මෙරට පුහුණු වෛද්‍යවරුන් හෝ හෙදියන් 100 දෙනෙකු අතුරින් 30ත් 40ත් අතර ප්‍රමාණයක් රට හැර යාම
සිදුවන බවත් එය අඛණ්ඩව සිදුවීම රටට යහපත් තත්ත්වයක් නොවන බවත් ජනාධිපති රනිල් වික්‍රමසිංහ පවසයි.
ලොව ගුණාත්මක සෞඛ්‍ය සේවාවක් ඇති මෙරට සෞඛ්‍ය සේවාව තවදුරටත් ඉහළ නංවමින් එය රටේ ආර්ථිකයට ප්‍රශස්ත අයුරින් දායක කර ගැනීම සියලු දෙනාගේ වගකීම බවද ජනාධිපතිවරයා සඳහන් කළේය.
ජනාධිපති රනිල් වික්‍රමසිංහ මේ බව සඳහන් කර සිටියේ නෙදර්ලන්ත රජයේ DRIVE සහන ණය ක්‍රමය යටතේ ඉදිකරන ලද පේදුරු තුඩුව මූලික රෝහලේ “හදිසි අනතුරු සහ හදිසි ප්‍රතිකාර ඒකකය” ජනතා අයිතියට පවරාදීමේ අවස්ථාවට ඊයේ (22) පස්වරුවේ එක් වෙමිනි.
මෙරට වෛද්‍ය සහ හෙද අවශ්‍යතාවය සපුරාලීම සඳහා වාර්ෂික බඳවා ගැනීම් ඉහළ නංවන ලෙස තමා ශ්‍රීමත් ජෝන් කොතලාවල ආරක්ෂක විශ්වවිද්‍යාලයට ද උපදෙස් දුන් බවත්, එම පුහුණු කිරීම් සඳහා අවශ්‍ය පහසුකම් ප්‍රවර්ධනය කළයුතු බවත් ජනාධිපතිවරයා මෙහිදී පෙන්වා දුන්නේය.
හරිත සරසවියේ වෛද්‍ය පීඨය සඳහා ශික්ෂණ රෝහලක් පවත්වාගෙන යාමේ අයිතිය ලබාදී තිබෙන බවත් “ලයිසියම් කැම්පස්” ද එවැනි ඉල්ලීමක් සිදු කර ඇති බවත් ජනාධිපතිවරයා සඳහන් කළේය.
කෘත්‍රීම බුද්ධිය ඇතුළු නවීන තාක්ෂණය සෞඛ්‍ය ක්ෂේත්‍රයට එක්කරගත යුතුයි
එසේම කෘත්‍රීම බුද්ධිය (AI) වැනි නවීන තාක්ෂණය මෙරට සෞඛ්‍ය ක්ෂේත්‍රයට එක් කර ගනිමින් නවීන වෛද්‍ය ක්‍රමයක් පවත්වාගෙන යාම පිළිබඳව ද ජනාධිපතිවරයා මෙහිදී අවධානය යොමු කළේය.
යාපනය සහ පේදුරු තුඩුව ජනතාව වෙනුවෙන් මෙම වෛද්‍ය පහසුකම් සලසාදීම පිළිබඳව ජනාධිපති රනිල් වික්‍රමසිංහ මෙහිදී නෙදර්ලන්ත රජයට සිය ස්තූතිය පිරිනැමීමට ද කටයුතු කළේය.
හදිසි අනතුරු සහ හදිසි ප්‍රතිකාර ඒකකය, මූලික සත්කාර ඒකකය, විකිරණ අංශය (x-ray, ultrasound scanner සහ CT ස්කෑනරය), දැඩි සත්කාර ඒකකය, ශල්‍යාගාරය, නොමේරු ළදරු සත්කාර ඒකකය, ශල්‍ය වාට්ටුව, මාතෘ වාට්ටුව, වඳ සත්කාර ඒකකය, ඩයලිසිස් ඒකකය, රසායනාගාරය ඇතුළු පේදුරු තුඩුව මූලික රෝහලේ සංවර්ධන කටයුතු සඳහා නෙදර්ලන්ත රජයේ DRIVE සහන ණය ක්‍රමය යටතේ රුපියල් බිලියන 04ක් ලබා දී තිබේ.
සමරු ඵලකය නිරාවරණය කර “හදිසි අනතුරු සහ හදිසි ප්‍රතිකාර ඒකකය” විවෘත කළ ජනාධිපතිවරයා එහි නිරීක්ෂණ චාරිකාවක ද නිරත වෙමින් රෝහල් කාර්ය මණ්ඩලය සමඟ ද සුහද කතාබහක ද නිරත විය.
උත්සව සභාවේ දී ශ්‍රී ලංකාවේ නෙදර්ලන්ත තානාපති බොනී හොබැක් (Bonnie Horbach) මහත්මියට සහ VAMED ආයතනයේ කළමණාකරන අධ්‍යක්ෂ Paul de Bruin ට සමරු සිහිවටන පිළිගැන්වීම ද ජනාධිපතිවරයා අතින් සිදු කෙරිණි. ජනාධිපති රනිල් වික්‍රමසිංහ වෙනුවෙන් ද සිහිවටන තිළිණයක් පිළිගැන්විණි.
මෙම උත්සව සභාව ඇමතූ රාජ්‍ය අමාත්‍ය සීතා අරඹේපොළ සඳහන් කළේ පේදුරුතුඩුව මූලික රෝහලේ මෙම සංවර්ධන කටයුතු උතුරු පළාතේ සෞඛ්‍ය සේවාවේ ප්‍රගතියේ සුවිශේෂි සන්ධිස්ථානයක් බවයි.
DRIVE”ව්‍යාපෘතිය යටතේ ඒ වෙනුවෙන් අවශ්‍ය මූල්‍යමය ණය ආධාර, සහය සහ උපකාර ලබාදුන් නෙදර්ලන්ත රජයටත්, ශ්‍රී ලංකාවේ නෙදර්ලන්ත තානාපති කාර්යාලයටත් ස්තූතිවන්ත වන බව රාජ්‍ය අමාත්‍යවරිය සඳහන් කළාය.
පේදුරුතුඩුව මූලික රෝහල වෙත ලැබී ඇති මෙම නවීන සෞඛ්‍ය සේවා පහසුකම් රටේ සෞඛ්‍ය සේවාවේ දියුණුව වෙනුවෙන් කාර්ක්ෂමව හා ඵලදායීව ප්‍රයෝජනයට ගත යුතු බව මෙහිදී අදහස් දැක්වූ උතුරු පළාත් ආණ්ඩුකාර පී. එස්. එම්. චාල්ස් සඳහන් කළාය.
එසේම මෙම රෝහල ජනතා යහපත වෙනුවෙන් උපරිමයෙන් ප්‍රයෝජනයට ගැනීමට හැකි සෑම ආකාරයකින්ම එක්ව කටයුතු කරන ලෙසද ආණ්ඩුකාරවරිය උතුරු පළාත් සෞඛ්‍ය බලධාරින්ගෙන් ඉල්ලා සිටියාය.
නෙදර්ලන්ත තානාපතිනි බොනී හොබැක් (Bonnie Horbach) මෙහිදී අදහස් දක්වමින් කියා සිටියේ සියලුම ශ්‍රී ලාංකීක ජනතාවට සමාන අයිතිවාසිකම් ලබා දීම සහ ප්‍රවර්ධනය කිරීම සංහිඳියාවේ කොටසක් බවත්, එය සෞඛ්‍යය සහ ආරක්ෂාව වැනි මූලික අයිතිවාසිකම් වලින් ආරම්භ වන බවත්ය.
නෙදර්ලන්ත රජයෙන් යුරෝ මිලියන 4ක් ප්‍රදානයක්
මීට වසර හයකට පමණ පෙර උතුරු පළාතේ රෝහල් හතරක් සංවර්ධනය කිරීම වෙනුවෙන් VAMED ආයතනය සෞඛ්‍ය අමාත්‍යාංශය සමඟ ගිවිසුමකට අත්සන් තැබු බව සිහිපත් කළ තානාපතිනිය මෙම රෝහල් හතර ගොඩනැංවීම සඳහා ඇස්තමේන්තුගත මුළු වටිනාකම යුරෝ මිලියන 16ක් බවත්, එම යුරෝ මිලියන 16න් 25%ක් එනම් යුරෝ මිලියන 4ක් ප්‍රදානයක් ලෙස ලබා දීමට තීරණය කළ බවත් සඳහන් කළාය.
අමාත්‍ය ඩග්ලස් දේවානන්ද, රාජ්‍ය අමාත්‍යවරුන් වන අංගජන් රාමනාදන්, කාදර් මස්තාන්, පාර්ලිමේන්තු මන්ත්‍රී ධර්ලිංගම් සිද්ධාර්ථන්, හිටපු රාජ්‍ය අමාත්‍ය විජයකලා මහේෂ්වරන්, ජාතික ආරක්ෂාව පිළිබඳ ජනාධිපති ජ්‍යේඨ උපදේශක සහ ජනාධිපති කාර්ය මණ්ඩල ප්‍රධානී සාගල රත්නායක, ජනාධිපති ලේකම් සමන් ඒකනායක සහ රෝහල් කාර්ය මණ්ඩලය ඇතුළු පිරිසක් මෙම අවස්ථාවට එක්ව සිටියහ.
