බාලි නුවරින් ලැබුණු කලාපීය පිළිගැනීම
ආසියානු කලාපයේ සායනික පෝෂණ ක්ෂේත්‍රයේ ප්‍රමුඛතම වෘත්තීය නියමුවා වන PENSA (Parenteral and Enteral Nutrition Society of Asia) සංවිධානයේ සභාපති ධුරය ශ්‍රී ලංකාවට හිමිව තිබේ.
ඉන්දුනීසියාවේ බාලි නුවර නිමාවට පත්වූ වාර්ෂික සමුළුවේදී, සංගමයේ නිල ධජය පෝෂණ විශේෂඥ වෛද්‍ය තිමති වික්‍රමසේකර මහතා වෙත නිල වශයෙන් භාර කෙරිණි. මෙවැනි ආසියානු මට්ටමේ ඉහළම වෛද්‍ය නායකත්වයකට මෙරට වෛද්‍යවරයකු පත්වූ ප්‍රථම අවස්ථාව මෙයයි.
මොකක්ද මේ සායනික පෝෂණය කියන්නේ?
බරපතළ රෝගාබාධ, ශල්‍යකර්ම හෝ දැඩි සත්කාර ඒකකවල (ICU) ප්‍රතිකාර ලබන රෝගීන්ට සාමාන්‍ය පරිදි මුඛයෙන් ආහාර ගැනීමේ හැකියාවක් නැත.
එවැනි අවස්ථාවලදී:
* ශිරාගත පෝෂණය: රුධිර නාල (සේලයින් මාර්ගයෙන්) හරහා සෘජුව ශරීරයට පෝෂ්‍ය පදාර්ථ ලබාදීම
* ආන්ත්‍රික පෝෂණය: විශේෂිත නළ මාර්ගයෙන් ආහාර ජීර්ණ පද්ධතියට කෙළින්ම පෝෂණය සැපයීම
මෙම ජීවිතාරක්ෂක පෝෂණ ප්‍රතිකාර ක්‍රමවේද නංවාලීම සහ වෛද්‍යවරුන් පුහුණු කිරීම PENSA සංවිධානයේ ප්‍රධානතම කාර්යභාරයයි.
මෙරට සෞඛ්‍ය පද්ධතියට ලැබෙන සුවිශේෂී වාසිය
මෙම පත්වීම හුදු තනි පුද්ගල ජයග්‍රහණයක් නොව, මෙරට සමස්ත සෞඛ්‍ය පද්ධතිය ජාත්‍යන්තරව ලැබූ ඉහළම සහතිකයකි.
ආසියානු කලාපයේ ප්‍රතිපත්ති සහ මාර්ගෝපදේශ සම්පාදනය කරන ප්‍රධාන පුටුව ලංකාවට ලැබීමත් සමඟ, මෙරට රෝහල්වල සිටින බරපතළ රෝගීන්ට ලෝක මට්ටමේ පෝෂණ ප්‍රතිකාර හඳුන්වා දීමේ මාවත තවදුරටත් පුළුල් වෙයි.
2027 දී ලෝක විශේෂඥයෝ කොළඹට
ශ්‍රී ලංකාව ලැබූ මෙම නායකත්වයේ තවත් විශාල ජයග්‍රහණයක් වන්නේ, PENSA 2027 ජාත්‍යන්තර සමුළුවේ සත්කාරකත්වය කොළඹට හිමිවීමයි.
2027 ජූලි 6 සිට 10 දක්වා පැවැත්වීමට නියමිත මෙම සමුළුව සඳහා ආසියාව ඇතුළු ලොව පුරා විද්වතුන් දහස් ගණනක් මෙරටට පැමිණෙනු ඇත. එය මෙරට වෛද්‍ය ක්ෂේත්‍රයේ දියුණුවට මෙන්ම, රටට විදේශ විනිමය ගෙනෙන වෛද්‍ය සම්මන්ත්‍රණ සංචාරක කර්මාන්තයටද (MICE Tourism) දැවැන්ත උත්තේජනයක් සපයනු නොඅනුමානය.
විශ්වාසනීය මූලාශ්‍ර සබැඳි :