කැලණිය විශ්වවිද්‍යාලයේ වාග්විද්‍යා අධ්‍යයනාංශයේ පරිවර්තන කවය ශිෂ්‍ය සංගමය මගින් සංවිධානය කරන ලද පරිවර්තන අධ්‍යයනය පිළිබඳ ‘භාෂාර්ණව’ ශාස්ත්‍රීය සංවාද මාලාවේ තෙවන සැසිය 2026 ඔක්තෝබර් 27 වන අඟහරුවාදා විශ්වවිද්‍යාලයේ K14 001 ශ්‍රවණාගාරයේදී සාර්ථකව පැවැත්වී ය.
‘සිංහල අකුරු (Fonts) වල ඉතිහාසය, විකාශනය සහ භාවිතය’ මැයෙන් පැවැත්වුණු මෙම තෙවන සැසියේ දී සිංහල අකුරු කලාවේ ඓතිහාසික සංවර්ධනය, විකාශනය සහ ප්‍රායෝගික භාවිත පිළිබඳව අවධානය යොමු කෙරුණි. එහි දී: භාෂාව, අකුරු නිර්මාණය (Typography) සහ ඩිජිටල් තාක්ෂණය අතර පවතින වැදගත් සබැඳියාව පෙන්වා දුන් අතර, සිංහල භාෂාව සුරැකීම, ප්‍රවර්ධනය කිරීම සහ ඩිජිටල් අවකාශය තුළ එය නියෝජනය කිරීම සඳහා අකුරු නිර්මාණකරණයේ ඇති වැදගත්කම අවධාරණය කෙරිණි.
මෙම සැසියේ සම්පත් දායකයා ලෙස ප්‍රවීණ සිංහල අකුරු නිර්මාණ ශිල්පියෙකු වන පුෂ්පානන්ද ඒකනායක සහභාගී විය. සිංහල අකුරු නිර්මාණය පිළිබඳ ඔහු ගේ ප්‍රවීණත්වය සහ අත්දැකීම් ඇසුරින්, සිංහල අකුරු කලාවේ සංවර්ධනය සහ භාවිතය පිළිබඳවත්, ඩිජිටල් යුගය තුළ සිංහල භාෂාවේ ප්‍රගතිය උදෙසා ඉන් ලැබෙන දායකත්වය පිළිබඳවත් වටිනා අදහස් රැසක් මෙහිදී ඉදිරිපත් කෙරුණි.
පරිවර්තන අධ්‍යයන ශාස්ත්‍රවේදී (ගරු) උපාධි පාඨමාලාව සහ වාග්විද්‍යා ශාස්ත්‍රවේදී (ගරු) උපාධි පාඨමාලාව හදාරන සිසු සිසුවියන් පිරිසක් මේ සඳහා සහභාගී වූහ. එසේම වාග්විද්‍යා අධ්‍යයනාංශයේ අංශාධිපති, පූජ්‍ය ආචාර්ය කපුගොල්ලෑවේ ආනන්දකිත්ති හිමි, ජ්‍යෙෂ්ඨ කථිකාචාර්ය ජයමාල් ද සිල්වා මහතා, කථිකාචාර්ය අමයා නානායක්කාර මෙනවිය සහ සහකාර කථිකාචාර්ය පූජා මිණිතන්ත්‍රිගේ මෙනවිය ඇතුළු අධ්‍යයනාංශයේ අධ්‍යයන කාර්ය මණ්ඩලයේ පිරිසක් ද මෙම අවස්ථාවට එක් වූහ.
මෙම සංවාද මාලාව ශාස්ත්‍රීය සන්නිවේදනය සහ දැනුම බෙදාහදා ගැනීම සඳහා කදිම වේදිකාවක් වූ අතර, භාෂාමය දැනුම, අකුරු නිර්මාණය සහ ඩිජිටල් තාක්ෂණය එකිනෙක ඡේදනය වන ආකාරය ගවේෂණය කිරීමට සහභාගිවන්නන්ට අවස්ථාව සලසා දුන්නේය. එමෙන්ම, භාෂාවේ අඛණ්ඩ වර්ධනය උදෙසා තාක්ෂණික දියුණුවේ ඇති වැදගත්කම ද මෙහිදී මැනවින් පැහැදිලි කෙරිණි.
කැලණිය විශ්වවිද්‍යාලයේ වාග්විද්‍යා අධ්‍යයනාංශය