාජ ක්‍රියාධරයකු වන විමලසේනා ලවකුමාර් ගේ නමද එම තහනම් නියෝගයට ඇතුලත්ය.

 

දෙමළ මහවිරු දිනය ඉලක්ක කරගනිමින් නැගෙනහිර පළාතේ සාම්පුර් පොලිස් බල ප්‍රදේශය තුළ යුද්ධයේදී ඝාතනය වු කොටි සාමාජිකයන් අනුස්මරණය කිරීම සම්බන්ධයෙන් සති දෙකක කාලයක් සඳහා අධිකරණය විසින් උපදෙස් සහිත නියෝගයක් ද පසුගියදා පනවා තිබුනි.

දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් හා එම පක්ෂයේ පාර්ලිමේන්තු මන්ත්‍රී සෙල්වරාජා ගජේන්ද්‍රන් ඇතුළු 17 දෙනකුගේ නම් සදහන් කරමින් මුතුර් මහේස්ත්‍රාත් අධිකරණය නොවැම්බර් 23 වැනිදා නිකුත් කළ නියෝගයේ අවධාරණය කර තිබුනේ මහවිරු අනුස්මරණ පැවැත්වීමේදී මහජනතාවට අවහිරයක් සිදු නොකළ යුතු බවයි.

ගජෙන්ද්‍රකුමාර් මන්ත්‍රීවරයා අම්පාරේ කන්ජිකුඩිච්චිආරු ප්‍රදේශයේත්, දෙමළ මාතාවන් සහ තරුණයන් පිරිසක් මුතුර්හි ආලන්කුලමේත් මහවිරු සමරුවලට සහභාගි වීමට යමින් සිටියදී පොලිසිය මග අවුරා බාධා කරනු වීඩියෝ ගතව තිබේ.

දෙමළ මහවිරු දිනය ඉලක්ක කරගනිමින් නැගෙනහිර පළාතේ අලුතින් ඉදිකළ මහවිරු ස්මාරකයක් අධිකරණ නියෝග මත පොලීසිය සහ වන ජීවි දෙපාර්තමේන්තු නිලධාරීන් විසින් පසුගියදා කඩා බිඳ දමා තිබුනි.

පළාත් බද වාර්තාකරුවන් පවසන්නේ වසර ගණනක් තිස්සේ පවත්වාගෙන යනු ලැබූ මඩකලපුව, වාලච්චේන, තරවෙයි මහාවිරු සුසාන භුමියේ නොවැම්බර් 18 වැනිදා ඉදිකළ ස්මාරකය කඩා දමා ඇත්තේ නොවැම්බර් 23 වැනි දින බවයි.

යුද්ධයේදී ඝාතනයට ලක්වු දෙමළ ඊලාම් විමුක්ති කොටි සාමාජිකයන් මිහිදන් කර තිබු තරවෙයි මහාවිරු සුසාන භුමිය යුද්ධය නිමා වීමෙන් පසුව වන ජීවි දෙපාර්තමේන්තුව විසින් අත්පත්කරගන්නා ලද බවට ප්‍රදේශවාසීන් චෝදනා කරයි.

 

එල්.ටී.ටී.ඊ. පාලනය යටතේ පැවති දෙමළ ජනතාවගේ භූමි ප්‍රදේශ හමුදාව විසින් අත්පත් කර ගැනීමත් සමඟ, උතුරු සහ නැඟෙනහිර ප්‍රදේශවල මියගිය දෙමළ සටන්කාමීන්ගේ සොහොන් 20,400 ක් පමණ තිබූ සුසාන භූමි 25 කට ආසන්න ප්‍රමාණයක් ඩෝසර් කර සමරු පලක කඩා බිඳ දැමු බවට දෙමළ ජනයා යුද හමුදාවට චෝදනා එල්ල කර තිබේ.

 

මළවුන්ට ගෞරව දැක්වීම හින්දු සංස්කෘතියේ කොටසක් වනවා සේම, මළවුන්ට ගෞරව දැක්වීම එක්සත් ජාතීන්ගේ සංවිධානය විසින් මූලික අයිතිවාසිකමක් ලෙස ද ප්‍රකාශයට පත් කර ඇත.

නොවැම්බර් 27 වැනිදාට යෙදී තිබුන දෙමළ මහවිරු දිනය වෙනුවෙන් ඊයේ පස්වරුවේ උතුරේ ස්ථාන රැසකම දෙමළ මහවිරු අනුස්මරණ පැවැති බව පළාත් බද වාර්තාකරුවෝ වැඩි දුරටත් පවසති.

 
 

Follow Us

Image
Image
Image
Image
Image
Image

නවතම පුවත්