පාර්ලිමේන්තු මන්ත්‍රී රවී කරුණානායක විශේෂ ප්‍රකාශයක් සිදුකරමින් අවධාරණය කළේ, මේ හේතුවෙන් රටේ ආර්ථිකයට සහ පොදු ජනතාවට දැරීමට සිදුවන බරපතළ මූල්‍ය අර්බුදය සම්බන්ධයෙන් ශ්‍රී ලංකා මහබැංකුව සෘජුවම වගකිව යුතු බවයි.
රුපියල පිරිහීම සහ ණය බරෙහි සබඳතාව
විදේශීය ණය ප්‍රතිව්‍යුහගතකරණය සහ වත්මන් මූල්‍ය කළමනාකරණය පිළිබඳව අදහස් දක්වමින් හිටපු මුදල් අමාත්‍යවරයා පෙන්වා දෙන්නේ, විදේශීය මුදල් ඒකක වලින් ලබාගෙන ඇති ණය ප්‍රමාණය (විශේෂයෙන් ඇමරිකානු ඩොලර් ණය) රුපියල බාල්දු වීමත් සමඟ ස්වයංක්‍රීයවම ඉහළ යන බවයි.
ඩොලරයේ අගය රුපියලකින් ඉහළ යාම සරල කරුණක් ලෙස පෙනුනද, එය සමස්ත ණය ප්‍රමාණය හා සාපේක්ෂව ගණනය කිරීමේදී රුපියල් බිලියන 38 ක දැවැන්ත අමතර බරක් රට මත පැටවෙන බව ඔහු සංඛ්‍යාලේඛන සහිතව පෙන්වා දෙයි.
මහබැංකුවේ මැදිහත්වීම විවේචනයට
රටේ මූල්‍ය ස්ථාවරත්වය සහ විනිමය අනුපාතිකය පාලනය කිරීමේ මූලික වගකීම පැවරී ඇත්තේ ශ්‍රී ලංකා මහබැංකුවට බව සිහිපත් කළ කරුණානායක මන්ත්‍රීවරයා, පවතින තත්ත්වය හමුවේ මහබැංකුව වඩාත් සාධනීය සහ ප්‍රායෝගික පියවර නොගැනීම විවේචනයට ලක් කළේය.
දේශීය මුදල් ඒකකය ශක්තිමත් කිරීම සඳහා නිසි මූල්‍ය ප්‍රතිපත්ති සම්පාදනය නොකිරීමේ ප්‍රතිවිපාක අවසානයේ විඳීමට සිදුවන්නේ රටේ පොදු මහජනතාවට බවද ඔහු පැවසීය.
රුපියලේ අගය ස්ථාවරව තබා ගැනීමට රවී කරන යෝජනාව
ශ්‍රී ලංකාව සතු විදේශීය ණය ප්‍රමාණය ඉහළ මට්ටමක පවතින පසුබිමක, විනිමය අනුපාතිකයේ සිදුවන සුළු හෝ උච්චාවචනයක් වුවද රාජ්‍ය ණය තිරසාරභාවයට දැඩිව බලපාන බවයි. ඩොලරයට සාපේක්ෂව රුපියලේ අගය ස්ථාවරව තබා ගැනීම ණය වාරික සහ පොලී ගෙවීම් පාලනය කරගැනීම සඳහා අත්‍යවශ්‍ය සාධකයක් බව රවී කරුණානායක පෙන්වා දෙති.
හිටපු මුදල් අමාත්‍යවරයා වැඩිදුරටත් පවසන්නේ, වත්මන් ආර්ථික අර්බුදයෙන් ගොඩඒම සඳහා විනිමය අනුපාත කළමනාකරණය වඩාත් විනිවිදභාවයකින් සහ වගකීමකින් යුතුව සිදුකිරීමට මූල්‍ය බලධාරීන් කටයුතු කළ යුතු බවයි.
