එක්සත් රාජධානිය මුල් කරගත් ගෝලීය දෙමළ සංසදය (GTF) සහ අමරපුර නිකායේ අනුනායක හිමිනමක් ඇතුළු බෞද්ධ භික්ෂූන් වහන්සේලා

කණ්ඩායමක් සම්පාදනය කළ “හිමාලයා ප්‍රකාශනය” නම් ලියවිල්ල ශ්‍රී ලංකා අමරපුර නිකාය විසින් ප්‍රතික්ෂේප කොට තිබේ.

ගෝලීය දෙමළ සංසදය සහ අමරපුර නිකායේ අඹගහපිටිය පාර්ශවයේ අනුනායක ආචාර්ය මාදම්පාගම අස්සජි ස්වාමීන්වහන්සේ ප්‍රමුඛ භික්ෂුන් වහන්සේලා පිරිසක් සම්පාදනය කළ “සියලුම ප්‍රජාවන්ගේ යහපැවැත්ම ප්‍රවර්ධනය කරන බහුත්වවාදී ශ්‍රී ලංකාවක් ඇතිකිරීම” සඳහා යැයි ප්‍රසිද්ධියට පත් කොට ඇති “හිමාලයා ප්‍රකාශනය” GTF කණ්ඩායම සහ බෞද්ධ භික්ෂූන් හමුවූ ජනාධිපති රනිල් වික්‍රමසිංහ විසින් ජනාධිපති ලේකම් කාර්යාලයේදී දෙසැම්බර් 8 දා උණුසුම් ලෙස පිළිගෙන තිබුනි.

 

ත්‍රෛනිකායික මහානායක ස්වාමින්වහන්සේලා ඇතුළු මහා සංඝරත්නයේ සහ පොදු මහජනතාවගේ දැනගැනීම සදහා බව පවසමින් 2023 දෙසැම්බර් 30 වැනිදා ශ්‍රී ලංකා අමරපුර මහාසංඝ සභාවේ සහකාර ලේඛකාධිකාරී අම්බලන්ගොඩ සුමේධානන්ද නාහිමියන් විසින් නිකුත් කළ නිවේදනයක් මගින් දැනුම් දී ඇත්තේ හිමාලයා ප්‍රකාශනයට ශ්‍රී ලංකා අමරපුර මහා සංඝසභාවේ අනුමැතියක් නොමැති බවයි.

 

“ හිමාලයා ප්‍රකාශනයට ශ්‍රී ලංකා අමරපුර මහාසංඝ සභාවේ එකගතාවයක් හෝ ඒ පිළිබදව සාකච්ඡාවක් පවත්වා නොමැති බවත්, හුදෙක් එය භික්ෂුන් වහන්සේ කිහිපනමකගේ පෞද්ගලික මත ප්‍රකාශ කිරීමක් පමණක් බවත් මෙයින් අවධාරණය කර සිටිමී.”

අවම වශයෙන් 40,000ක පමණ නිරායුද වැසියන්ගේ මරණ සහ අතුරුදහන්වීම් 20,000ක් පමණ වාර්තා කරමින් 2008 වසරේ අවසන් වූ යුද්ධය මෙහෙයවූ හිටපු ජනාධිපති මහින්ද රාජපක්ෂද GTF සහ යහපත් ශ්‍රී ලංකාවක් සඳහා වූ සංඝ සංසදය නමින් නමැති බෞද්ධ භික්ෂූන් කණ්ඩායම මුණගැසුන අතර හිමාලයා ප්‍රකාශනය මල්වතු, අස්ගිරි මහනාහිමිවරුන්ටද පිළිගන්වා ඇත.

“හිමාලයා ප්‍රකාශනය” නම් ලියවිල්ල, ශ්‍රී ලංකාවේ දෙමළ ජනයා සහ දෙමළ ඩයස්පෝරා කණ්ඩායම් ගණනාවක් විසින් මේ වන විටත් දැඩි ලෙස ප්‍රතික්ෂේප කර ඇත.

 

ඒකාබද්ධ හිමාලයා ප්‍රකාශනය බාරදීම ජනාධිපති මාධ්‍ය අංශය විසින් හඳුන්වන ලද්දේ “සමගි සම්පන්න සහ සියල්ලන්ම ඇතුලත් කරගත් ශ්‍රී ලංකාවක් සඳහා සංවාදයක් සහ සහයෝගීතාව ඇතිකිරීම කෙරෙහි තැබූ වැදගත් ඉදිරි පියවරක්” බවයි.

 

කෙසේ නමුත්, බුද්ධ සාසන, ආගමික සහ සංස්කෘතික කටයුතු පිලිබඳ අමාත්‍යාංශයේ නිලධාරීන් උපුටා දක්වමින් දේශීය මාධ්‍ය වාර්තා කළේ GTF සහ බෞද්ධ භික්ෂුන් ඉදිරිපත් කළ ඒකාබද්ධ හිමාලයා ප්‍රකාශනය පිළිබඳව ඔවුන්ට කිසිදු තොරතුරක් ලැබී නොමැති බවයි.

යහපත් ශ්‍රි ලංකාවක් සඳහා වූ සංඝ සංසදය නියෝජනය කරමින් අමරපුර නිකායේ අඹගහපිටිය පාර්ශ්වයේ අනුනායක පූජ්‍ය මාදම්පාගම අස්සජි, උතුරු නැගෙනහිර දෙපළාතේ අධිකරණ සංඝ නායක පූජ්‍ය සියඹලාගස්වැව විමලසාර, බස්නාහිර පළාතේ ප්‍රධාන සංඝනායක සහ සිරි ධර්මරක්ෂිත පාර්ශ්වයේ ලේඛකාධිකාරී පූජ්‍ය කිතලගම හේමසාර, වජිරවංස පාර්ශ්වයේ වැඩබලන මහානායක මහාචාර්ය පූජ්‍ය පල්ලේකන්දේ රත්නසාර, ශ්‍රී ලංකා මානව හිමිකම් කවුන්සිලයේ හිටපු සාමාජික මානව සංවර්ධන අධ්‍යයන මධ්‍යස්ථානයේ සභාපති පූජ්‍ය කලුපහන පියරතන, මධ්‍යම පළාතේ පාතදුම්බර ප්‍රධාන සංඝනායක පූජ්‍ය නාරම්පනාවේ ධම්මාලෝක සහ රාමඤ්ඤ නිකායේ නියෝජ්‍ය ලේඛකාධිකාරී වාද්දුවේ ධම්මවංශ ආදී ස්වාමින් වහන්සේලා හිමාලයා හවුල් ප්‍රකාශනය බාරදීම සඳහා වැඩම කර සිටි බව ජනාධිපති මාධ්‍ය අංශය විසින් නිවේදනය කර තිබුණි.

සබැඳි පුවත් :
‘හිමාලයා ප්‍රකාශනය’ අපිට එපා - දෙමළ සිවිල් සමාජ කණ්ඩායම්

‘හිමාලයා’ GTF සහ බෞද්ධ භික්ෂු හවුල දෙමළ සමාජයෙන් ප්‍රතික්ෂේප වෙයි

'හිමාලයා ප්‍රකාශනය' ජනපතිට පිළිගන්වයි

දෙමළ ඩයස්පෝරා නියෝජිතයෝ මහා නාහිමිවරු, කාදිනල් හිමි සහ ප්‍රජා නායකයෝ හමුවෙති  


worky

worky 3

Follow Us

Image
Image
Image
Image
Image
Image