පහළොස් වසරකට ඉහත දී කුසට අහරක්, ලෙඩට බෙහෙතක් නොමැතිව බර අවියෙන්ද, හාමතින්ද, රෝගාබාධයෙන්ද මියගිය තම සමීපතමයන්

සිහි කිරීම සදහා ප්‍රදේශවාසී ජනතාවට කැඳ දන්සලක් ලබා දීමට නැගෙනහිර පළාතේ දෙමළ මව්වරුන් දැරු උත්සාහයක් අධිකරණ නියෝග ලබා ගනිමින් නතර කිරීමට පොලීසිය කටයුතු කර තිබේ.

දින දෙකක් තුල නැගෙනහිර පළාතේ උසාවි තහනමට ලක්වූ දෙවැනි කැඳ දන්සලයි මේ.

 

පළාත් බද වාර්තාකරුවන් පවසන්නේ මැයි 14 වැනි අගහරුවාදා පෙරවරුවේ කල්මුනේ පාන්ඩිරිප්පු අරසඩි අම්මාන් කෝවිල වෙත සන්නද්ධව පැමිණි පෙරියනිලාවනෙයි ස්ථානාධිපති ජේ.ඒස්.කේ විරසිංහ ඇතුළු පොලිස් නිලධාරීන් කල්මුනේ අධිකරණයෙන් ලබා ගත් තහනම් නියෝගය ලබා දෙමින් කැඳ පිසීම නවත්වන ලෙස එම ජනතාවට නියෝග කළ බවයි.

 

දෙමළ ජාතික ජනතා පෙරමුණේ අම්පාර දිස්ත්‍රික් සංවිධායක පුෂ්පරාජ් තුෂානන්දන්ගේ සංවිධානත්වයෙන්  සහ අම්පාර දිස්ත්‍රික්කයේ බලහත්කාරයෙන් අතුරුදහන් කළ අයගේ ඥාතීන්ගේ සංගමයේ සභාපති තම්බිරාසා සෙල්වරානි මාතාවගේ ප්‍රධානත්වයෙන්  කැඳ පිසීමේ කටයුතු අද පෙරවරුවේ සිදු කිරීමට නියමිතව තිබුනි.

අධිකරණ නියෝගයේ දැක්වෙන පරිදි එම අනුස්මරණය දෙමළ විමුක්ති කොටි සාමාජිකයන් වෙනුවෙනි.

පෙරියනිලාවනෙයි ස්ථානාධිපතිගේ ඉල්ලීමට අනුව නියෝගය නිකුත් කරමින් කල්මුනේ මහේස්ත්‍රාත් එස්.එම්. එස්. එම් සම්සුදීන් ‘මුල්ලිවයික්කාල් කන්ජි’ දන්සලක් තහනම් කිරීමට හේතු ලෙස දක්වා ඇත්තේ ශ්‍රී ලංකාවේ  තහනම් සංවිධානයක් වන LTTE සංවිධානයේ සාමාජිකයන්  සිහිපත් කිරීමේ අරමුනින් මෙවැනි ක්‍රියාකාරකම් සිදු කිරීම ත්‍රස්තවාදය නැවත ප්‍රතිනිර්මාණය කිරීමට අවස්ථාවක් වන බැවින් මෙම තහනම් නියෝගය නිකුත් කරන බවයි.

දෙමළ ජාතික ජනතා පෙරමුණේ අම්පාර දිස්ත්‍රික් සංවිධායක පුෂ්පරාජ් තුෂානන්දන්ගේ නමට නිකුත් කර ඇති අධිකරණ  නියෝගයේ සදහන්ව ඇත්තේ මෙම තහනම මැයි 14 වැනිදා සිට මැයි 17 වැනිදා දක්වා බල පැවැත්වෙන බවයි.

 

යුද්ධයෙන් මරාදමා පහලොස් අවුරුද්දක් ගතවීත් යුක්තිය නොලද ස්වකීය ආදරණීයයන් සිහිපත් කිරීමේ කැඳ දන්සලක් තහනම් කරමින් දුන් උසාවි නියෝගයක් අනුව යමින් සම්පුර් පොලිස් නිලධාරීන් ද  දෙමළ කාන්තාවන් තිදෙනකු ඇතුළු සිව් දෙනකු මැයි 12 වැනිදා ඉරිදා රාත්‍රියේ දී අත් අඩංගුවට ගෙන තිබුනි.

 

පොලිස් නිල ඇඳුම්න් සිටි පිරිමින් විසින් අත්අඩංගුවට ගත් කාන්තාවන් අමානුෂික ලෙස බිම දිගේ ඇදගෙන යන ආකාරය ද  ප්‍රදේශවාසීන් විසින් විඩියෝ ගත කර තිබේ.

පළාත් බද වාර්තාකරුවන් පවසන්නේ පොලීසිය විසින් මැයි 12 වැනිදා ඉරිදා රාත්‍රියේ දී අත් අඩංගුවට ගන්නා ලද කමලේස්වරන් තෙන්නිලා, කමලේස්වරන් විජිතා, සෙල්ව විනෝද් සුජානි සහ නවරත්න රාසා හරිහර කුමාර් යන සිව් දෙනා මුතුර් අධිකරණය විසින් දින 14කට රක්ෂිත බන්ධනාගාරගත කරන ලද බවයි.

 

sampoor 1

මුල්ලිවයික්කාල් කන්ජි (முள்ளிவாய்க்கால் கஞ்சி)

 
යුද්ධයේ අවසාන දිනවලදී මුහුදුබඩ බිම් තීරුවකට කොටුවී ෂෙල් වෙඩි, ගුවන් ප්‍රහාර සහ කාලතුවක්කු ප්‍රහාර වලට මැදිවී රෝගාබාධ සඳහා බෙහෙත් නොලැබ සිටි දෙමළ ජනතාවගෙන් සමහරකට නොමැරී දිවි ගලවාගන්නට පිහිටවුණේ මුල්ලිවයික්කාල් කන්ජි නමින් ඉතිහාසගතවූ කැඳයි.

එහි තිබුනේ වතුර ගොඩක පිසූ සහල්ය. හැකි විටෙකදී ඊට ලුණු බිඳකුත් එකතු කෙරිණි.  

දෙමළ වර්ග සංහාර සතිය උතුරු නැගෙනහිර දී මෙවර මැයි 11 වැනිදායින් ආරම්භ කරන ලද්දේ දොරින් දොර ගොස් රැස් කරගත් සහලින් පිසූ කන්ජි දන්සල් පවත්වමිනි.

යුද්ධයෙන් මරාදමා පහලොස් අවුරුද්දක් ගතවීත් යුක්තිය නොලද ස්වකීය ආදරණීයයන් සිහිපත් කරමින්  මැයි 18 වැනිදා මුල්ලිවයික්කාලේ පවත්වනු ලබන අනුස්මරණ රැලියකින් දෙමළ අනුස්මරණ සතිය නිමාවේ.
 
එක්සත්  ජාතීන්ගේ සංවිධානයේ ගණන් බැලීම අනුව යුද්ධයෙන් මරාදමන ලද නිරායුද ජන සමූහය අඩුම වශයෙන් හැත්තෑ දහසකි. එතෙක් මෙතෙක් පැවති ශ්‍රී ලංකාවේ ආණ්ඩු එම සංඛ්‍යාලේඛන ප්‍රතික්ෂේප කර තිබේ.
 

worky

worky 3

Follow Us

Image
Image
Image
Image
Image
Image

නවතම පුවත්