ශ්‍රී ලංකා ආණ්ඩුක්‍රම ව්‍යවස්ථාවේ 34 වන වගන්තිය ප්‍රකාරව ජනාධිපතිවරයා වෙත පැවරී ඇති බලතල අනුව මෙම පියවර ගෙන ඇත.
බන්ධනාගාර මාධ්‍ය ප්‍රකාශක සහ බන්ධනාගාර කොමසාරිස් ඒ. සී. ගජනායක සඳහන් කළේ මෙම විශේෂ සමාව යටතේ සුදුසුකම් ලැබූ රැඳවියන් අතුරින් 33 දෙනෙකු අද (30) දිනයේදීම බන්ධනාගාරවලින් නිදහස් කිරීමට නියමිත බවයි.
තුෂාර උපුල්දෙනියගේ සේවය අත්හිටුවීම පිළිබඳ ආන්දෝලනය
මේ අතර, පසුගිය වෙසක් දින උත්සව සමයේදී ජනාධිපති සමාව ලබාදීමේ ක්‍රියාවලියකට අදාළව එල්ල වූ චෝදනා හේතුවෙන් වැඩ තහනමකට ලක්ව සිටින හිටපු බන්ධනාගාර කොමසාරිස් ජනරාල් තුෂාර උපුල්දෙනිය ට මෙතෙක් සේවය අහිමිව පැවතීමේ සිදුවීම සම්බන්ධයෙන් දේශපාලන ක්ෂේත්‍රයේ දැඩි කතාබහක් නිර්මාණය වී ඇත.
ඊයේ (29) පැවති මාධ්‍ය හමුවකදී අදහස් දක්වමින් හිටපු අමාත්‍ය ලක්ෂ්මන් යාපා අබේවර්ධන මේ පිළිබඳව රජයේ නිලධාරීන් වෙත විශේෂ අනතුරු ඇඟවීමක් සිදු කළේය. එහිදී ඔහු කියා සිටියේ, තමන්ට සිදු වූ අසාධාරණය වෙනුවෙන් උපුල්දෙනිය අධිකරණ ක්‍රියාමාර්ග වෙත යොමු වූ බවත්, ඔහුව නැවත සේවයේ පිහිටුවන ලෙස අධිකරණය නියෝග කර තිබූ බවත්ය.
කෙසේ වෙතත්, අධිකරණ තීන්දුව ලබා දී තිබියදීත් වගකිවයුතු නිලධාරීන් මෙතෙක් ඔහුව සේවයේ පිහිටුවීමට පියවර ගෙන නොමැති බව හිටපු අමාත්‍යවරයා චෝදනා කළේය. දේශපාලන අධිකාරිය කුමන උපදෙස් ලබා දුන්නද, අධිකරණ නියෝගයක් පැහැර හැරීමේ අවසාන නීතිමය වගකීම රාජ්‍ය නිලධාරීන් වෙතම පැවරෙන බවද ඔහු එහිදී අවධාරණය කළේය.
