තොරතුරු දැනගැනීමේ අයිතිවාසිකම පිළිබඳ (RTI) පනත යටතේ දේශපාලන ක්‍රියාකාරික රෙහාන් ජයවික්‍රම විසින් කරන ලද ඉල්ලීමකට ප්‍රතිචාර දක්වමින් ජනාධිපති ලේකම් කාර්යාලය විසින් මෙම දත්ත ප්‍රකාශයට පත් කර ඇත.
ජනාධිපති ලේකම් කාර්යාලයේ තොරතුරු නිලධාරීවරයා විසින් නිකුත් කරන ලද ලේඛනවලට අනුව, 2025 නොවැම්බර් 28 දින සිට 2026 අප්‍රේල් 23 දක්වා කාලය තුළ මෙම අරමුදල වෙත මුදල් ලැබී ඇත.
දේශීය මුදල් (LKR):
ලංකා බැංකුව, මහජන බැංකුව සහ ශ්‍රී ලංකා මහ බැංකුව හරහා එකතු වී ඇති සමස්ත දේශීය මුදල් ප්‍රමාණය රුපියල් 6,172,001,000.00 (බිලියන 6.1කට අධික) කි.
විදේශීය මුදල් (USD අගය):
ඇමරිකානු ඩොලර්, යුරෝ, ස්ටර්ලින් පවුම්, ඕස්ට්‍රේලියානු ඩොලර්, ජපන් යෙන්, සිංගප්පූරු ඩොලර් සහ කොරියන් වොන් ඇතුළු විදේශීය මුදල් වර්ග රැසකින් ලැබී ඇති සමස්ත ආධාරවල වටිනාකම ඇමරිකානු ඩොලර් 11,485,616.86 (මිලියන 11.4කට අධික) කි.
තොරතුරු නොමැති වීම පිළිබඳ ගැටලුව
මෙම අරමුදල සඳහා දායකත්වය ලබාදුන් පුද්ගලයන්, සමාගම් හෝ විදේශීය ආයතන ඇතුළත් පරිත්‍යාගශීලීන්ගේ නාමලේඛනය සහ ඔවුන් ලබාදුන් මුදල් ප්‍රමාණයන් පිළිබඳව තොරතුරු විමසා සිටියද, ජනාධිපති ලේකම් කාර්යාලය ප්‍රකාශ කර ඇත්තේ එම තොරතුරු තමන් සතුව නොමැති බවයි.
මීට අමතරව, අදාළ අරමුදල් බෙදාහැරීම් සිදුකළ ආකාරය, එහි ප්‍රතිලාභීන්, ප්‍රසම්පාදන ක්‍රියාවලීන්, කොන්ත්‍රාත්කරුවන්ගේ විස්තර, අධීක්ෂණ වාර්තා මෙන්ම මේ දක්වා සිදුකර ඇති කිසිදු විගණන වාර්තාවක් (Audit Reports) ද ලබාගත නොහැකි මට්ටමේ පවතින බව එම නිල පිළිතුරේ සඳහන් වේ.
මෙම තත්ත්වය පිළිබඳව අදහස් දක්වමින් තොරතුරු ඉල්ලුම්කරු වන රෙහාන් ජයවික්‍රම පෙන්වා දෙන්නේ, රාජ්‍ය අරමුදලකට ලැබෙන සෑම රුපියලකටම සහ ඩොලරයකටම සිදුවූයේ කුමක්දැයි නිවැරදිව සහ විනිවිදභාවයකින් යුතුව දැනගැනීමට ශ්‍රී ලාංකික පුරවැසියන්ට පූර්ණ අයිතියක් ඇති බවයි.
ජනාධිපති ලේකම් කාර්යාලය විසින් සපයන ලද මෙම තොරතුරු පිළිබඳව සෑහීමකට පත් නොවන්නේ නම්, දින 14ක් ඇතුළත ජනාධිපති ජ්‍යෙෂ්ඨ අතිරේක ලේකම් කේ. ප්‍රසන්න චන්දිත් වෙත අභියාචනයක් ඉදිරිපත් කිරීමට ඉල්ලුම්කරුට අවස්ථාව පවතී.
