විශේෂ ත්‍රිපුද්ගල මහාධිකරණයේ තීන්දුව
2019 පාස්කු ඉරිදා එල්ල වූ ම්ලේච්ඡ ත්‍රස්ත ප්‍රහාර මාලාවට පෙර පුත්තලම, වනාතවිල්ලුව ලැක්ටෝස්වත්ත ප්‍රදේශයේ රහසිගත පුහුණු කඳවුරක් පැවැත්වීම සහ මහා පරිමාණ පුපුරන ද්‍රව්‍ය රැස්කිරීම සම්බන්ධයෙන් විශේෂ ත්‍රිපුද්ගල මහාධිකරණය තීන්දුවක් ප්‍රකාශයට පත් කළේය.
නීතිපතිවරයා ගොනු කළ අධිචෝදනාවලට වරද පිළිගැනීමෙන් අනතුරුව මොහොමඩ් ඊබ්‍රාහිම් සාදික් අබ්දුල්ලා (අබු උමර්) සහ මොහොමදු නවුෆර් මවුලවී යන විත්තිකරුවන් දෙදෙනාට බරපතළ වැඩ සහිත වසර 12 බැගින් වූ සිරදඬුවම් නියම කෙරිණි.
ලාල් රණසිංහ බණ්ඩාර (සභාපති), රශ්මි සිංගප්පුලි සහ නයෝමි වික්‍රමසේකර යන මහාධිකරණ විනිසුරු මඬුල්ල හමුවේ මෙම නඩුව විභාගයට ගැනිණි.
දඬුවම ගණනය වූ නීතිමය පදනම
අධිචෝදනා පත්‍රයේ සඳහන් 1, 2, 8 සහ 9 යන චෝදනා හතරට වරද පිළිගැනීම හේතුවෙන් 4 වන සහ 5 වන විත්තිකරුවන් වූ මොවුන් දෙදෙනාට මුලින් නියම වූයේ වසර 48ක සිරදඬුවමකි.
එම දඬුවම් එකවර ගෙවී යන පරිදි වසර 12කින් නිමාවට පත්වන සේ ක්‍රියාත්මක කිරීමට අධිකරණය නියෝග කළේය. සැකකරුවන් මෙතෙක් විඳි වසර තුනහමාරක රැඳවුම් කාලය ද එම වසර 12න් අඩු කර සහනයක් ලබා දී තිබේ.
තුන්වන විත්තිකරු ද හෙට දිනයේ වරද පිළිගැනීමට සූදානම් බව ප්‍රකාශ කළ අතර, සෙසු විත්තිකරුවන් වෙනුවෙන් පෙනී සිටි නීතිඥවරුන් සඳහන් කළේ සිය සේවාදායකයන් ද චෝදනා කෙටි ක්‍රමයකින් අවසන් කර ගැනීම කෙරෙහි සලකා බලන බවයි.
ඇප මත සිටි විත්තිකරුවන්ට වසර 50ක සිරදඬුවම්
මෙම නඩුවේ පළමු සහ දෙවන විත්තිකරුවන් ලෙස නම් කර සිටි ලැක්ටෝස්වත්තේ ඉඩම් හිමිකරු අබු හනීපා මොහොමඩ් මුෆීස් (අබු දහිදා) සහ අමීර් හම්සා මොහොමඩ් හමාස් (අබු සාෆියා) මීට පෙර ඇප මත පසුවූවන්ය.
තමන් සියලු චෝදනාවලට වරද පිළිගන්නා බව ඔවුන් පසුගියදා දැනුම් දීමත් සමඟ, මහාධිකරණ විනිසුරු මඬුල්ල ඔවුන් දෙදෙනාට වසර 50 බැගින් වූ සිරදඬුවම් නියම කර තිබිණි.
මුලින් පුත්තලම මහාධිකරණයේ විභාග වූ මෙම නඩුව, පාස්කු මහ නඩුවේ විත්තිකරුවන් කිහිපදෙනෙකුම මෙහි ද විත්තිකරුවන් වීම හේතුවෙන් නඩු විභාග කාර්යක්ෂම කිරීමේ අරමුණින් කොළඹ විශේෂ ත්‍රිපුද්ගල මහාධිකරණය වෙත මාරු කෙරුණකි.
සහරාන්ගේ පුපුරන ද්‍රව්‍ය ගබඩාව
2018 ඔක්තෝබර් 1 සිට 2019 ජනවාරි 16 දක්වා කාලය තුළ මරාගෙන මැරෙන බෝම්බකරුවන් වූ සහරාන් හෂීම් සහ මොහොමඩ් හස්තූන් සමඟ එක්ව මෙම කඳවුර පවත්වාගෙන ගොස් ඇති බව නඩු වාර්තාවල දැක්වේ.
එම භූමිය පරීක්ෂා කිරීමේදී යූරියා නයිට්‍රේට් කිලෝග්‍රෑම් 100කට අධික තොගයක්, ඩෙටනේටර් 99ක්, ගිනිඅවියක්, ජීව උණ්ඩ 12ක් සහ පුපුරන ද්‍රව්‍ය නිෂ්පාදනයට යොදාගන්නා නයිට්‍රික් ඇසිඩ් ඇතුළු නඩු භාණ්ඩ 92ක් සොයාගැනීමට ආරක්ෂක අංශ සමත් විය.
ත්‍රස්තවාදය වැළැක්වීමේ පනත සහ ත්‍රස්තවාදීන්ට මුදල් සැපයීම මැඬපැවැත්වීමේ සම්මුති පනත යටතේ නීතිපතිවරයා ගොනු කළ අධිචෝදනා 14ක් යටතේ රජයේ අධි නීතිඥ සජිත් බණ්ඩාර මහතා පැමිණිල්ල මෙහෙයවීය.
මානුෂීය අයිතීන් සහ සමාජ ආරක්ෂණය
විත්තිකරුවන්ට කුමන බරපතළ චෝදනා එල්ල වී තිබුණ ද අධිකරණය ඔවුන් සලකන්නේ නීතිය ඉදිරියේ සිටින විත්තිකරුවන් ලෙස පමණක් බවත්, මානුෂීය අයිතිවාසිකම් සුරැකීමට අධිකරණය බැඳී සිටින බවත් විවෘත අධිකරණයේදී ප්‍රකාශ විය.
ඒ සමඟම මහජනතාවගේ සහ සමස්ත සමාජයේ ආරක්ෂාව තහවුරු කිරීම අධිකරණය සතු මූලිකම සහ පරම වගකීමක් බව සභාපති විනිසුරු ලාල් රණසිංහ බණ්ඩාර මහතා සිය නියෝගය ප්‍රකාශයට පත් කරමින් අවධාරණය කළේය.