විදෙස් රටවලින් ලබාගන්නා තාක්ෂණික පුහුණුව බොහෝ විට පාඨමාලාව අවසන් වූ පසු සාමාන්ය රාජකාරි රාමුව තුළම දියවී යයි.
එම දැනුම රටේ ප්රායෝගික සංවර්ධනයට ඍජුවම දායක කර ගැනීමේ අරමුණින්, චයිනා ඒඩ් පුහුණු පාඨමාලා ආදි ශිෂ්ය සංගමය (CATA – Sri Lanka) සිය නිල වෙබ් අඩවිය ඊයේ (19) කොළඹදී එළිදැක්වීය.
www.catasl.org නම් මෙම නව ඩිජිටල් වේදිකාව හරහා චීන රජයේ ආධාර යටතේ පුහුණුව ලැබූ මෙරට රාජ්ය නිලධාරීන් සහ වෘත්තිකයන් එකම ජාලයක් තුළ සම්බන්ධ කෙරේ.

දැනුම හුවමාරුවට ඩිජිටල් වේදිකාවක්
ශ්රී ලංකාව සහ චීනය අතර මානව සම්පත් සංවර්ධන සහයෝගීතාව නව මානයකට ගෙන යමින් මෙම වෙබ් අඩවිය දියත් කර තිබේ.
CATA සංගමයේ සභාපති සංජීව විමලගුණරත්න මහතා පෙන්වා දුන්නේ චීනයේදී ලබාගත් පුහුණුව මෙරට තුළ ප්රායෝගිකව ක්රියාත්මක කිරීමට පසු විපරම් වැඩසටහන් අත්යවශ්ය බවයි.
නව වෙබ් අඩවිය මඟින් සාමාජිකයන් අතර තොරතුරු හුවමාරුව සහ ඉදිරි ව්යාපෘති සම්බන්ධීකරණය වඩාත් විධිමත් වනු ඇතැයි සංගමය අපේක්ෂා කරයි.

CATA සංගමයේ සභාපති සංජීව විමලගුණරත්න මහතා
රාජ්ය තාන්ත්රික සහයෝගීතාවයේ නව පියවරක්
ශ්රී ලංකාවේ චීන තානාපති වෙයි හුවාෂියැං මහතා උත්සවයේ ප්රධාන දේශනය පවත්වමින් දෙරට අතර පවතින දිගුකාලීන මිත්රත්වය සිහිපත් කළේය.
චීනයෙන් උගත් නවීන තාක්ෂණය සහ දැනුම ශ්රී ලංකාව ගොඩනැගීමට ප්රායෝගිකව යොදා ගැනීමේ වගකීම මෙම පුහුණුලාභීන් සතු බව එතුමා අවධාරණය කළේය.

ශ්රී ලංකාවේ චීන තානාපති වෙයි හුවාෂියැං මහතා
ප්රධාන ආරාධිතයා ලෙස එක්වූ කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා, මෙරට නිලධාරීන්ගේ වෘත්තීය නිපුණතාව ඉහළ නැංවීමට චීන පුහුණු වැඩසටහන් ලබාදෙන දායකත්වය ඇගයීමට ලක් කළේය. ජාත්යන්තර මට්ටමේ නවීන ක්රමවේද අත්හදා බැලීමට මෙය කදිම අවස්ථාවක් බව ඔහු සඳහන් කළේය.
අග්රාමාත්ය ලේකම් ප්රදීප් සපුතන්ත්රී, කොළඹ චීන තානාපති කාර්යාලයේ කොන්සියුලර් ටෑං යැන්ඩි සහ CATA සංගමයේ ලේකම් යුෂාන් තරංග යන මහත්වරුන් ඇතුළු පිරිසක් මෙම වෙබ් අඩවිය විවෘත කිරීමේ අවස්ථාවට එක්ව සිටියහ.

කම්කරු අමාත්ය සහ මුදල් හා ක්රමසම්පාදන නියෝජ්ය අමාත්ය ආචාර්ය අනිල් ජයන්ත ප්රනාන්දු මහතා
ක්ෂේත්ර හතරක ප්රායෝගික අත්දැකීම්
චීන පුහුණුව මෙරට ආර්ථික හා සමාජීය අංශවලට බද්ධ කළ ආකාරය පිළිබඳව එම වැඩසටහන්වලට සහභාගී වූ ආදි ශිෂ්යයින් සිව්දෙනෙක් මෙහිදී සිය අත්දැකීම් ඉදිරිපත් කළහ.
| කෘෂිකර්මය: මහාචාර්ය රුවනි නුගාර මහත්මිය වී අස්වැන්න කළමනාකරණය පිළිබඳ නව ක්රමවේද පැහැදිලි කළාය.
| නාගරික සංවර්ධනය: මහාචාර්ය ටී. සිවකුමාරන් මහතා නාගරික හා ප්රාදේශීය ඒකාබද්ධ කළමනාකරණය ගැන කරුණු දැක්වීය.
| ඩිජිටල් ආර්ථිකය: ගෝලීය දකුණු කලාපයේ (Global South) කාන්තා ව්යවසායකයන් විද්යුත් වාණිජ්යය (E-commerce) වෙත යොමු කිරීමේ හැකියාවන් පිළිබඳව භාග්යා ඉද්දමල්ගොඩ මහත්මිය අදහස් දැක්වූවාය.
| රාජ්ය මූල්ය: රාජ්ය අංශයේ මූල්ය කළමනාකරණය විධිමත් කිරීම ගැන චන්ද්රිකා සේනානායක මහත්මිය සිය අත්දැකීම් බෙදා ගත්තාය.
රාජ්ය නිලධාරීන් සතු විශේෂඥ දැනුම හුදු සහතික පත්රයකට පමණක් සීමා නොකර, රටේ සංවර්ධන ඉලක්ක සපුරා ගැනීම සඳහා ඒකාබද්ධ කිරීම CATA සංගමයේ ඉදිරි දැක්ම බව මෙම හමුවේදී තහවුරු විය.
වැඩිදුර තොරතුරු ඇතුළත් මූලාශ්ර සබැඳිය:



