ජාතික ප්‍රයත්නයක් දැරිය යුතු බව ශ්‍රී ලංකා ඇඟලුම් සංගම් ඒකාබද්ධ සංසදය (JAAF) අවධාරණය කරයි.
වසර 2026 අප්‍රේල් මාසය සඳහා ශ්‍රී ලංකාවේ ඇඟලුම් අපනයන ආදායම පසුගිය වසරට සාපේක්ෂව පහත වැටී ඇති බව වාර්තා වේ. මෙම තත්ත්වය හමුවේ ඇඟලුම් ක්ෂේත්‍රයේ ගෝලීය තරඟකාරිත්වය තහවුරු කිරීම සඳහා කඩිනම් ප්‍රතිපත්තිමය සහයෝගයක් සහ ව්‍යුහාත්මක ප්‍රතිසංස්කරණ අවශ්‍ය බව ශ්‍රී ලංකා ඇඟලුම් සංගම් ඒකාබද්ධ සංසදය (JAAF) අවධාරණය කරයි.
පවතින අභියෝග ජයගෙන ඇමරිකානු ඩොලර් බිලියන 5 ක අපනයන ඉලක්කය කරා ගමන් කිරීමට නම් රජය සහ අදාළ අංශ සම්බන්ධීකරණය වූ ජාතික ප්‍රයත්නයක් දැරිය යුතු බව JAAF පවසයි. ඒ සඳහා පහත සඳහන් ප්‍රතිසංස්කරණ කඩිනම් කළ යුතු බව ඔවුන් යෝජනා කරයි:
* ස්ථාවර සහ අඛණ්ඩ ප්‍රතිපත්ති මාලාවක් පවත්වාගෙන යාම.
* බලශක්ති පිරිවැය සම්බන්ධ ප්‍රතිසංස්කරණ සිදුකිරීම.
* වෙළඳ පහසුකම් සැලසීමේ ක්‍රියාවලීන් ශක්තිමත් කිරීම.
* ශ්‍රමිකයන්ගේ කුසලතා සංවර්ධනය සහ ඉහළ වටිනාකමකින් යුත් (high-value) නිෂ්පාදන වෙත යොමුවීම.
ලංකාවේ විදේශ විනිමය උපයන ප්‍රධානතම ක්ෂේත්‍රයක් වන ඇඟලුම් කර්මාන්තය ජාතික ආර්ථිකයේ ස්ථාවරත්වයට තීරණාත්මක බලපෑමක් එල්ල කරයි. එබැවින් මෙම ක්ෂේත්‍රයේ යථා තත්ත්වයට පත්වීම රටේ සමස්ත අපනයන ක්‍රියාවලියට අතිශය වැදගත් වනු ඇත.
ශ්‍රී ලංකා ඇඟලුම් සංගම් ඒකාබද්ධ සංසදයේ දත්ත වලට අනුව, 2025 අප්‍රේල් මාසයේදී වාර්තා වූ ඇමරිකානු ඩොලර් මිලියන 344.40 ක අපනයන ආදායම 2026 අප්‍රේල් වන විට ඩොලර් මිලියන 328.15 දක්වා සියයට 4.72 කින් පහත වැටී ඇත. එමෙන්ම 2026 වසරේ ජනවාරි සිට අප්‍රේල් දක්වා වූ මුල් මාස හතර තුළ සමස්ත ඇඟලුම් අපනයනය සියයට 7.47 කින් පහත වැටී ඇමරිකානු ඩොලර් බිලියන 1.53 ක් ලෙස සටහන් වී තිබේ.
මෙම පසුබෑමට ප්‍රධාන හේතුන් :
මෙම පසුබෑමට ප්‍රධාන වශයෙන්ම ශ්‍රී ලංකාවේ ප්‍රධාන අපනයන වෙළඳපොළවල් වන බ්‍රිතාන්‍යය, යුරෝපා සංගමය සහ ඇමරිකා එක්සත් ජනපදය යන රටවල ඉල්ලුම අඩුවීම බලපා ඇත. දත්ත වලට අනුව,
* එක්සත් රාජධානිය වෙත අපනයන සියයට 16.91 කින් පහත වැටී ඇත.
* යුරෝපා සංගමය වෙත අපනයන සියයට 8.78 කින් පහත වැටී ඇත.
* ඇමරිකා එක්සත් ජනපදය වෙත අපනයන සියයට 3.46 කින් පහත වැටී ඇත.
(සටහන | ජේ.මුණසිංහ)
